Read Lautu Chin Efesaa 2 Bible Online

Efesaa 2 - Lautu Chin bible

Efesaa 2

¹Niema ca nama pha li nakaw hne nama sue nakawta thlaapa luota thiyna chunglie nama za aw.

²Chuelyi phungluo pha lipa kha cuose, alyi hne avuo a lala thliy chunglie cahrana a hnyipa uvtuv kha cuose, ri a ngie lipa tie hrawlie re a hrie nguoluopa thlaapa kha cuose nama za ziy.

³Kiema bangkhuo zaw hing iema hrawlie kha saapa khingna ziypa ta za aw pate, iema zaw bangkhuo haakhata Khazing hihaana a ang riypatana ma za cuo.

⁴Cuorasala, nangduena ta a bipa Khazing ta, a lesapa kiema malie a duenapa khata

⁵ma pha lina kawlieta a thiy tlipa kiema kha Khrih hneta malie a pahring sa pakhaa. Khazing vihnyina thueta khuopa tana nama cuo.

⁶Khrih Zingsuv hneta malie pathu pakhaa te ama hne vuoruo lie byi cuo hne riypata malie a patu hne.

⁷Cahaa cata Khrih Zingsuv thueta kiema malie a duena hne a vihnyina ca khatluv tama a le tapa kha a vaw riypa chuo lie zaw pahmung sa a khing.

⁸Tahematapakieca niema ca vihnyina thueta zangna ta khuopa tana nama cuo. Niema nama tuena thueta cuo vyi; Khazing lasaw tana a cuo.

⁹Hriena thueta a cuo li nakawta ahunghmuo a pale kha se.

¹⁰Tahematapakieca kiema ca Khrih Zingsuv thueta re phapa hrie riypata sapa tana ma cuo. Cahaapa hringzya hnyi riypa cata Khazing ta a pare paciepa tana ma cuo.

¹¹Niema ca a hluo taca saapa cuona ta Jentail ming za cuo ung cate, saapa lie cawsaapa kuv ta vangdaw a tepa tie ta vangdaw a te lipa aca za tapa yi kha maw kha ung.

¹²Capa ning ca Khrih hne a patuvna za hnyi lipa ung cata, khyche za cuo ung cate, Israel mingphang chunglie zaa te ra va ungciy. Khazing pipa biekuona hne zaa hla ung cate hing chuelyi lie hing a nguopuona hnyi li pata hne Khazing hnyi li pata nama za aw.

¹³Cuorasala hluo ningta luohlaapuv luo zaa aw tawpa niema ca Khrih thiyse thueta a ngieta luo kupa nama cuo tli.

¹⁴Tahematapakieca ama ca kiema ma diena ta cuote, Judah ming hne Jentail ming kha ama pangpa hrahring ta pangkha ta a pacuo sa yi. Iema a chetuv yi lungruetlepie, amaa lala lie a awpa huena kha a pacing.

¹⁵Ama ta phungbie kha a nawbie hne a phungluo bangkhuo hne khata para te, mingphang phanghning kha ama thueta mingphang thaapa phangkha ta sa yite diena a tue.

¹⁶Vieluo cunglie a thiyna thue khata amaa cariena kha pachuo sa te, ama phuvhning khata Khazing'a luo pangkha cuo riypata a vya chiy yite a pare yi.

¹⁷Cacuonakawta, ama ca a vaw te niema luohlaa luo a awpa tie hne luongie lie a awpa tie'a lie kha diena thuophaa ca a u khyi.

¹⁸Cacuonakaw, Khrih thueta ima phuvhning hingta Thlaapa pakha chunglie a taw pate Paa hmiekung luo ma chiy.

¹⁹Cahaa cata niema ca khyche hne ruohrang ming cuo va tli ungciy, mingpathepa tie hne khata ruokha cawsaa cuo tli ung cate Khazing chungkhue cawsaa zaw tana nama cuo.

²⁰Lucuotuv tie hne profet tie bang ciepa inghruo lie sapatuepa cuo ung cate ingkiy tung ca Khrih Zingsuv ama hrahring khatana a cuo.

²¹Ingkha bangpa khata Khrih chunglie ca a patue diy te, Abyipa thueta a pathepa biena-ing ta a li te a lethaw.

²²Ama hne namaa pazuena thueta niema zaw hing Khazing awna ing cuo riypata thlaapa ta sapakhawpa nama cuo.