Read Lautu Chin Filipi 2 Bible Online

Filipi 2 - Lautu Chin bible

Filipi 2

¹Cakhutaata, Khrih chunglie nama hringna khata thaazuo ca pi yite, duena'a taata hnaanguona, Thlaapa chunglie a viesaana, kawpacuona hne ngie a china zaw kha niema'a lie a aw kieca:

²ruena aa lupa hnyi ungla, aa due zaw a due kaluo ungla, palung a lusa pata i lawna kha napa ky tie ung.

³Kiema kaw dyi a pacuona hne a mangkhangna ta khaapahmuo tue kha ung, cuorasala malie kha kama laata ama pha vie tapa rue ungla, rawcanawna hne aw tie ung.

⁴Malie khingna kha hmung the a zue ungla niema khingna dyi kha rue kha ung.

⁵Nama palung phya ca Khrih Zingsuv ta a za hnyipa palung phya kha cuose.

⁶Ama ca Khazing cuona kha a hnyi raalaa pata, Khazing hne a pakhing riypa kha hruohra ta a chuv vyi.

⁷Cuorasala a cuona kha thuse te, sii cuona kha a la pata, cawsaa hmingsuo haata a puv. Cawsaa cuona kha a la te,

⁸rawcanawna hne a hring. Thiyna te ta ri a ngie te, vieluo cunglie kha a thiy.

⁹Cacuonakaw Khazing ta a suopuv ta cyicalang te, ming zawdya hrawlie ta, aa cungnungcepa ming kha a pi.

¹⁰Cacuonakawta vuoruo, chuelyi hne chuelyi rawlie a awpa bangkhuo ta, Zingsuv ming ta ama pakhuv pane'a yite,

¹¹Paa Khazing rungnaana cuota, Zingsuv ca Byi tana a cuo tapata, cawsaa zawdya ta ama pathuo sa aa.

¹²Cacuonakawta, i duepa zaw, i ri inaa ngie paripa haa ung cata, i aw ning dyi cuo li pata, i aw li ning zaw, nama khuona cuo khata ciyna hne thlaazangna ta khuo vie ta hrie tie ung.

¹³Tahematapakieca, Khazing ca ama palung a patlingpa re kha nama hrie khing riypa hne nama hrie khu riypata cahrana caa pipa yi tana a cuo.

¹⁴Hmang bangkhuo kha a ciepuopa hne a hrupuo a ipuo pata hrie kha ung.

¹⁵Cahaacatana niema ca a zyatepa hne a pha lipa chuo chung taahingta syi riy a aw lipa hne suena a hnyi lipa Khazing saata cuo'a ung cate chuelyi lie hing aasiy haata nama khe aa.

¹⁶A cusa pata hringna bie namaa patuvna thue khata i hriepa bangkhuo kha a cakhawpa ta cuovyi tapa kha Khrih aa vaw tiyta i palesakhyi khu aa.

¹⁷Cadyi cuo li pata zangna ta nama pipa, hriykhung namaa rinapa cunglie kha i thiyse hing bya pata a cuo zaw ma, niema bangkhuo hneta i palung a tluo hne aa.

¹⁸Cahaa cata niema bangkhuo zaw kama hne nama palung tluo'a te namaa nuo riypa a cuo.

¹⁹Niema thuohlaa thyi pata i thaa a pha the riypata a ru hluo ta niema'a luo Timote vya pathlie riypa kha Abyipa Zingsuv ming ta i nguopuo.

²⁰Ama haata niema phana cuota kawpacuona caa hnyi hmisi riy'apa yi ahunghmuo kama'a lie aw vayi.

²¹A hrangpa bangkhuo ca Zingsuv Khrih khingna huv li pata iema khingna dyina ama huv.

²²Cuorasala Timote ca paa hne saa haata thuophaabie phuna re kha kama hne a hrie hnepa a cuopa ca pachang aa tlapa a cuo.

²³Cacuonakawta i kaw hing tuokhaatama a cuo tapa aa cie pahne ta niema'a luo vya pathlie'a ang te,

²⁴kama zaw ica vya tlaw patang'a yi tapata Abyipa ming ta i zang.

²⁵I huna lie a bya riypata nama vya pathliepa, i rehriehnepa hne i rieka piy ta a cuopa, Khazing rehrietuv i nuta Epafroditas hing niema'a luo i vya pathlie a hu tapata i rue.

²⁶Tahematapakieca niema bangkhuo kha aca vuosa yi, cakhutaata a pasana kaw kha nama thyi nakawta a palung pha the vyi.

²⁷A thiy'a nang nate ta a pasa hmisi. Cuorasala Khazing ta nangdue te, ama dyi cuo li pata kama hrahring zaw kha ngiechina suokha hnang suokha i taw li riypata nang ina due.

²⁸Cacuonakawta nama hmung pakhaa tiyta nama palung a nuo'a te, kama zaw i palung riethyina aa hy vie riypata ama kha i vya pathlie mala khingsa.

²⁹Ama kha alawna hne cuhluo tie ung. Ama haapa cawsaa kha pa-uvsathyi tie ung.

³⁰Tahematapakieca, Khrih[5] re kawlie kha vuotaa a za thiy'a nang. Niema ta i cuota nama hrie khu li riypa re khana thiy zaw hring zaw tapata a hrie.