Read Lautu Chin 2 Korin 3 Bible Online

2 Korin 3 - Lautu Chin bible

2 Korin 3

¹Hinghaahingta ma ta tiyta kiema hne kiema a pathuosa pakhaa kanaa puv? Cawsaa chekha haata niema'a luo, a cuo li kie niema'a taata pachangkhyina caa a hu kanaa puv?

²Niema khana cawsaa bangkhuo ri riypata ma palung chunglie capepa caa ta a cuo ungciy.

³Niema ta kiema thueta Khrih capepa caa nama cuopa kha nama paluo sa. Capa caa ca caatiy ta alung cunglie capepa cuo li pata a hringpa Khazing Thlaapa ta cawsaa pathiypalung cunglie capepa tana a cuo.

⁴Caca Zingsuv thueta Khazing'a lie ma hnyipa anguona tana a cuo.

⁵Hmang suokhakha hing kiema'a taata na a cuo ta khuna hnyi va puv, kiema tuehrie khuna ca Khazing'a taata na a cuo.

⁶Ama na kiema kha biekuo thaa rehrietuv cuo riypata tuehrie khuna malie a pi. Ca biekuo thaa ca caa ta capepa phungbie cuo li pata thlaapa tuv khata a cuo. Caa ta capepa phungbie ta ca cawsaa kha thie te, cuorasala Thlaapa ta ca cawsaa kha hringna a pi.

⁷Thiyna a chiykhyipa rehriena, sata ta khe yite alung cunglie capepa caa ca rungnaana hne vya bi te, a zuebung luo a cuo raalaa pata, Moses hmie ca a rungnaa tuv nakawta Israel ming ta a hmiepachaw pata ama mang khu li kieca,

⁸Thlaapa rehriena ca khatluv tama a rungnaa vie aa?

⁹Cawsaa suephawna re hmuo a rungnaa kieca cawsaa duopacuna re ca khatluv tama a rungnaa vie aa!

¹⁰Hmisi ta ripa kieca, a hluo ningta zaa rungnaasapa ca ama laata a rungnaa viepa nakaw khata a rungnaana a vie tli.

¹¹Tahematapakieca cuokhata dyi a awpa hmuo rungnaana a hnyi kieca, chuozaa ta aa hmangpa changchiy ca khatluv ta ma rungnaana a hnyi vie aa!

¹²Hinghaapa a ruechuona ma hnyi nakawta ma rie a phasa.

¹³Zuebungle te a rungnaana a viepa a hmie kha Israel ming ta na hmung kha yi se tapata pangluv a khuvpa Moses haakhata cuo va puv.

¹⁴Cuorasala ama pathiypalung ca a ping hringhruo. Hmisi ta ripa kieca, ata ning tepa hingta, biekuo hlung ama ri kyry ta ama hmie kha capa pangluvkhuv cata amaa khuv kalie. Tahematapakieca capa pangluvkhuv ca Khrih thue kyalyadyi tana hle khupa a cuo.

¹⁵A cuo, ata ning tepa hingta Moses phungbie kha ama ri tiyta ama pathiypalung kha pangluvkhuv ta a pakhuv kalie yi.

¹⁶Cuorasala cawsaa pakha kha Abyipa'a luo aa thle tiyta a pangluvkhuv ca a hle te thawpa a cuo.

¹⁷Abyipa ca Thlaapa ta cuote, Abyipa Thlaapa a awna lieca hyazangna a aw.

¹⁸Kiema bangkhuo ca ma hmie pangluvkhuv kha hlepa tlipa ma cuo nakawta Abyipa rungnaana ca thlaluo lie maa hmungpa haata ma paluo sa. Tahematapakieca capa rungnaana ca Thlaapa ta a cuopa Abyipa'a taata a vawpa a cuo nakawta ma hringna kha ama ma lu riypa hne rungnaa hryly riypata malie a thlele nguoluo.