Read Lautu Chin 2 Korin 2 Bible Online

2 Korin 2 - Lautu Chin bible

2 Korin 2

¹Cacuonakawta, niema palung pasa sa pakhaa riypa laa taca ica vya tlaw li riypa yita i palung lie bie i chi.

²Tahematapakieca nama palung ca pasa sa sue yi ang sala, ama lie kha niema ri li pata i palung naa patluo riypa ahungma a aw aa?

³I vaw thueta i palung naa patluo riy'apa tie ta i palung ina pasa sa li riypa ung cata hing caa hing i vya cape pata a cuo; tahematapakieca kama palungtluona ca niema bangkhuo palungtluona ta a cuo ra tapa kha a phasa pata i zang.

⁴Kama ta pathiypalung riethyisapa'a nata mingthliy yi hluvpuv lang pata caa cape ang te ica vya paphyapa yi hing niema palung pasa sa riypata cuo li pata, khatluv tama ica due yi tapa nama pachang na riypatana a cuo.

⁵Cawsaa pakha khata ngiechina a patlung sa kieca kama dyi cuo li pata niema bangkhuo zaw kha nama palung aca pasa sa yi. Hing bie hing khuotuv ta ri khing va ang.

⁶Niema hluv vie bangkhuo ta duo nama tepa kha a cuota aa de tli.

⁷Cacuonakawta a ang khu li nate ta a ngie a chi li riypata ama kha a ngiethe ungla a hnaa panguo tie ung.

⁸Nama due hmisipa kha paluo sa tie ung tapata paa ica kie yi.

⁹Niema ta hmangting bangkhuo lie ri-angiena nama hnyi ma hnyi va ung cama tapa kha pachang riypata hing caa hing i vya cape pata a cuo.

¹⁰Niema ta namaa ngiethepa bangkhuo kha i ngiethe ra aa. Kama ta suokhakha kha i ngiethe pata a cuo kieca niema cuota Khrih hmiekunglie i ngiethepa tana a cuo.

¹¹Hinghaahingta ma tuenapa ca setaa ta a raw malie a patlung li riypatana a cuo, tahematapakieca setaa ruena hne tingna ca ma pachang diypa tana a cuo.

¹²Khrih thuophaabie phu riypata Troas luo i vaw ning kha Abyipa thueta i cuo ta luopuv aa pahaw tapa kha i pachang.

¹³Cuorasala i uvnupa Titas i hmung li nakawta i palung rie a thyi. Cacuonakawta iema kha bie a changsiy yi ang te Masidonia ruo luo kha i caluo.

¹⁴Cuorasala Khazing ca a law ungsiy. Khrih thueta kiema kha tena luo malie a chiy te, kiema kha hmuo pata Khrih thuophaa ca hmangting luo kha ama ma pachangna thueta rangpa-uepa haata aa ze tli.

¹⁵Tahematapakieca kiema ca Khazing cuota khuo nguoluopa tie hne a viele nguoluopa tie hrawlie Khrih rangpa-uepa tana ma cuo.

¹⁶A vie nguoluopa tie cuota ca thiyna rangpahnuopa cuo pate khuo nguoluopa tie cuota ca hringna rangpa-uepa tana ma cuo. Hingpa hmang kawlie hingta ahungma a tlingpa a aw aa?

¹⁷Cacuonakawta kiema ca Khazing bie kha a muo nasa pata a zaapa tie haakhata cuo va puv; Khazing pathliepa ma cuona haata, Khrih thueta a bie kha a hmiekunglie pathiypalung hmisi ta a ripa tana ma cuo.