Read Lautu Chin 2 Thesalon 3 Bible Online

2 Thesalon 3 - Lautu Chin bible

2 Thesalon 3

¹Uvnu hne sieta zaw,[5] a chuona ta ica taa khingpa yi ca, Abyipa bie niema'a lie aa zepa haakhata a catli pata a ze te, rungnaana a hmung riypata thlaa malie chuopa tie ung.

²Cawsaa bangkhuo ta zangna ama hnyi li nakawta cawsaa pha lipa tie hne cawsaasuepa tie kuv taata khuopa ma cuo riypata thlaa malie chuopa tie ung.

³Cuorasala Abyipa ca zangtluo aa tlapa a cuo nakawta a pha lipapaa[6] kuv chung taata aca khuo'a yi.

⁴Kiema ta maca changpa yi kha tue nguoluo ung cate hmie luo zaw nama tue aa tapata Abyipa'a lie a ruechuona ma hnyi.

⁵Khazing duena hne Khrih te-ang khuna kha nama hnyi riypata Abyipa ta luo caa chiy yi se.

⁶Duepa zaw,[7] re a hrie khing lipa tie hne kiema maca changpa yi phungluo haata a aw khing lipa tie kha cahriy ung tapata ma Byipaapa Zingsuv Khrih ming ta naw maca pi yi.

⁷Tahematapakieca niema hrahring ta kiema a mangpuo pata nama aw riypa kha nama pachang; niema'a lie ma aw ning kha ma thaa thuv vyi.

⁸A muo pi li pata ahung sa hmuo ning va puv. Cuorasala ahung cuo tahmuo hmangriy ma cuo li riypata chungzuo ta re ma hrie.

⁹Caca niema'a taata abyana pi riypata a hie khuna ma hnyi li nakaw cuo vyi, malie namaa mangpuo thena riypata ma tuepa tana a cuo.

¹⁰Niema'a lie ma aw ning kha tahmuo, “re a hrie khing lipa ca sa ning kha se,” tapata naw maca pi tli yi.

¹¹Tahematapakieca niema chekha ca nama thaathuv te re khaahmuo hrie li pata malie kawlie bie dyi a rangpa nama aw tapata ma thyi.

¹²Cahaapaapa cawsaa tie kha, ama riy a cawna re kha a diesa pata hrie yi se, tapata naw pi yi pate ma pasu yi.

¹³Uvnu hne sieta zaw, aa hmuopa hmang tue kha nama palung chuo kha se.

¹⁴Hingpa caa lie ma ripa hing a ziy khing lipa ca a nang a zaa the riypata a viesaa kha ung.

¹⁵Cariepa haata hmung li pata, zangtuv[8] haakhata a raaringna pi tie ung.

¹⁶Diena Byi ama hrahring ta a luo bangkhuo taata cipari ta diena ca pi mangyisue. Niema bangkhuo'a lieta Abyipa aw mangsue.

¹⁷Kama Paul ta hingpa bie-achangna caa hing i kuv ta i cape. I caa bang-khuo lieta ming i thuv; hinghing i caa cape zya ta a cuo.

¹⁸Ima Byipaapa Zingsuv Khrih vihnyina ca niema bangkhuo'a lie aw mangsue.[9]