Read Lautu Chin Filipi 3 Bible Online

Filipi 3 - Lautu Chin bible

Filipi 3

¹A chuona taca, uvnu hne sieta zaw,[6] Abyipa'a lie kha a law tie ung. I cape ciepa niema'a luo vya cape pakhaa riypa hing a ngiering va ang. Niema cuota namaa bangsuna ta zaw a cuo.

²Uv tie kha a raaring tie ung, a pha lipa hmang a tuetuv tie kha a raaring tie ung, vangdaw a te riypa kaw a ri byalyapa tie kha a raaring tie ung.

³Tahematapakieca, Thlaapa ta Khazing a biepa tie, Khrih Zingsuv kha a palesakhyipa tie hne saapa a buchuo lipa tie kiema hingna vangdaw a tepa ta a cuo puv.

⁴Cuorasala, kama zaw hing saapa hmang a buchuona kaw ripa kieca, a buchuo riy a hnyipapaa tana i cuo. Pakhakha ta saapa hmang a buchuo riypa a hnyi kieca, kama na a hluv vie a hnyi ang.

⁵Ning cari a tapata vangdaw tepa, Israel cawsaa, Benjamin mingphang, Hebru nungpaa ta sapa Hebru a thliepa; phungbie luota ripa kie Farasi;

⁶Judah phung i daakhyi tuv nakawta khrihsaabuv hrisaathieruetuv; phungbie thueta adangna luo kiezawma syi riy a aw lipapaa ta i cuo.

⁷Cuorasala i cuota athungna ta i za ruepa hingpa hmang bangkhuo hing ata hing ca Khrih thueta asungna tana i rue diy tli.

⁸Cadyi ca cuo vyi, hmangting zawdya laata a sungnaa viepa i Byipaapa Khrih Zingsuv i pachangnapa thue hingta hmangting bangkhuo kha a sungkaruepa tana i rue. Ama nakawta hmangting zawdya kha i thaw diy, Khrih i cu thena riypata ca khapa zaw khaca hnehnaw haatana i rue.

⁹Phungbie taata a vawpa kama adangna kha cuo li pata, Khrih zangna thueta a vawpa adangna, Khazing'a taata a zuvpa zangna lie hruo a bangpa a dangna khana Ama hneta maa pazue thena riypata a cuo.

¹⁰Ama thiyna lie thiy ra pata, a thupakhaanapa cahrana hne a te-angna a hraw pata Khrih pachang kha i khing.

¹¹Cahaa cata kiedyina thiyna taata pathu pakhaapa i cuo aa.

¹²Hingpa hmang hing i hmung tli tana cuo li pata, i tingna luo na i pha tli tana zaw cuo vyi. Cuorasala Khrih Zingsuv ta a huopa ta ina tue tli nakawta capa hmang ca i huopa a cuo khu riypata i ruo nguoluo.

¹³I duepa zaw,[7] capa hmang ca i huopa ta a cuo tli tapata rue va ang; cuorasala i tuepa hmang suokha ca: hnang luota a awpa hmang kha maw ang te hmie luota a awpa hmang kha pha i zue.

¹⁴Cacuonakawta, Khrih Zingsuv thueta vuoruo taata Khazing kuna lawmuo kha hmung riypata kawtung luo kha i ruo.

¹⁵Kiema, ruena a ky tlipa tie taca cahaapa palungphya kha hnyi ungsiy. Ruena phanghrang ta a hnyipa nama aw kieca Khazing ta capa zaw ca niema'a lie a paluo sa aa.

¹⁶Ata ning te ta ima ziypa phungluo hing ziy thluo ungsiy.

¹⁷Uvnu hne sieta zaw, kama hringzya hing naa mangpuo tie ung. Kiema hrawlie nama hmungpa mangpuo tluo aa tlapa tie haata a hringpa tie kha a mangpuo tie ung.

¹⁸Tahematapakieca, yi hluvpuv ica chang tli pahaayita ata zaw hing mingthliy hneta ica chang pakhaa yi; cawsaa hluvpuv ca Khrih vieluo kha a cariepa tana ama hring.

¹⁹Iema chuona ca rana ta cuote, ama khazing ca ama riy ama vaw khata a cuo; ama rungnaana ca ama nangzaana khata cuote, ama pathiypalung ca chuelyi hmang lie dyi khana ama chi.

²⁰Cuorasala kiema ca vuoruo ming cuo pate maa khuotuv Abyipa Zingsuv Khrih vuoruo taata a zuv riypa kha a ngietie va puv.

²¹Hmangting zawdya kha ama uvna raw luo a vya chi khupa a cahrana ta a thaanepa ma pangpa kha a rungnaapa ama pangpa haakhata malie a thle aa.