Read Lautu Chin Filipi 1 Bible Online

Filipi 1 - Lautu Chin bible

Filipi 1

¹Khrih changtaapa[1] ta a cuopa Paul hne Timote ta, Filipi khy lie a awpa Khrih Zingsuv chunglie mingpathepa tie bangkhuo hne, pastor tie hne khrihsaa uvthyi tie'a luo kha caa maca paphya yi.

²Ma Paa Khazing hne Abyipa Zingsuv Khrih'a taata vihnyina hne diena ca niema'a lie aw mangsue.

³Icaa thyi kyry yi ta i Khazing'a luo kha alawna bie hluo ang te,

⁴nama cuota thlaa i chuo kyry ta alawna hne i chuo taw.

⁵Tahematapakieca thuophaabie i ri baataata ata ning tepa hingta inaa bya ungciy.

⁶Nama hrawlie hingpa rephapa hrie a pathupa hingta, Zingsuv Khrih a vawna ning te ta, a patlung nate a hrie aa tapa kha i pachangpasie.

⁷Niema bangkhuo kaw hinghaahingta i ruepa hing i cuota a pha, tahematapakieca nama palung lie na pari ung cate,[2] i thawtlana lie hne thuophaabie a cusa pata i daakhyina kawlie nama bangkhuo ta Khazing vihnyina[3] kha kama hne namaa hraw.

⁸Tahematapakieca Khrih Zingsuv duena lieta niema kha khatluv tama ica vuo yi tapa kha naa pachang khyituv ca Khazing tana a cuo.

⁹Namaa duena ca pachangna hne bie thleduo thena hneta bi pata a lethawna riypata thlaa i chuo.

¹⁰Cahaa cata khaapa hingma a phace tapa kha a tlaw the'a ung cate Khrih a vawna ning te ta a pathepa hne syi riy a aw lipa nama cuo aa.

¹¹Khazing rungnaana hne pathuosana cuota Zingsuv Khrih'a taata a vawpa a dangna thyipaa hne khata bi tie ung.

¹²Uvnu zaw i cunglie a tlungpa hmang hingta thuophaabie aa zena riy'a pata byatuv ama cuo zya kha ica pachang sa khing yi.

¹³I thawtlapa hing Khrih cuota na a cuo tapa kha siepahruo ing a huopa bangkhuo hne cawsaa mekaa ta ama pachang.

¹⁴I thawtlana hingta uvnu hne sieta[4] hluv vie bangkhuo kha Abyipa ama nguona pacu sa vie yite, riepha viena hne ciyna aw li pata thuophaabie kha a pari sa nguo yi.

¹⁵Chekha ta Khrih kaw kha hietliena hne azue-atiena pathiypalung hneta ama ri, cuorasala chekha ta ca a khingkhyina hneta ama ri.

¹⁶Capa tie cata Khrih kaw kha duena hneta ama phu, tahematapakieca thuophaabie a daakhyi riypata hingpa hmang lie chipa i cuopa kha ama pachang nakawta a cuo.

¹⁷Chekha taca Khrih kaw kha palung pathena hne cuo li pata iema phana cuo dyi ta ri yite, thaw i tlana lie hing ruvnaana ta tlungchiy hryly se tapa kha ama khing.

¹⁸Khaapama a pyi aa? Aa hmuo lipa atingna hne a cuo zaw, aa hmuopa atingna hne a cuo zaw, tuokhahaata a cuo zaw Khrih kaw kha ama phu thluo kieca i palung a tluo.

¹⁹A cuo, i palung a tluo pari thluo aa, tahematapakieca nama thlaa chuona thue hne Zingsuv Khrih Thlaapa a byana thueta capaca thaw taata hya i zangna riypatana a cuo aa tapa kha i pachang.

²⁰Tuokhaatahmuo cuo sala, nangzaa pata cuo'a va ang. Riephasa pata i ripa thue hingta, i thiy a cuozaw i hring a cuozaw, Khrih ca i pangpa lie za cyicalangpa a cuopa haakhata ata zaw hing cyicalangpa cuo sala tapa hing i khingpa hne i nguopuocepa a cuo.

²¹Kama cuota ca hringna hing Khrih ta cuote thiyna zaw hing aa thung viena ta a cuo.

²²Saapa ta i hring kalie kieca, repha a hluv vie i hrie khuna ta a cuo aa; khaapa hingma i tlaw aa tapa pachang khu va ang.

²³I palung na kuo hning ta a vaa: Khing na i tlaw aa tapa kieca, thiypa ta Khrih hneta awpa a cuo, tahematapakieca caca a pha vie karaa pata a cuo.

²⁴Cuorasala saapa ta aw kalie riypa hing niema cuota aa hu viepa ta a cuo hyi.

²⁵Capaca a siesa pata i pachang nakawta, nama kiethaw riypa hne zangna lie nama palung a tluo the riypata niema bangkhuo hne hingta i hring kalie aa.

²⁶Cahaa cata niema'a luo i vya chiy pakhaa na thueta Khrih Zingsuv chunglie namaa lawna ca a le hryly aa.

²⁷Tuokhaa a cuo zaw, Khrih thuophaabie hne aa phuvpa hringna kha hnyi tie ung. Niema'a luo a vaw pata icaa taw khu kie yi a cuozaw, icaa taw khu li kie yi a cuozaw, palung a lusa pata a daapakhaw ung cate, thuophaabie zangna kawlie a daapakhaw pata rie a du pakhawpa kha i thyi khingpa ta a cuo.

²⁸Tuokhaatahmuo caa dutuv tie ta ca pachiy ca pahuo khu'a vayi. Capa cata iema cuota rana cuote niema cuota ca khuona a cuopa kha a paluo sa aa. Hingpa hing Khazing tuepa tana a cuo.

²⁹Tahematapakieca Khrih nama zangna lie dyi cuo li pata a cuota ruvnaana ang riypa zaw kha duena hneta cuophaa pipa nama cuo.

³⁰Abyipa cuota rie i dupa kha na za hmung ung cate ata tepa hingta i du pakha nama thyi. Niema zaw capa rie cana namaa du nguoluo ra.