Read Lautu Chin Efesaa 5 Bible Online

Efesaa 5 - Lautu Chin bible

Efesaa 5

¹Cacuonakawta, Khazing ta a duepa saata zaw nama cuo pahaata, ama haata hring riypa kha a zue tie ung.

²Khrih ta malie a due[4] nakawta rangpa-uepa hriykhung a rina ta Khazing'a luo aa pipa haata duena chunglie hring tie ung.

³Niema ca Khazing mingpathepa nama cuopa haata, nama hrawlie kha aparuvsuena kaw, a pathe lipa hmangting kaw, karuo-awna kaw tapa zaw ca a ri hmuo ri kha ung,

⁴Bie pyalyipa, biechiepa hne chiephu bie zaw ca nama ri riypa hehmuo cuo vyi; capa zaw ri cuopa cata Khazing kha pathuosa tie ung.

⁵Aparuvsuena a tuepa, mang a ngie li pata a hringpa hne a karuo-awpa tie (karuo-awna ca kuvtuezuv biepa hne tana aa lu) ca Khrih hne Khazing pena lie ru cu riypa khaahmuo hnyi'a vayi tapa kha nama pachang.

⁶Ahungtahmuo siyluo a hnyi lipa bie ta ca dung kha yi se. Hingpa zaw kawlie hingtana Khazing hihaana ca ri a ngie lipa tie cunglie a tlung.

⁷Cacuonakawta iema kha a khe kha ung.

⁸Ahluo taca zingna za cuo ung cate, cuorasala ata hing ca Abyipa thueta khena tana nama cuo. Khena saa haakhata hring tie ung.

⁹Tahematapakieca, khena thyipaa ca phana, adangna hne a hmisipa lie tana hmung pata a cuo.

¹⁰Abyipa palung a patluopa hmang kha tue a zue tie ung.

¹¹Hmangpha a chiykhyi lipa zingna hmang tuena lie kha aw ra kha ung, a phu tuv khata phu hriy tie ung.

¹²Tahematapakieca cahaapaapa cawsaa zaw ta a paruvta ta ama tuepa hmang ca a ri ta ri riypa khiy tahmuo nangzaa na a chiy.

¹³Cuorasala khena ta a paluosapa bangkhuo ca hmung khupa ta vya cuo yite,

¹⁴hmung khupa ta a vya cuopa bangkhuo ca khena ta ama cuo. Cacuonakawta, Caapathepa ta, “Aa hmung nguoluopa, kya thu tie! Thiyna taata kya thu la, Cakhutaata, Khrih ca na cunglie a khe aa,” a ta.

¹⁵A ngaapa haata cuo li pata a singpa haata tuokhaatama ma hring aa tapa kha a raaring pata aw tie ung.

¹⁶Ma ningkhue hing cuochieningchiepa a cuo nakawta nama hnyipa cuo kha a phace pata hmuo a zue tie ung.

¹⁷Cacuonakaw a ngaapa cuo kha ung, cuorasala Abyipa khingna hing khaapama a cuo tapa kha pachang a zue tie ung.

¹⁸Sahmaa pariy kha ung, tahematapakieca anuopaluena tana a cuo. Cuorasala Thlaapa ta bi tie ung.

¹⁹Saam hlaa, khrihsaa hlaa hne pathuosana hlaa kha niema hrawlie nama sapa haata, Abyipa kha hlaa ue puvthepa ta nama pathiypalung hmisi ta pathuosa tie ung.

²⁰Hmangting kawlieta Paa Khazing kha ma Byipaapa Zingsuv Khrih ming ta cipari pathuosa tie ung.

²¹Khrih nama pa-uvsathyina ta pakha hne pakha kha nama ri a ngie tie ung.

²²Napuvnung zaw Abyipa ri namaa ngiepa haata nama navaapa ri kha a ngie tie ung.

²³Khrih ca khrihsaabuv luv a cuopa haata, navaapa ca napuvnung luv tana a cuo. Khrih ca khrihsaabuv khuotuv cuote khrihsaabuv ca a pangpa ta a cuo.

²⁴Khrihsaabuv ta Khrih ri kha a ngiepa haata napuvnung zaw ta hmangting kawlie kha navaapa ri a ngie riypatana a cuo.

²⁵Navaapa zaw, Khrih ta khrihsaa-buv kha due te a hringna a pipa haata nama napuvnung kha due tie ung.

²⁶Hinghaahingta a tuepa ca khrihsaabuv hing Abyipa bie ta tiy chunglie pasiy pata a pathe sapa tana a cuo.

²⁷Cahaa cata khrihsaabuv ca apya-alyipa aw li, ahlaw-akaapa aw li, athli-abiyna aw li, a pathepa hne risie riy aw li pata rungnaana chunglie a kuv luo pi riypa a khing nakawta a cuo.

²⁸Cahaa cata navaapa ta ama pangpa aa duepa haata napuvnung kha a due riypatana a cuo.

²⁹Ahungtahmuo ama pangpa kha a hue buo vyi, cuorasala Khrih ta khrihsaabuv cunglie a tuepa haata a phasa pata a mangsang riypatana a cuo.

³⁰Tahematapakieca, kiema ca a pangpa chebuo[5] tana ma cuo.

³¹Cacuonakawta capaa ta a nung hne a paa kha thuse'a yite, a napuvnung hne khata a hlaw'a te, iema pahning ca pangkha ta ama cuo aa.

³²Hingpa hing a lesapa bieparuv cuote, kama ta Khrih hne khrihsaabuv khana a ri khing ica ta yi.

³³Cadyiseca, niema pakha cyicuo ta niema pangpa namaa duepa haakhata nama napuvnung kha due ungla, napuvnung zaw ta navaapa kha pa-uvsathyi tie ung.