Read Lautu Chin 2 Korin 9 Bible Online

2 Korin 9 - Lautu Chin bible

2 Korin 9

¹Mingpathepa tie cuota rehrie riypa kawlie niema'a luo caa cape a hu tapata rue va ang.

²Tahematapakieca, cawsaa a bya nama khingna zya kha i pachang tli nakawta niema kaw kha Masidonia tie'a lieta ica vaa palesakhyi tli yi. Akhaia tie ca ahuo kung ning taakhata a bya riypata a ting pacie pata ama aw tli a ta yi. Capa niema palungthuna cata cawsaa hluvpuv palung a pathu sa yi.

³Cuorasala capa kawlie cata maacaa palesakhyina yi kha a hripa a cuo li riypata, a ting pacie pata nama aw riypata, uvnu zaw kha i vya pathlie yi.

⁴Cata cuo li pata, Masidonia tie ta kama kha na vya ziy yi sala a ting pacie pata nama aw lipa kha aca hmung kie yi ca, hingpa kawlie hing niema dyi cuo li pata kiema zaw kha ma nang a zaasa aa.

⁵Cacuonakawta uvnu zaw kha niema'a luo vya pathlielupa yi ta, pi riypata bie namaa kuo ciepa lasaw kha pahmyalu aa hu tapata i rue. Cahaa cata i vya chiy tiyta ting cie pata za aw'a te, hripuo pata pipa cuo li pata palung thusa pata nama pipa lasaw a cuopa kha aa luo aa.

⁶Saciy a cawta dyi a vaapa ca thyipaa a cawta dyi pahriy'a te, a hluvpuv ta a vaapa ca a hluvpuv a pahriy aa tapa kha maw kha ung.

⁷Ahung nama cuo zaw, nama palung lie namaa thli na zaa khata pi tie ung, ngie a buopuo pata pi kha se, pi lisa pha vyi tapata pi kha se, tahematapakieca palungtluosa pata a pipa tie khana Khazing ta a due yi.

⁸Khazing ca namaa huna laata a hlyi ta thluechiy phangting caa pi khutuv yi cuote, hmangting kha aa de pata hnyi'a ung cate, hmangpha tuena phangting lie kha a bya khutuv nama cuo aa.

⁹Caapathepa ta, “Pahyasa pata siypasa tie kha pi yite, Aa dangna ca chuozaa ta aa hmang,” a ta.

¹⁰Saciy a vaatuv kha vaa riypa saciy hne ning riypa sa a pituv ta nama vaa riypa saciy kha a hluvsa ta ca pi'a yite, namaa dangnapa thyipaa kha a hluvsa aca pahriy sa'a yi.

¹¹Pahyasa pata a hluvsa nama pi khu riypata Khazing ta aaky-aacasa pata aca pahring sa'a yi. Kiema'a taata ama hmungpa nama lasaw nakawta iema ta Khazing ama pathuo sa aa.

¹²Tahematapakieca, hing re nama hriepa hingta mingpathepa tie amaa huna dyi kha aa byapa yi ta cuo li pata Khazing'a luo palungtluona bie rina zaw kha a hluvpuv a pa-aw sa.

¹³Hingpa re nama hriena lieta, Khrih thuophaabie nama cuhluopa kha ri-angiena hneta nama hringkhyinapa hne mingpathepa tie hne cawsaa hrangpa tie cuota pahyasa pata nama pinapa khata Khazing kha a parungnaa sa.

¹⁴Khazing vihnyina a hlyi ta nama cunglie a tlung nakawta aca vuosa puo pa yi ta nama cuota thlaa ama chuo.

¹⁵Ri diy khu a aw lipa a lasaw thue khata Khazing ca a law pata cuo mangsue.