Read Lautu Chin 1 Thesalon 4 Bible Online

1 Thesalon 4 - Lautu Chin bible

1 Thesalon 4

¹Uvnu hne sieta zaw,[4] a chuona lie ta i ri khingpa ca tuokhaata aw'a pate ma Khazing palung ma patluo aa tapa kha namaa cuv ciepa a cuo pahaata namaa zuevie hryly riypata, Abyipa Zingsuv ming ta maca pasu yi.

²Tahematapakieca Zingsuv ming ta tuokhaatama maca pacuv yi tapa kha nama pachang.

³Tahematapakieca, Khazing khingna ca niema pathe sa riypa kha a cuo nakawta aparuvsuena kha cahriy tie ung.

⁴A pathepa hne pa-uvsathyi aa tlapa luopuv chunglie ta nama pangpa kha tuokhaatama ma uv aa tapa ca nama pachang.

⁵Khazing a pachang lipa Jentail ming haata saapa khingna lie kha hring kha ung.

⁶Pathiypalung hmisi ta a raaringna maca za pilupa haayita hne maca za changpa haayita, Khazing ca vieriy a thungpa a cuo nakawta, hingpa kawlie hing ahungtahmuo a uvnu hne a sieta kha dungvie kha se.

⁷Tahematapakieca Khazing ca a pyalyipa luo cuo li pata pathena luo na malie a ku.

⁸Cacuonakawta hingpa pacuvna a thawpa ca cawsaa nawhnyina kha a thawpa cuo li pata niema'a luo Thlaapa Pathe caa pipa yi Khazing kha a thawpa tana a cuo.

⁹Nama uvnu hne sieta zaw duena kawlieta ahungtahmuo niema'a luo caa cape a hu vyi, tahematapakieca niema pakha hne pakha a due riypata Khazing pacuv ciepa tana nama cuo.

¹⁰Cahaa cata Masidonia lie a awpa uvnu hne sieta zaw kha nama due hmisi. Cuorasala, duepa zaw,[5] cahaa cata tue riypa kha a zue hryly ungla tapata maca pasu yi.

¹¹Maca pasupa haa yi khata a dieta tah khysa kha a ting ungla, niema nama reta kha hrie ungla, niema kuvta khata nama riy a caw tie ung.

¹²Cahaa cata zanglituv tie pa-uvsathyina hne mangthawna kha hmung'a ung cate ahunghmuo a buchuo a hu li pata nama aw aa.

¹³Uvnu hne sieta zaw, anguopuona a hnyi lipa tie ngiechipa haata nama ngie a chi li riypata a thiypa tie kaw hne a patuv pakha pachang sa li pata ca aw khing vayipuv.

¹⁴Zingsuv ca thiy te a thupakhaa tapa ma zang; cacuonakawta Zingsuv zang te a thiypa ca ama hneta Khazing ta a pathu pakhaa yi tapata ma zang.

¹⁵Canakaw catana, Abyipa bie ta maca tapa yi ca, Abyipa aa vawna te ta a hring kaliepa kiema ta a thiypa tie kha hmiechue khu'a vayipuv tapata a cuo.

¹⁶Tahematapakieca Abyipa ama hrahring kha nawpina ueryi, avuoming uvtuv ueryi hne Khazing hmyakaa ueryi zaw hne khata vuoruo taata za cung'a te, Zingsuv zangna cangta a thiypa tie kha hmietaace ta ama thupakhaa aa.

¹⁷Cakhutaacata avuo lieta Abyipa a taw riypata kiema a hring kaliepa tie kha iema zaw hne cata amyi cungluo khiy calang pata cuo'a pate Abyipa hne chuozaa ta ma aw aa.

¹⁸Cacuonakawta hingpa bie hingta pakha hne pakha kha thaazuo a pi tie ung.