Read Lautu Chin 2 Thesalon 1 Bible Online

2 Thesalon 1 - Lautu Chin bible

2 Thesalon 1

¹Paul, Silas hne Timote ta, ma Paa Khazing hne ma Byipaapa Zingsuv Khrih chunglie a awpa Thesalonika khrihsaabuv kha caa maca paphya yi.

²Ma Paa Khazing hne Abyipa Zingsuv Khrih ta vihnyina hne diena kha ca pi mangyisue.

³Uvnu hne sieta zaw,[1] kiema ca niema kawlie hing Khazing kha maa law pari riypatana a cuo. Tahematapakieca nama zangna kha lethaw te cawsaa bangkhuo ta pakha hne pakha namaa duena zaw a lethaw nguoluo nakawta cahaa cata Khazing maa lawpa ca aa hmuopa tana a cuo.

⁴Cacuonakawta hrisaathieruena chunglie nama angpa riethyina cangta zangna chunglie a cusa pata namaa daa nakawta Khazing khrihsaabuv tie hrawlie kha kiema hrahring ta maacaa palesakhyi yi.

⁵Hingpa hing na aa dangpa Khazing biechina paluosana ta a cuo. Niema zaw Khazing pena cuota riethyina a ang rapa nama cuo nakawta capa Khazing pena hne aphuv-asiypa pacuo sa riypata tingpa nama cuo.

⁶Tahematapakieca Khazing ta niema riethyi caa pipa tie kha riethyina pi ra'a yite,

⁷riethyina a angpa niema kha a pahyna ca pi'a yite kiema zaw malie a pi ra aa. Abyipa Zingsuv kha a lesyipa aa vuoming hne myipalyi chunglie amaa zaa luo tiyta,

⁸Khazing a pachang lipa hne ma Byipaapa Zingsuv thuophaabie a ziy lipa tie kha vieriy thung'a yite riethyi a pi'a yi.

⁹Iema ca chuozaa ranapa duotena kha ama ang aa. Abyipa hmiekung taakhata a cade'a yite, a rungnaapa a cahrana kha hmung'a vayi.

¹⁰Abyipa ca a mingpathepa tie ta parungnaa sa riypata hne zangtuv tie bangkhuo pathuo sa riypata aa vaw thueta capa ning lie ca niema zaw a pathuosapa tie hrawlie ca nama aw ra aa, tahematapakieca niema ca maca changpa yi thuophaabie nama zang nakawta a cuo.

¹¹Cacuonakawta, Khazing ta aca una yi hne aa phuvpa ta ca chi yi sala, nama biechina hne zangna ta nama hriepa re bangkhuo lie kha a cahrana ta tluotlingna aca pi riypa yita thla maca chuopa pari yi.

¹²Cahaa cata, ima Byipaapa Zingsuv ming ca niema hrawlie kha rungnaana hmung'a te, ma Khazing hne Abyipa Zingsuv Khrih vihnyina thueta niema zaw ama'a taata rungnaana kha nama hmung ra aa.