Read Lautu Chin Kolose 3 Bible Online

Kolose 3 - Lautu Chin bible

Kolose 3

¹Cacuonakawta, Khrih hne pathu pakhaapa nama cuo kieca, Khazing cacuo luota a tupa Khrih a awnapa cungluo hmang kha huv tie ung.

²Nama pathiypalung kha cungluo hmang lie chi ungla, chuelyi hmang lie chi kha ung.

³Tahematapakieca niema ca thiy tli ung cate nama hringna ca Khrih hneta Khazing chunglie nupa tana nama cuo.

⁴Nama[6] hringna ta a cuopa Khrih kha aa luo thueta niema zaw ama hneta rungnaana hne namaa luo ra aa.

⁵Cacuonakawta nama chunglie a awpa chuelyi hmang: aparuvsuena, a pyalyipa hringna, khingna cahratuvna, a pha lipa khingna, hne karuo-awna (karuo-awna ca kuvtuezuv abiena phangkha tana a cuo) bangkhuo kha thie tie ung.

⁶Capa zaw nakawcata Khazing hihaana ca ri a ngie lipa tie[7] cunglie a tlung aa.

⁷Hingpa zaw hing iema hrawlie nama za aw ningta niema zaw nama za ziypa hringzya tana a cuo.

⁸Cuorasala ata hing ca hihaana, pathiy chiena tapa tie kha thaw ungla, malie kaw rina, malie thuopachina tapa tie kha nama pakaa taata pya kha se.

⁹Pakha hne pakha kha a dung kha ung. Nama cuona hlung ca a zyazaa hne khata thlie siy tli ung cate,

¹⁰hringna thaa kha namaa hryi tli. Capa hringna thaapa ca a satuv hminghmie a lu riypata pachangna chunglie kha sapathiypa ta a cuo.

¹¹Ca sapathiyna chunglie ca, Krik ming hne Judah ming tapa cuose, vangdaw tepa hne vangdaw te lipa tapa cuose, a ngaapa, saruopa haata a ngaapa phang, sii hne hyazangpa, tapa aw vyi. Cuorasala hmangting zawdya kha Khrih ta cuote hmangting zawdya chunglie kha a aw.

¹²Khazing ta caa tlaw yite, a pathesapa hne a duepa nama cuona haata, kawpacuona, ngiechina, rawcanawna, palungnena, hne palungpasiyna kha hnyi tie ung.

¹³Pakha hne pakha kha a chaw law ungla, pakhakha ta a hrangpa pakha cunglie kha palung tling lina a hnyi kiezawma a ngiethe tie ung. Abyipa[8] ta niema acaa ngiethepa haa yi khata niema zaw pakha hne pakha kha a ngiethe tie ung.

¹⁴Ca bangkhuo khutaa cata duena kha chachiy tie ung. Duena ca hmangting zawdya kha achaw-arawsa pata hne tluotlingsa pata a sawpakhawpa tana a cuo.

¹⁵Nama pathiypalung kha Khrih diena ta ca uv yi se. Hmisi ta ripa kieca capa luo cana pangkha cuo riypa ta kupa nama cuo. Nama palung tluo se.

¹⁶Khrih[9] bie ca nama chunglie kha aw sala, singna ta pakha hne pakha kha a pacuv ungla a pasiy-apaya ung. Sam hlaa, Khrihsaa hlaa hne pathuosana hlaa kha palungtluona hne Khazing'a[10] luo sa tie ung.

¹⁷Khaapa bie nama ri zaw, khaapa hmang nama tue zaw, Abyipa Zingsuv ming ta ri ungla tue tie ung. Paa Khazing ca ama thue khata pathuosa tie ung.

¹⁸Napuvnung zaw, nama navaapa ri kha a ngie ung; khrihsaa nama cuopa haata Abyipa'a lie nama tue riypatana a cuo.

¹⁹Navaapa zaw, nama napuvnung kha due ungla bie-ahruopa ta chaw kha ung.

²⁰Haatiy zaw hmangting zawdya lie kha nama nung hne paa ri a ngie tie ung, tahematapakieca caca Abyipa'a lieta cuhluo aa tlapa nama hrievu tana a cuo.

²¹Paa zaw, nama saata kha ama hi pahaa kha ung, ama palung na a ra pathlyi aa.

²²Sii zaw, hmangting zawdya lieta nama chuelyi ziy tie ri kha a ngie tie ung, aca hmungna lie yi ama palung patluo riypa dyi cuo li pata, pathiypalung hmisi hne Khazing ciyzaana cangta cuose.

²³Khaapa re a cuo zaw, palunghmisi ta hrie ungla, nama ziy huo haakhata cuo li pata Abyipa huo haakhata hrie tie ung.

²⁴Abyipa'a taata nama cu riypa ru khana nama lawmuo ta a cuo aa tapa kha nama pachang. Abyipa Zingsuv re a hriepa[11] tana nama cuo.

²⁵Tahematapakieca hmangpha lipa a tuepa ca a tuepa hmangpha lipa cuota duotena kha a ang aa. Abyipa'a lieca pahlyipalena aw vyi.