Read Lautu Chin 2 Korin 4 Bible Online

2 Korin 4 - Lautu Chin bible

2 Korin 4

¹Khazing ta, hingpa re hing a nangduena thueta malie a pahrie sapa a cuo nakawta ma palung chuo buo vyi.

²A paruv ta tuepa nangzaa aa chiypa hmang bangkhuo kha thaw diy pate; zyate pata hmang tue kha khing lipa pata, Khazing bie zaw kha a cuo li pata ri va puv. Cuorasala biehmisipa kha a siesa pata paluo sa pate, cawsaa ta ama chiephathleduona lie pathuo sa tluo aa tla pata malie ama hmungthena riypata Khazing hmielie kha ma hring.

³Ma phupa thuophaabie hing aa buvkhung kie zaw ma, a vie nguoluopa tie cuotana aa buvkhung aa.

⁴Iema kawlie hingta ca, hing chuelyi khazing ta a zang lipa tie pathiypalung kha pazing te, Khazing hmingsuo ta a cuopa Khrih rungnaana thuophaabie khena kha ama hmung khu li riypata a tue yi.

⁵Tahematapakieca kiema kaw kha ma phupa cuo li pata Zingsuv Khrih ca Abyipa a cuona kaw hne kiema zaw Zingsuv kawlieta niema sii ma cuona kaw kha ma phupa ta a cuo.

⁶“Khena ca zingna chunglie kha khe se,” a tapa Khazing ta Zingsuv Khrih hmielie Khazing rungnaana ta a cuopa pachangna kha ma pathiypalung chunglie malie a pakhepa.

⁷Cuorasala hingpa kharuehaa aa chiypa cahrana hing kiema'a taata cuo li pata Khazing huopa a cuona zya kha a siena riypata a alyibi hne aa lupa kiema ta capa thlaapa rusue ca ma chaw.

⁸A kuo bangkhuo taata malie ama carie puo raalaa pata kepatlaa va puv; palung luolue pata ma aw, cuorasala ma palung chuo buo vyi;

⁹malie ama hrisaathierue, cuorasala thawpa ta cuo va puv; malie ama chipatyi, cuorasala rakyi va puv;

¹⁰ma pangpa lieta Zingsuv hringna kha aa luo the riypata Zingsuv thiyna kha ma pangpa ta ma phyale pari.

¹¹A thiykhupa ma pangpa lie hing Zingsuv hringna aa luo khu riypata Zingsuv cuota thiy tyalya'a nang pata khy ma sa.

¹²Cacuonakawta kiema chunglie ca thiyna ta re hrie te niema chunglie ca hringna ta re a hrie.

¹³Caapathepa chunglie, “I zang nakawta i ri,” a tapa haata, kiema zaw capa zangna thlaapa ca ma hnyi nakawta zang pate ma ri.

¹⁴Tahematapakieca Abyipa Zingsuv a pathu pakhaapapaa khata kiema zaw hing Zingsuv hne khata malie pathu'a te, niema hne a hmiekung luo kha malie aa chiy aa tapa kha ma pachang.

¹⁵A cuo, hingpa bangkhuo hing niema cuota cuote, Khazing vihnyina ca cawsaa hluv vie'a luo kha a pha hryly pahaata, Khazing rungnaana cunglie alawna hne pathuosana ca a le hryly aa.

¹⁶Cacuonakawta ma palung chuo buo vyi. Ma saapa cuona ca ning kha hnang ning kha ta zuebung viele ra sala, ma thlaapa cuona ca ning kha hnang ning kha ta a thaa viele.

¹⁷Cuokhata dyi ma angpa ruvnaana hingta pakhingpuo sa a pha lipa chuozaa rungnaana kha malie a parepa.

¹⁸Tahematapakieca, kiema ta maa mangpuopa ca hmung khupa cuo li pata, hmung khu lipa tana a cuo; hmung khupa ca cuo pachangta cuo dyi cuote, cuorasala hmung khu lipa ca chuozaa cuota a cuo.