Read Lautu Chin 1 Thesalon 3 Bible Online

1 Thesalon 3 - Lautu Chin bible

1 Thesalon 3

¹A chuona lieca ma aw khu li tli nakawta kiema dyi Athens khy lie kha a ngaa pata,

²ma uvnu hne Khrih thuophaabie phuna kawlie Khazing re ma hrie hnepa Timote kha nama zangna lie a cusa pata namaa daa khuna riypa hne niema thaazuo pi riypata cuose,

³hing hrisaathieruena nakaw hingta pakha hmuo namaa cahang li riypata niema'a luo ma vya pathlie. Hmisi ta ripa kieca hingpa hmang ang riypa hingta a tlawpa ma cuo pakha niema hrahring ta nama pachang.

⁴Niema'a lie ma aw ning kha hrisaathieruena ang riypa hing maca chang pacie yi cuote, ata hing nama pachangna haata a vya tlung hmisi.

⁵Capa kawlie cata i aw khu li tli nakawta nama zangna hing khaama a lu tapa pachang riypa hne pasupaliytuv hingta ca pasu ca paliy'a yite ma re hrie ciepa kha a hripa ta cuo'a kie tapata Timote kha i vya pathlie pata a cuo.

⁶Cuorasala Timote ca a ru hluota lie kha niema'a taata vya chiy te nama zangna hne duena kaw thuophaa kha malie a vya phya. Kiema ta maca vuosa pahaayita duena hne malie namaa thyi paripa kha malie a chang.

⁷Cacuonakawta, uvnu hne sieta zaw,[3] ma ngiechi ning hne hrisaathieruena ma ang ning kha nama zangna kaw ma thyipa khata thaazuo malie a pi.

⁸Abyipa'a lie a cusa pata namaa daapa kaw ma thyipa ca, ma cuota, ma hringna huv tana a cuo.

⁹Niema nakawta Khazing hmielie maa law. Capa bangkhuo kawlie cata ma hnyipa palungtluona kawlie hing Khazing kha tuokhaatama maa law aa?

¹⁰Niema hne hmie a hmung pata, zangna lie nama bupa kha a bya khu riypata chung zuo ta li pata pathiypalung hmisi ta thlaa ma chuo.

¹¹Ma Paa Khazing ama hrahring hne ma Byipaapa Zingsuv ta niema'a luo maa vawna riypa kha luo malie a chiy thi se.

¹²Kiema ta niema maca duena yi a lepa haahingta, niema pakha hne pakha namaa duena hne cawsaa bangkhuo nama duena kha Abyipa ta pale sa ra mangsue.

¹³Ima Byipaapa Zingsuv ca a mingpathepa tie hne a vaw thueta, nama pathiypalung thaa kha ca patlung yi sala, ima Paa Khazing hmielie syi riy nama aw li riypata ca pathe sa yi se.