Read Lautu Chin Galati 2 Bible Online

Galati 2 - Lautu Chin bible

Galati 2

¹Kung hraa hlyipaliy khu taata Jerusalem luo kha Barnabas hneta khaw pakhaa pate, Titas kha i chiyle.

²Biephu a aw nakawta i khaw pata a cuo. I hrie nguoluopa hne i za hriepa zaw bangkhuo kha a cakhawpa cuovyi tapa ama pasie na riypa ta, Jentail ming hrawlie i za phupa thuophaabie kaw kha ama uvthyi zaw hne pangpa ta maa tawna lie i chang yi.

³Kama hne a awpa Titas khahmuo Krik ming a cuo raalaa pata vangdaw a te riypata hripuo va ang.

⁴Zangtuv pakhipa[2] chekha ca Khrih Zingsuv zangna thueta ma hnyipa hyazangna kawlie kha sii ta malie amaa ziy pakhaa khing nakawta kiema chung luo kha a paruv ta dya amaa vya ngie.

⁵Thuophaabie hmisipa kha niema'a lie aa hmang riypata, iema kha sungkhata hmuo a pate sa vayi puv.

⁶Cawsaa ta pachangpa uvthyi tie khata ruena suokha hmuo na pi vayi. Iema hingta i cuota a nanangna ina pipa yi aw vyi; Khazing ca hmiemang pata pahlyipalena tue vyi.

⁷Cahaa cata ruena pi changchiy ca, Piter ca Khazing ta vangdaw a tepa tie'a luo thuophaabie phu riypata hrievu a pipa haakhata kama kha vangdaw a te lipa tie'a luo thuophaabie phu riypata hrievu ina pipa kha a hmungtuv ta ama cuo.

⁸Tahematapakieca Khazing ta Piter kha vangdaw a tepa tie'a luo thuophaabie phu riypata lucuotuv ta a tuepa haata kama zaw kha vangdaw a te lipa tie'a luo lucuotuv ta ina tue ra.

⁹Luochiytuv a tungpuv vie ta ripa Jeim hne Piter hne Johan ta Khazing ta ina pipa vihnyina kha ama hmung tiyta rehriehne tana ma cuo tanapa paluosana ta Barnabas hne kama kha ma kuv malie amaa buo. Kiema kha Jentail ming'a luo si riypa hne iema kha vangdaw a tepa tie'a luo si riypata ma palung a tling.

¹⁰Iema ta malie ama patue sa khingpa suokha ca cawsaa siypasapa tie kha a thyi riypa cuote, capaca kama ta temaa pata i hrie khing paripa re ta a cuo.

¹¹Cuorasala Antiok luo Piter a vya chiy tiyta, a paana kawlie kha hmiedesuo ta sue i phaw.

¹²Tahematapakieca Jeim ta a vya pathliepa cawsaa zaw ama vya chiyna te khata ca Jentail ming hneta sa a ning pakhaw taw. Cuorasala iema ama vya chiy khu taata ca vangdaw a tepa phuv kha a ciy nakaw yi ta hnang luo dya a saw te amata tah a aw.

¹³Judah ming hrangpa tie zaw ta ama kha dya a hlaw yite, iema phahruocuona kawlie khata Barnabas zawte kha luo ama pasi sa chie ra.

¹⁴Cuorasala thuophaabie hmisipa haata ama ziy lipa kha i hmung tiyta cawsaa bangkhuo hmielie, Piter kha, “Judah ming na cuo thluo pata Judah ming haata aw li pata Jentail ming haata na aw kieca, tuokhaatama Jentail ming ca Judah ming haata aw riypata na hripuo khu'a yi?” i ta.

¹⁵Kiema ca ma thukina hrahring ta Judah ming cuo pate Jentail ming, a suepa tie ta cuo va puv.

¹⁶Cuorasala cawsaa hing phungbie ziyna thueta cuo li pata Khrih Zingsuv zangna thue tana duopacupa ma cuo tapa kha ma pachang. Kiema ca phungbie ziyna thueta cuo li pata, Khrih zangna thueta duopacupa cuo riypatana Zingsuv Khrih kha ma zang. Tahematapakieca ahunghmuota phungbie ziyna thueta duopacupa cuo the'a vayi.

¹⁷Cuorasala kiema ca Khrih thueta duopacupa cuo riypa maa zue nguoluo pata a suepa ma cuopa kha malie ama hmung kieca, Khrih ca suena a papungpazaa sa pata a cuo'a ma? Cuo changchiy vyi!

¹⁸I za phi ciepa hmang kha i sa pakhaa kieca, kama ca phungbie a parapa i cuopa khana i paluo sa.

¹⁹Tahematapakieca Khazing'a lie hring riypata phungbie thueta phungbie lieca i thiy tli. Zingsuv hne vieluo lie taa hnepa ta cuo ang te,

²⁰ata a hringpa hing kama ta cuo va ang, i chunglie a hringpa Khrih tana a cuo. Ata saapa ta i hringpa zaw hing na due te i cuota a pipa Khazing Saacapaa i zangna thue tana a cuo.

²¹Khazing vihnyina i para pata cuo vyi; phungbie thue tana duopacuna[3] aa vaw tapata a cuo kieca, Zingsuv ca a cakhaw pata a thiypa tana a cuo aa.