Read Lautu Chin 1 Thesalon 5 Bible Online

1 Thesalon 5 - Lautu Chin bible

1 Thesalon 5

¹Uvnu hne sieta zaw,[6] a ning'a na a cuo hne a patuv pata niema'a luo caa cape a hu vyi.

²Tahematapakieca Abyipa ca zuo ta a paruvpa aa vawpa haatana aa vaw aa tapa kha a phasa pata nama pachang.

³Cawsaa ta, “hmangting bangkhuo a dieta hne abang-asu patana a aw,” ama ta ning kha nu-aphyapa canung ta nu aa zi pahaata ama cunglie rana sungkha ta vya tlung'a te, ahunghmuo law'a vayi.

⁴Cuorasala duepa[7] zaw niema ca zingna chunglie nama aw li nakawta capa ningkhue cata a paruvpa a vawpa haata nama nang capa uo'a vayi.

⁵Tahematapakieca niema ca khena saa hne ningchung saa ta cuo ung cate kiema zaw zingna, zuo saa ta cuo va puv.

⁶Cacuonakawta kiema ca malie zaw amaa hmungpa haakhata a hmung li pata, a hra ung sala palungsingta tah aw ungsiy.

⁷Tahematapakieca a hmungpa ca zuo ta a hmung te, a pariypa zaw zuo tana a pariy.

⁸Cuorasala kiema ca ningchung saa ta ma cuo nakawta palung singta tah aw ung sala, zangna hne duena kha cacunghnaapakaw haakhata a hryi ung sala, khuona anguopuona ca thaalakhuv haakhata a khuv ungsiy.

⁹Tahematapakieca Khazing ta kiema kha a hihaana ang riypata malie a tingpa cuo li pata, ima Byipaapa Zingsuv Khrih thueta khuona cu riypata lieriyuopuopa tana ma cuo.

¹⁰Kiema ca maa hra zaw maa hmung zaw ama hne aw pakhaw riypata malie a thiykuopa tana ma cuo.

¹¹Cacuonakawta ata nama tue nguoluopa haahingta pakha hne pakha kha thaazuo a pi ungla a sathaw tie ung.

¹²Uvnu hne sieta zaw, paa maca kie yi: niema hrawlie rehrietuv tie hne Abyipa'a lie niema luochiytuv tie hne caa pasiypa-yatuv tie kha pa-uvsathyi tie ung.

¹³Ama hriepa re thue khata hmiezaana a suocepa pi ungla due tie ung. Nama hrawlie diena aw mangsue.

¹⁴Duepa zaw, a thaathuvpa tie kha pasiypa-ya ungla, a palungcawpa tie kha thaazuo pi tie ung. A thaadyapa tie kha thaazuo pi ungla ama bangkhuo cunglie kha nama palung pasiy se tapata paa maca kie yi.

¹⁵Pakha hmuo a chiepa ta vieriy namaa thung li riypa hne pakha hne pakha cunglie hne nama bangkhuo cunglie hmangphapa nama hrie khu pari riypa kha a zue tie ung.

¹⁶Nama palung tluo pari se,

¹⁷ci li ta thlaa chuo ungla,

¹⁸khaapa hmang namaa taw zaw alawna bie hluo tie ung; tahematapakieca Khazing ta Khrih Zingsuv chunglie hinghaahingta nama aw riypata acaa khingkhyipa yi tana a cuo.

¹⁹Thlaapa kha pache kha ung.

²⁰Profet tie bie kha siysaa ri li pata aw kha ung.

²¹Cuorasala hmangting kha dyapasya ungla, a phapa kha a patuv ungla

²²a pha lipa bangkhuo kha cahriy tie ung.

²³Diena Khazing ama hrahring ta ca pathesa karuv yi sala, ima Byipaapa Zingsuv Khrih aa vaw thueta, nama thlaapa, nama pathiypalung hne nama pangpa kha syi riy a aw lipa hne tluotlingsa pata ca sang yi se.

²⁴Niema caa kupapaa yi ca zangtluo aa tlapa a cuo nakawta capaca a tue aa.

²⁵Duepa zaw, thlaa malie chuopa tie ung.

²⁶Uvnu hne sieta zaw bangkhuo kha a pathepa a pahnuona ta bie a chang tie ung.

²⁷Hingpa caa hing iema bangkhuo hmielie ri riypata Abyipa ming ta naw ica pi yi.

²⁸Ima Byipaapa Zingsuv Khrih vihnyina ca niema'a lie aw mangsue.[8]