Read Lautu Chin 2 Thesalon 2 Bible Online

2 Thesalon 2 - Lautu Chin bible

2 Thesalon 2

¹Uvnu hne sieta zaw,[2] ma Byipaapa Zingsuv Khrih aa vawna riypa kaw hne pahmya pakhawpa ma cuo riypa kawlieta maacaa nue khingpa yi ca,

²pathiypalung ta cuose, bie ta cuose, caa ta cuose, kiema'a taata aa vawpa haata Abyipa ning ca a vya chiy tli, ama tapa kawlieta pathiypalung a cahang pata namaa pahlu li riypa hing a cuo.

³Ahungtahmuo ca dung kha yi se; tahematapakieca capa ning ca biena luo aduna a vaw taa lipa'a nata para riypata lieriyuopuopa cawsaa pha lipapaa[3] a vya luo hluo ta ca vya tlung'a vyi.

⁴Cawsaa ta khazing tapata ama ruepa bangkhuo hne ama biepa bangkhuo kha a du'a te, capa zaw cungluo cata aa chi aa. Cahaa cata a thude kha Khazing biena-ing chunglie patu'a te, ama hne ama kha Khazing tana i cuo a ta aa.

⁵Niema'a lie i aw ningta ica za changpa yi kha a thyi va ung cama?

⁶A cuo a de thueta aa luo riypata a daakhuotuv a awpa kha nama pachang.

⁷Tahematapakieca cawsaa pha lipapaa a paruv ta re a hrie nguoluo tli, cuorasala a daakhuopa kha phe pata a cuo hluo li khaahmuo hrie the'a valie.

⁸Cakhutaacata cawsaa pha lipapaa ca a vya luo'a te, Abyipa Zingsuv[4] ta a pakaa taata a pyapa a huv ta ama kha thie'a te, aa vawna huvhaa ta ama kha a para aa.

⁹Cawsaa pha lipapaa ca Setaa hmangtuena taakhata a vya luo'a te, cahrana phangting, kharuehaa hmang phangting hne,

¹⁰rana luo a chiy riypa tie cuota a pha lipa dungna phangting hmuo pata a vaw aa. Tahematapakieca khuona ama hmung na riypata biehmisipa kha khing li pata ama thaw.

¹¹Cacuonakawta a cuo lipa kha ama zangna riypata Khazing ta a ruvsapa dungna kha a pathliesue yi.

¹²Cahaa cata biehmisipa zang li pata a dang lipa hmang lie a palung a tluopa bangkhuo ca suephawpa ta ama cuo aa.

¹³Khazing ta a duepa uvnu hne sieta zaw, niema nakawhingta Khazing ca alawna bie ma hluo pari aa. Tahematapakieca Thlaapa ta pathesana thueta hne biehmisipa zangna thueta Khazing ta caa tlaw yite khuona cuota thyipaa taapa ta aca tue yi.

¹⁴Hing a tingna hne hingta, ma Byipaapa Zingsuv Khrih rungnaana nama hmung na riypata kiema ma phupa thuophaabie ta aca ku yi.

¹⁵Cakhutaata, uvnu hne sieta zaw, a cusa pata a daa ungla bie ta cuose, caa ta cuose, maca changpa yi ziyphung kha a patuv tie ung.

¹⁶Kiema kha malie due te, a vihnyina thueta hnaanguona hne a nguopuona malie a pipa ma Paa Khazing hne ma Byipaapa Zingsuv Khrih ama hrahring ta,

¹⁷nama palung hnaa ca panguo yi sala re phapa hne bie phapa bangkhuo lie kha thaazuo ca pi yi se.