Read Lautu Chin Galati 4 Bible Online

Galati 4 - Lautu Chin bible

Galati 4

¹I ri khingpa ca hinghaahingtana a cuo: rucutuv riypa kha kung tlingpa a cuo hluo taca hmangting bangkhuo kha a hnyituv cuorasala sii hne aahlyi-aalena aw vyi.

²A paa ta a tingpa pa cuo a tling hluo li bangkhuo ca mangchiytuv kuv cunglie khana a aw.

³Cacuonakawta, kiema zaw kung tling lipa ma cuo chung ca chuelyi hmang a uvtuv thlaapa sii tana ma cuo.

⁴Cuorasala cuo a vya tling tiyta ca Khazing ta a Saacapaa a za pathlie. Canung chung taata phungbie rawlie a puv.

⁵Phungbie rawlie a awpa tie a thla riypa hne kiema kha Khazing saata ta ma cuo thena riypata a cuo.

⁶A saata ma cuo nakawta, Khazing ta Thlaapa kha ma[5] pathiypalung chung luo za pathlie te, capa Thlaapa cata, “Abba![6] I Paa!” tapata a u.

⁷Cacuonakawta niema ca sii ta cuo va tli ungciy, cuorasala saata tana nama cuo. Khazing saata nama cuo tli nakawta rucutuv zaw nama cuo.

⁸Hluoning, Khazing nama za pachang hluo ca, Khazing a cuo lipa tie sii ta nama za cuo.

⁹Cadyiseca, ata hing ca Khazing kha pachang tli ung cate, Khazing zaw ta aca pachang tli yi. Tuokhaatama a thaazuo dyapa, thlahnena a hnyi lipa thlaapa tie'a luo ca namaa pali aa? Tuokhaatama iema sii ca nama cuo pakhaa khing?

¹⁰Niema ta ning pa-ipa, thla pa-ipa, khycuo pa-ipa hne kung pa-ipa hnyi ung cate nama uv.

¹¹Nama cuota i hriepa re hing paviepavuv lie ungciy tapa na i thlaa a zangsa.

¹²Viesaa zaw,[7] kama haahingta cuo ra ung tapata paa ica kie yi, tahematapakieca kama zaw niema haatana i cuo tli. Kama'a lie nama paanapa aw vyi.

¹³A yikhanapa niema'a lie thuophaabie i za phupa ca pangpasaa lie i tluo li nakawtana a cuo tapa kha nama pachang.

¹⁴I tluo lipa ca niema cuota hmangriy a cuo raalaa pata, na za ese lipa ung cata na za mangbung va ungciy, cuorasala Khazing avuoming haata hne Khrih Zingsuv haata ina za cuhluo ungciy.

¹⁵Nama za hnyipa palungtluona kha tuokhaatama aa tue tli? Cuo the sala nama ming hmuo cakhyi pata ina pi khing ungciy tapa kha kama pangpa ta i ri nguo.

¹⁶Biehmisipa ica chang nakaw yi ta nama carie ta a li kanaa ang?

¹⁷Cawsaa chekha ta a caa khingkhyi laalaw yi, cuorasala amaa tingpa ca pha vyi. Niema kha kiema'a taata che pata iema'a luo kuo dyi a daa riypata aca khing yi.

¹⁸Cahaa cata a khingkhyina ca a tingna phapa hne a cuo kieca niema'a lie i aw ning dyi cuo li pata cipari ta a pha.

¹⁹I duepa i saata zaw, Khrih kha nama chunglie a aw hluo li chung bangkhuo ca nu pazipa haa khatana pasana ca i ang pari aa.

²⁰Ata hing niema'a lie aw ang sala i ryikaa zaw hing thle khu angse tapa i khing sa; nama cuota na i palung rie a thyi hringhruo.

²¹Phungbie rawlie a aw khingpa tie zaw, na chang tie ung, phungbie ca ziy'a va ung cama?

²²Caapathepa ta, Abraham ca saacapaa pahning hnyi te, pakha ca siizaanung hneta a hnyipa cuote pakha ca hyazang pata a aw nung hneta a hnyipa a cuo.

²³Siizaanung saacapaa ca saapa ta sapa cuote hyazang pata a aw nung saata ca biekuona thueta sapa a cuo.

²⁴Hingpa hing pakhingpuona ta a cuo: Hingpa canung pahning hing biekuona suohning ta ama cuo. Biekuona suokha ca Sinai Tluo taata pipa cuote, a saa zaw ca sii cuo riypata a sa yi. Caca Hagar ta a cuo.

²⁵Hagar ca Arabia ruo lie a awpa Sinai Tluo tanata cuote atalie ta a saa zaw hneta sii a cuo nguoluopa Jerusalem hing a ri khingnapa tana a cuo.

²⁶Cuorasala canung hrangpanung ca cungluo a awpa Jerusalem kha a ri khingpa ta cuote; ama ca hya a zangpa kiema ma nung tana a cuo.

²⁷Tahematapakieca Caapathepa ta, “Nama a cing nung, saa a sa buo li nung, a law tie, Nupazi pasana a ang buo li nung, hlaa sa la u tie; Tahematapakieca thawpa nung ta a sapa saata zaw khana a vaapa hne a aw nung saata zaw laata a hluv vie'a yi,” a ta.

²⁸Uvnu zaw, niema ca biekuopa saata, Isak haatana nama cuo.

²⁹Cuorasala saapa ta sapa saata ta Thlaapa ta sapa saata kha a hrisaathieruepa haata ata zaw hing a cuo.

³⁰Cuorasala Caapathepa ta tuokhaatama a ri? “Siizaanung hne a saacapaa kha a cade tie ung; siizaanung saata taca hyazang pata a aw nung saata hneta ru cu hnepakhaw khu'a vyi,” a ta.

³¹Cacuonakawta, uvnu zaw, kiema ca siizaanung saata ta cuo va puv, hyazang pata a aw nung saata tana ma cuo.