Read Lautu Chin Galati 6 Bible Online

Galati 6 - Lautu Chin bible

Galati 6

¹Uvnu zaw, cawsaa pakha ta suena a tuepa kha nama hmung kieca niema Thlaapa a tingpa tie ta ama kha nangnena hneta luodangpa luo a chiy tie ung. Pasupaliyna luo nama chiy li riypa zaw a raaring tie ung.

²Pakha hne pakha hmangriy a phyakhyi ungla cahaa cata Khrih phungbie kha patling sa tie ung.

³Khaahmuo cuo tlung li pata cawsaa ciemuopa ta a ruepa tie ca iema hne iema a dungpa tana ama cuo.

⁴Cawsaa bangkhuo iema'a na ama tuehriepa kha a mangpasie yi se. Malie tuehriepa hne pakhingpuo a hu li pata niemata tah nama palung a tluo aa.

⁵Tahematapakieca cawsaa bangkhuo ta kiema hmang cyicuo kha phya riypatana a cuo.

⁶Khazing bie pacuv pata a cuopa tie ca hmangpha ama cupa bangkhuo kha pacuvtuv hneta amaa hraw riypatana a cuo.

⁷Ahungtahmuo ca dung kha yi se; Khazing ca dung khu riypa cuo vyi, na vaapa haa khatana na pahriy aa.

⁸Na saapa cuona pata na vaa kieca, saapa taata rana kha pahriy'a cate, cuorasala, Thlaapa ta na vaa kieca, Thlaapa taata a vawpa chuozaa hringna kha na pahriy aa.

⁹Hmangpha tue riypa kha thaachi li pata aw ungsiy. Taw li ta maa zue kieca a cuo aa de tiyta thyipaa kha ma pahriy aa.

¹⁰Cakhutaata, cuophaa ma hnyi tiy mekaa ta cawsaa bangkhuo cuota hmangpha tue kha a zue ung sala, a hlyi vie ta zangna luota ma chungkhuekha tie cuota a zue ungsiy.

¹¹I kuv hrahring ta caasuo pang-katupa ta i capepa caa hing mang tie ung.

¹²Saapa lie mingphana a hmung khingpa tie ta niema kha vangdaw a te riypata aca pasu yi. Capaca Khrih vieluotaana kawlieta hrisaathieruena ama ang li riypata ama tuepa tana a cuo.

¹³Vangdaw a tepa tie tahmuo phungbie kha ziy vayi, cuorasala niema kha vangdaw aca pate sa khingpa yi ca nama saapa phung ziyna kawlieta amaa pale khing nakawtana a cuo.

¹⁴Kama ca ima Byipaapa Zingsuv Khrih vieluo kaw ri li pata khaapa kawlie hmuota a pale'a va ang, Khrih vieluo thue hingta chuelyi ca i cuota vieluo lie khepuopa cuo tli te, kama zaw chuelyi cuota vieluo lie khepuopa i cuo tli.

¹⁵Tahematapakieca[10] vangdaw tepa hne te lipa hing a biepuvpa ta cuo vyi, sathaapa cuona hingna a biepuvpa ta a cuo.

¹⁶Hingpa phung a ziypa tie cunglie hne Khazing cawsaa zaw cunglie diena hne nangduena aw mangsue.

¹⁷Ata taahingta pathu pata ahungtahmuo riethyi na pi kha tli se; tahematapakieca Zingsuv hmaa hne hmaadaa kha i pangpa cunglie caakhepuopa ta a cuo.

¹⁸Uvnu hne sieta zaw,[11] Abyipa Zingsuv Khrih vihnyina ca nama palung chunglie aw mangsue. Amen.