Read Lautu Chin Kolose 4 Bible Online

Kolose 4 - Lautu Chin bible

Kolose 4

¹Ziy zaw, nama sii tie kha aa dangpa hne a phapa ta mangsang tie ung, tahematapakieca niema zaw vuoruo lie ziy nama hnyi rapa kha nama pachang.

²Thlaa chuo kha temaa ungla, pathiypalung a hy syalya khata palungtluona bie hluona cangta pazue pari ung.

³Khazing ta thaw i tla hnuochuopa a bie cuota cuose, ma phu riypa Khrih bieparuv cuota cuose, ingchiy malie a pahawpa riypa hne

⁴i phu riypa zaa ta a siesa pata i phu khuna riypata kiema cuo zaw kha thlaa chuo tie ung.

⁵Zangtuv a cuo lipa hrawlie kha singvaasa pata atu-adaa ungla cuopha nama hnyipa kha muo hnyisa pata hmuo tie ung.

⁶Nama bie ca naathlie a nuopa hne a thlung-iepa cuo sala cawsaa bangkhuo kha tuokhaata i chaw kiema a pha aa tapa kha a zue tie ung.

⁷Taikhikas ta i kaw bangkhuo kha aca chang'a yi. Ama ca Khrih chunglie i duepa uvnu, zangtluo aa tlapa Khazing rehrietuv, hne i rehriehnepa[12] ta a cuo.

⁸Tuokhaatama ma aw tapa kha nama pachang na riypa hne niema thaazuo pi riypa hrahring khatana ivya pathlie pata a cuo.

⁹Ama ca zangtluo aa tlapa hne i duepa uvnu, niema chunglie pakha ta a cuopa Onesimas hne tana aa vaw aa. Hinglie ta achiy-acuopa hmang bangkhuo kha aca chang'a yi.

¹⁰Thaw i tlahnepa Aristarkas ta nama kuv aca patuv yi; Barnabas tuvpaapa Marka zaw ta nama kuv aca patuv yi. Ama kaw kha ica chang tli yi. Niema'a luo a vaw kieca za cuhluo mang ung.

¹¹Justas ama tapapaa Zingsuv zaw ta nama kuv aca patuv yi. Iema dyi hing Khazing pena cuota i rehriehne zaw hrawlie vangdaw a tepa tie cuo yite, i hnaa naa panguotuv ta ama cuo.

¹²Niema chung taata pakha ta a cuopa Epafras, Khrih Zingsuv sii a cuopa ta nama kuv aca patuv yi. Niema kha ruena a kysa pata Khazing khingna bangkhuo kha a tlingsa pata nama pachang riypata nama cuota thlaa a chuo pari.

¹³Ama ta niema cuota hne Laodisia lie a awpa tie cuota hne Heirapolis lie a awpa tie cuota khuopuv ta re a hriepa kha kama ta tehte i khuo khu.

¹⁴Ma duepa siybyi Luka hne Demas ta nama kuv aca patuv yi.

¹⁵Laodisia lie a awpa uvnu hne sieta zaw[13] cuose, Nimfa hne a ing lie a pungpa khrihsaabuv tie cuose bie ivya changpa yi kha na changpa pachaa tie ung.

¹⁶Hing caa hing niema'a lie nama ri khu taata, Laodisia khrihsaabuv lie zaw kha ri ungla, Laodisia taata aca vya paphyapa yi caa zaw kha ri tie ung.

¹⁷Cakhutaaca, Arkhipas kha, “Abyipa ming ta naa lapa re kha palang mang la,” tapata za chang tie ung.

¹⁸Kama, Paul ta hing bie-achangna caa hing kama kuv ta i cape pata a cuo. I thaabuoliriy hing maw kha ung. Khazing vihnyina nama cunglie aw mangsue.[14]