Read Lautu Chin Galati 5 Bible Online

Galati 5 - Lautu Chin bible

Galati 5

¹Khrih ta hya malie a pazang sa nakawta hya a zangpa tana ma cuo. Cacuonakawta, a cu pata a daa ungla sii taca a li pakhaa kha ung.

²Naathlie tie ung! Kama Paul na caa chang yi ang. Vangdaw kha namaa te kieca Khrih ca nama cuota thlahnena khaahmuo hnyi'a vyi.

³Ica chang pakhaa yi, vangdaw a tepa taca phungbie kha a bangkhuo ta a ziy riypa a cuo.

⁴Phungbie ta duopacuna hmung a khingpa ca niema hne niema kha Khrih'a taata a chepa tana nama cuo; Khazing vihnyina khungthing luo a awpa tana nama cuo.

⁵Tahematapakieca, kiema ca Thlaapa thue tana zangna ta adangna kha ma hmung aa tapata a nguopuo pate a ngietie li pata ma huo.

⁶Tahematapakieca, Khrih Zingsuv chunglie a hringpa tie cuota ca vangdawtena cuose, vangdawtelina cuose khaapahmuo thlahne vyi; a thlahnepa suokha ca duena ta re a hriepa zangna suokha kyalya khana a thlahne.

⁷Nama si zya a za phasa thluo. Biehmisipa ziy kha ahungma caa thlu yi?

⁸Cahaapa dungna ca caa kutuvpa yi Khazing'a taata ca cuo vyi.

⁹Thiynung a cawta tah viedie nawkha bangkhuo kha a pathu sa.

¹⁰Ruena hrang hnyi'a va ungciy tapata ica zang yi. Cuorasala ahung a cuo zaw nama palung caa paluolue sapa yi hing ca a suena muo a hmung aa.

¹¹Cuorasala, uvnu zaw, vangdaw te hing a hu thluo tapata i ri kalie kieca, khaapanakawma hrisaathieruena ca i ang pari thluo? Hinghaahingtana i za ri tapata a cuo kieca vieluo kaw i ripa hing cawsaa aliena ta cuo'a vyi.

¹²Caa patawpahriepa tie hing ama tiy a lu lalue yi sala a pha'apa kha!

¹³Uvnu hne sieta zaw,[8] niema ca hya a zangpa cuo riypatana kupa nama cuo. Capa nama hyazangna ca saapa khingtlingna cuo dyi ta hmuo kha ung. Cuorasala pakha hne pakha kha duena ta a mangsang tie ung.

¹⁴Tahematapakieca phungbie bangkhuo ca, “Nama naa duepa haata na ingpaa kha due ra tie,” tapa phungbie suokha lie hingna a tling diy.

¹⁵Cadyiseca, niema pakha hne pakha kha namaa hru namaa i kieca pakha hne pakha namaa parapakyi diy sue aa tapa kha a cadang tie ung.

¹⁶Thlaapa ta hring ungla saapa khingna kha a lunghruo patlung kha ung.

¹⁷Tahematapakieca saapa khingna ca Thlaapa khingna ta a du te, Thlaapa khingna zaw kha saapa khingna ta aa du. Iema hing amaa carie nakawta na khingpa kha tue khu vaciy.

¹⁸Cuorasala Thlaapa ta acaa chiy kieca phungbie ta ca uv va tli.

¹⁹Saapa khingna a tuepa tie ca amaa luotaalaa thluo: aparuvsuena, a pyalyipa zyazaa, zyazaa pha lipa,

²⁰kuvtuezuv biena, ca-iena, huena, ahru-a-ina, karuo-awna, hihaana, a-i-achuena, a chena,

²¹hietliena,[9] sahmyisahmaa pariyna, pariy cangta khi-una, hne cahaapa hmang zaw cata ama cuo. A raaringna ica za pi tlipa haayita, ica pi pakhaa yi: hinghaapa hmang a tuepa tie ca Khazing pena cu'a vayi.

²²Cuorasala, Thlaapa thyipaa tie ca, duena, palungtluona, diena, palungpasiyna, malie ngiechina, pahyana, zangtluo atlana,

²³nangnena hne kiema hne kiema a uv khuna zaw ta ama cuo. Hingpa hmang zaw hing a dupa phungbie aw vyi.

²⁴Cakhutaata Khrih Zingsuv huopa ta a cuopa taca a saapa hne saapa khingna bangkhuo kha vieluo lieta a thie tli.

²⁵Thlaapa ta ma hring kieca, Thlaapa ta luo malie a chiy se.

²⁶Ahruo tle kha ungsiy, pakha hne pakha azue-atie kha ungsiy, pakha hne pakha hie a tliena hnyi kha ungsiy.