Read Lautu Chin 2 Korin 5 Bible Online

2 Korin 5 - Lautu Chin bible

2 Korin 5

¹Kiema ma awna hingpa alyi thluodaa hing parapa a cuo tiyta, cawsaa kuv ta sa lipa, Khazing ta malie a pipa chuozaa ta vuoruo lie aa hmangpa ing ma hnyi tapa kha ma pachang.

²Hingpa alyi thluodaa lie hingca a hrung byalya pate vuoruo ma ing khiy malie za pabuv sala tapa kha ma vuosa taw.

³Capa ing ta pabuvpa ma cuo tiyta pangpa li pata aw'a va puv.

⁴Hingpa chuelyi thluodaa lie ma aw ning hing ca, ma hmang a riypa rawlie maa hrung maa ie. Cahaa cata maa hrungpa ca hingpa ma chuelyi thluodaa hing ma thaw khing nakaw cuo li pata vuoruo ma ing khiy ta pabuvpa cuo sala a thiy thepa ma pangpa hing hringna ta vya buvkhung se tapa ma khing nakawta a cuo.

⁵Hingpa hmang cuo hingta kiema kha malie a tingtuotuv ca Khazing ta cuote, Thlaapa kha bietena ta malie a pi.

⁶Cacuonakawta palung cahrana hnyi pari pate, hing pangpa ta ma aw chung bangkhuo hingca Abyipa hneta maa hla tapa kha ma pachang.

⁷Tahematapakieca kiema ca zangna ta hring pate hmungna ta hring va puv.

⁸Palung cahrasa pata aw pate hing ma chuelyi pangpa hing sise pata Abyipa ing lie aw riypa kha maa tlawpa a cuo.

⁹Cacuonakawta hingpa ma ing lie hing ma aw a cuo zaw, khiypa ma ing lie khiy ma aw a cuo zaw, a palung ma patluo riypa khana maa tingpa ta a cuo.

¹⁰Ma bangkhuo hingta Khrih bierina thude hmie luo chiy'a pate, pangpasaa ta ma tuepa, haakhata a chie cuose, a pha cuose ma hmung aa.

¹¹Khazing ciypa hing khaapama a cuo tapa kha ma pachang nakawta malie kha sawle maa zue byalya. Khazing ta a phasa pata malie pachang te, niema zaw kiema kha nama chiephathleduona lie a phasa pata malie nama pachang tapata i nguopuo.

¹²Niema'a lie kha kiema hne kiema maa pathuosa pakhaapa cuo li pata, niema tuv ta malie namaa palesakhyi the riypata cuophaa maca pipa yi tana a cuo. Cakiedyina pathiypalung chung kha mang li pata le luo cuona dyi kha mang te a palepa tie bie kha nama palie the aa.

¹³Ma ngaa kieca, Khazing cuota cuote, ma sing kieca niema cuota a cuo.

¹⁴Tahematapakieca cawsaa bangkhuo cuota cawsaa pakha thiy nakawta cawsaa bangkhuo ta ama thiy ra tapa kha ma pachang khu taata ca Khrih duena khana malie a uv tli.

¹⁵Cawsaa bangkhuo cuota a thiy hnuochuonapa ca, cawsaa hingta ama hring chung hing iema cuo dyi ta hring lipa yi ta, iema cuota thiyna ang te a thupakhaapa cuota ama hringna riypa khatana a cuo.

¹⁶Cacuonakawta, ata taahingta ca, ahunghmuota cawsaa[2] kuo taa dyi ta mang va tli yi puv; Zingsuv kha cawsaa kuo taa dyi ta ma za mang taw zaw ta, ata hing ca cahaa cata mang va tli puv.

¹⁷Ahunghmuota Khrih chunglie a aw kieca cawsaa thaapa tana a cuo: a hringna hlungpa ca chuo tli te, hringna thaapa kha aa pathu tli!

¹⁸Hingpa bangkhuo hing Khazing'a taata na a cuo. Khrih thueta ama hne malie pare sa te, capa a rena re hrie riypa kha kiema ca malie a pi.

¹⁹Khrih thueta Khazing ta chuelyi ming bangkhuo kha ama hne pare sa tli yite, ama suena kha ripa li tlipa yi ta, capa a rena thuophaabie ca ri riypa re kha kiema ca malie a pi.

²⁰Cacuonakawta kiema ca Khrih cuota luosituv cuo pate, kiema hmuo pata Khazing ta niema kha paa aca kie yi. Khazing hneta a re thi ungla tapata kiema ta Khrih cuopa ta paa maca kie yi.

²¹Khazing cawsaa aa dangpa ma cuo riypata suena a hnyi lipa ama kha kiema cuota a suepa ta a pacuo sa.