Read Lautu Chin 2 Korin 7 Bible Online

2 Korin 7 - Lautu Chin bible

2 Korin 7

¹I duepa zaw, kiema ca hingpa biekuona zawdya hing ma hnyi nakawta ima pangpa hne ima thlaapa malie a papya a palyipa bangkhuo taata a pathe ung sala, Khazing ciyzaana hne a pathe pata aw ungsiy.

²Nama palung chunglie malie pari tie ung. Ahung cunglie hmuo suena tue va puv, ahunghmuo para va puv, ahunghmuo ese nutaa va puv.

³Niema ica pasue khing nakaw yi ta i ripa cuo vyi, i ri ciepa haata niema ca thiy kie thiykha hring kie hringkha tapata ma palung chunglie a awpa tana nama cuo.

⁴Ica ri thuophaa pari yi, icaa palesakhyi yi, i hnaa ina panguo sa ungciy, riethyivuosuona ma ang ning zaw i law hryly.

⁵Masidonia luo ma vya chiy khutaa khata hmuo a pahyna cuo hnyi va puv. A kuo ting taata riethyina ma ang. Le luo taata malie a du yite chung luo ta ciyna ma hnyi.

⁶Cuorasala palung a rapa tie zaw hnaanguona a ripa Khazing ta Titas a vya chiyna thueta ma palung hnaa malie a panguo.

⁷A vya chiypa dyi cuo li pata, a hnaanguona nama rina kaw, malie nama vuona kaw, nama ngiechina kaw, kama ina hmung khingnapa kaw zaw ungciy malie a chang tiyta i palung a tluo vie hryly.

⁸Tahematapakieca i caapaphya ta nama ngie aca pachi sa zaw yi ta i capepa kha a ngiepachiy va ang. I caa na nama ngie caa pachi yi tapa kha i pachang tiyta, i ngiepachiy raalaa pata cuokha ta dyi tana a cuo.

⁹Ata hing ca i palung a tluo; nama ngie a chi nakawta cuo li pata nama ngiechina ta a ngiepachiyna luo aa caa chiy nakaw yi ta a cuo. Nama ngiechina ca Khazing khingna haata a cuo nakawta kiema kawlie namaa sungpa aw vyi.

¹⁰Tahematapakieca Khazing khingna haata a ngiechina khata khuona luo a chiykhyipa palung a thlena papya sa te, a ngiepachiy riypa aw vyi. Cuorasala chuelyi ngiechina taca thiyna na a chiykhyi.

¹¹Tahematapakieca Khazing khingna haata ngiechina khata khatluv tama nama palung aca pathu yi, ama sue li na zya kha khatluv tama nama paluo khing, hmangpha lipa nama hmung tiyta, khatluv tama nama palung a pasa, nama thlaa a zang, khatluv tama ina vuo ungciy, khatluv tama a pha lipa a tuetuv kha duo nama te khing, tapa kha rue tie ung. Hingpa kawlie hingta sue va puv tapa kha niema hrahring zaw ta namaa pasie.

¹²Cacuonakawta, niema'a luo caa i vya cape tiyta, pha lina a tuetuv kawlie zaw cuo li pata, pha lina tuena a angtuv kawlie zaw cuo vyi, cuorasala khatluv tama malie namaa khingkhyi tapa kha Khazing hmielie aa luo riypatana a cuo.

¹³Capacana ma hnaanguona ta a cuo. Kiema hnaanguopa dyi cuo vyi, Titas palungtluona cunglie ta maa lawvie hyi. Tahematapakieca niema bangkhuo thueta a palung a diesa laalaw.

¹⁴Titas hmielie kha icaa palesakhyi yi, icaa palesakhyipa haayita niema zaw i hmie na pachi va ungciy. Maca changpa bangkhuo yi hing a hmisipa a cuopa haata, Titas hmielie maacaa palesakhyipa zaw yi hing a hmisipa a cuo tapa kha aa luo.

¹⁵Nama bangkhuo ta pa-uvsathyi ung cate ciyna hne a cathangpuo pata nama cuhluopa kha a rue syalya pakhaa tiyta a pathiypalung hing niema'a luo dyina a aw.

¹⁶I pathiypalung bangkhuo ta caa buchuo yi ang te i palung a tluo hringhruo.