Read Lautu Chin Efesaa 4 Bible Online

Efesaa 4 - Lautu Chin bible

Efesaa 4

¹Cacuonakawta, Abyipa rehriena kawlie thaw a tlapa kama ta, Khazing ta aca una yi hne aa phuvpa hringzya kha hnyi tie ung tapata paa ica kie yi.

²Rawcanawna hne palungnena hne palungsyina ta pakha hne pakha kha duena chunglie ta a ngiethe tie ung.

³Diena chunglie sawpakhawpa thlaapa chunglie pangkha cuona kha nama pahmang khuna riypata nama cuo khuna chung ta a zue tie ung.

⁴Niema ca aca ku tiy yi ta a ruechuona suokha chung luo kha kupa nama cuopa haata, pangpa suokha dyi aw te Thlaapa suokha dyina a aw.

⁵Abyi pakha, zangna suokha, tiynawna suokha dyina a aw.

⁶Khazing pakha dyi aw te cawsaa bangkhuo Paa, hmangting bangkhuo cunglie Byi, hmangting bangkhuo chunglie rehrie te hmangting bangkhuo chunglie a awpa tana a cuo.

⁷Cuorasala kiema pakha cyicuo hing Khrih ta malie a pipa lasaw zi haakhata vihnyina pipa tana ma cuo.

⁸Cacuonakawta, Caapathepa ta, “Abyipa ca a suona luo kha a kie tiyta patuvpa sii a hluvsa kha kiekhyi yite; A cawsaa kha lasaw a pi yi,” a ta.

⁹(“A suo luo kie te,” a ta tiyta, a ri khingpa khaapatama a cuo? Abyipa ca aa nepa alyi luo na a za cung tanapa ta cuo vama?

¹⁰A raw luo zaa cungpa khana hmangting bangkhuo patling sa diy riypata avuo laata a suo viena luo kha a kie.)

¹¹Abyipa ta malie a pipa lasaw ca: chekha kha lucuotuv, chekha kha profet, chekha kha thuophaabie phutuv, chekha kha pastor hne chekha kha saya ta cuote,

¹²mingpathepa tie ta Khazing re kha hrie the'a yite Khrih pangpa kha ama sathaw na riypata a cuo.

¹³Caca zangna hne Khazing Saacapaa pachangna lie kha suvkha ta a tawpakhaw diy pata Khrih a cuona zaa khata a puvtlingpa ma cuo na riypata a cuo.

¹⁴Kiema ca a zyatepa tie dungna hne pacuvna, tiylaw hne thliychie haata a tapa chunglie duvkhing ta pazu bungthawpa, haatiyta haata cuo kha ungsiy.

¹⁵Cuorasala, biehmisipa kha duena ta ri ung sala, ma luv ta a cuopa Khrih chunglie kha a kuoting ta lethaw ungsiy.

¹⁶Luv a cuopa Khrih rawlie ca pangpa chebuo bangkhuo ca thariytha-uo hne cakhiycabuo bangkhuo khata aa rawsa pata pazue diy yite pangkha ta ama cuo. Pangpa chebuo bangkhuo ta iema hrie riypa re kha a phasa pata ama hrie tiyta pangpa suokha yalya khata duena chunglie a lethaw.

¹⁷Abyipa ming ta a cusa pata bie ica cung yi: Zanglituv tie ama awpa haata nama aw riypa cuo va tli. Iema ruenapa ca a hripa tana a cuo.

¹⁸Ama pathiypalung kha a zing. Ama pachang li nakaw hne ama palung a cuo tuv nakawta Khazing pipa hringna taakhata amaa hla.

¹⁹Nangzaa pachang li pata hne a cadangna hne a angna hnyi nguocuo li pata, mang a ngie lipa suena phangting kha ama tue.

²⁰Khrih phungluo namaa cuvpa ca cahaa cata cuo vyi.

²¹Zingsuv chunglie a awpa biehmisipa haakhata, pacuvpa cuo ung cate a kaw kha nama thyi hmisi mangtli.

²²Hietliena ta dung te a parapa nama hringna hlungpa kha thuse riypata pacuvpa tana nama cuo.

²³Nama pathiypalung hne nama ruena lie kha sathaapa nama cuo riypatana a cuo.

²⁴A hmisipa a dangna hne pathena lie Khazing hmingsuo a lu pata sapa hringna thaa kha a hryi tie ung.

²⁵Cacuonakawta, hanghiena bie ri kha tie ung. Ma ingpaa tie kha biehmisipa chang kaluo ungsiy. Tahematapakieca chungkhue cawsaa tana ma cuo ung.

²⁶Na hi hmuo haa ra sala sue tuena te ta cuo kha se. Na hihaa cangta ning patla sa kha.

²⁷Setaa kha cuo pi kha.

²⁸A paruvthepa ta paruv kha tie se. Riethyivuosuopa tie zaw a bya khu riypata ama kuv hrahring ta a dangna hne re hrie yi sala viehlue hriy yi se.

²⁹Nama pakaa taata biechiepa pya kha se. Cuorasala a thyipa tie kha thlahnena a pi riypa hne amaa huna lie a sathawpa[2] a cuo riypata biephapa dyi kha ri tie ung.

³⁰Khuona ning thue cuota nama caakhena ta a cuopa Khazing Thlaapa Pathe kha a ngie pachi kha ung.

³¹Huena, hihaana, bie a ina, bie a pachiena hne pathiypalung pha lipa bangkhuo kha thaw diy tie ung.

³²Zingsuv thueta Khazing ta acaa ngiethe[3] pahaa yi khata nangnena hnyi ungla pakha hne pakha kha a due ungla a ngiethe tie ung.