Read Lautu Chin 1 Thesalon 2 Bible Online

1 Thesalon 2 - Lautu Chin bible

1 Thesalon 2

¹Uvnu hne sieta zaw,[2] niema'a luo maa vawpa ca a cakhawpa ta cuovyi tapa kha nama pachang.

²Cuorasala, Filipi lie kha ruvnaana hne nangzaana ma ang raalaa pata, nama pachangna haata, aduna lepuv a awna cangta Khazing'a taata thaazuo kha hmung pate, niema kha Khazing thuophaabie maca chang yi.

³Tahematapakieca maca changpa lie yi hing a dang lipa, a cuo li kie, atingna pha lipa hne dungna aw vyi.

⁴Cuorasala Khazing ta thuophaabie ri riypa hingta aa phuvpa ta malie a chipa haata cawsaa palung patluo riypa kha cuo li pata ma pathiypalung malie a hmungpa Khazing palung patluo riypa khata ma ri.

⁵Nama pachangpa haata hne Khazing ca malie a daakhyituv a cuopa haata, niema'a luo kha patapalena bie hne a vaw buo li pa pata, karuo-awna hne a tue pakhi pata zaw a vaw buo va puv.

⁶Khrih lucuotuv ma cuopa haata caa hiekhutuv ma cuo raalaa pata, niema'a taata cuose, a hrangpa tie'a taata cuose, cawsaa pathuosa riypa kha ma huvpa cuovyi.

⁷Cuorasala nung ta a saata kha a nesa pata a mangchiypa haata niema hrawlie kha a nesa pata ma aw.

⁸Cahaa cata niema kha maca duetuv hringhruo nakaw yi ta Khazing thuophaabie dyi kha cuo li pata ma hringna khahmuo maca pi khing yi. Ma due hringhruopa tana nama cuo tli.

⁹Uvnu hne sieta zaw, riethyi-thaabuosa pata re ma hriepa kha malie nama pachang. Khazing thuophaabie niema'a lie ma phu tiyta, nama cuota hmangriy ma cuo li riypata chung hne zuo ta li pata re ma hrie.

¹⁰Zangtuv a cuopa niema cunglie ta ma tuepa ca a pathepa, aa hmuopa hne syi riy a aw lipa a cuopa kha niema ca tehte cuo ung cate, Khazing zaw a cuo ra.

¹¹Nama pachangna haata, Paa ta a saa zaw a hmungpa haayitana maca hmung yi.

¹²Niema kha a pena hne a rungnaana luo caa kupa yi Khazing hne aa phuv pata nama hring riypata thaazuo ca pi yi pate maca pasu yi, paa maca kie yi.

¹³Kiema'a taata nama thyipa Khazing bie kha nama cuhluo tiyta, cawsaapa bie haata nama cuhluopa cuo li pata, niema zangtuv tie chunglie re a hriepa, Khazing bie kha a cuona haata nama cuhluo nakawta kiema zaw Khazing'a luo ci li ta alawna ma hluo.

¹⁴Uvnu hne sieta zaw, Judea ruo chunglie a awpa Khazing khrihsaabuv hne Khrih Zingsuv cawsaa zaw ta Judah ming'a taata ama ang tawpa khana niema zaw nama cawsaa tie'a taata nama ang ra pata a cuo.

¹⁵Judah ming ca Abyipa Zingsuv hne profet tie kha thie yite kiema zaw malie a cadepa tie tana ama cuo. Khazing ngie kha pachi yite cawsaa bangkhuo kha amaa du.

¹⁶Khuona ama hmung riypata Jentail ming thuophaabie chang riypa kha hmuo malie amaa daakhuo. Cahaa cata iema ca ama suena kha ama chachiy tyly. Cuorasala a chuona lieca Khazing hihaana ca iema cungluo kha a tlung.

¹⁷Uvnu hne sieta zaw, pathiypalung ta cuo li pata saapa lie cuokhata maa che chung ta lie hinghmuo ca vuo hringhruo yi pate nama hmie maca hmung khingsa yi.

¹⁸Niema'a luo vya tlaw pakhaa riypa kha khing pate, kama Paul zaw hing niema vya tlaw riypa kha yi hluvpuv i zue raalaa pata Setaa ta luo malie a khaakhuo.

¹⁹Ma Byipaapa Zingsuv a vaw thueta khaapa hingma a hmiekunglie maa nguopuona, ma palungtluona, hne maa palesakhyipa byilakhuv ta a cuo aa? Niema ta cuo'a va ung cama?

²⁰A cuo, niema hingna ma rungnaana hne ma palungtluona ta a cuo ungciy.