Read Lautu Chin 1 Timote 1 Bible Online

1 Timote 1 - Lautu Chin bible

1 Timote 1

¹Maa Khuotuv Khazing maa ruechuopa Khrih Zingsuv thueta Khrih Zingsuv lucuotuv a cuopa Paul ta,

²Zangna lie i saata tah a cuopa Timote kha caa ica paphya. Paa Khazing hne Khrih Zingsuv'a taata vihnyina, nangduena hne diena ca na cunglie aw mangsue.

³Masidonia luo i tlaw ningta ica changpa haakhata Efesa khy lie kha zaa ngaa la aa dang lipa pacuvna a pacuvtuv tie kha pacuv li tli riypata za thlu karue yi tapa ica khing.

⁴Zangna ta pachang khu a cuopa Khazing khuekhuona kaw kha pacuv cuopa ta, a-i-achuena dyi a chiykhyipa phungpa cakhawpa hne a chuo the lipa thukina cazing kaw rina lie zaw amaa pituv li riypa kha thlu tie yi

⁵Hinghaapa bietaana ta aa tingpa ca pathiypalung pathepa, achie-apha thleduona hne zangna singsaapa taata a pyapa duena tana a cuo.

⁶Cawsaa chekha ca hingpa taahingta luopie yite siyluo a hnyi lipa a-i-achue cakhawna luo kha ama chiy.

⁷Khaama ma ri tapa kha pachang li pata hne amaa daakhyipa kha khaama tapa pachang li pata phungbie saya cuo kha ama khing.

⁸A cuona haata hmuopa kieca phungbie hing a pha tapa ca ma pachang.

⁹Kiema ta ma pachangpa ca phungbie hing aa dangpa tie cuota sapa cuo li pata phungbie a ziy lipa tie hne a patluopa tie, Khazing abie lipa tie hne a suepa tie, a pathe lipa tie hne Khazing siysaa ri li pata biena a hnyi lipa tie, a nung hne a paa a thiepa tie, cawsaa a thiepa tie,

¹⁰aparuvsuena a tuepa tie, canungcapaa phung li pata aw hne a hmuopa tie, sii ta sung a palipa tie, a hangpa tie, a hmuo lipa lie tehte a cuopa tie, aa hmuopa pacuvna hne a carie pata a awpa tie cuota tuepa tana a cuo.

¹¹Capaca kama phu riypata ina pipa thluechiy Khazing thuophaabie a rungnaapa haa khatana a cuo.

¹²Kama thaazuo naa pituv Khrih Zingsuv ma Byipaapa kha i law, tahematapakieca zangtluo aa tlapa ta na rue te a re hrie riypata ina hmuo.

¹³Ahluo ta ca Khazing thuo a pachituv, hrisaathieruetuv, hne hnaapahnawtuv ta i za cuo. Cuorasala, Khazing nangduena kha i hmung, tahematapakieca pachang lipa hne zang li pata i za tuepa a cuo nakawtana a cuo.

¹⁴Abyipa vihnyina ca Khrih Zingsuv chunglie zangna hne duena zaw hne khata i cuota a le ta a lepathla.

¹⁵Khrih Zingsuv ca a suepa khuo riypatana chuelyi luo aa zuv tapa ca aa hmuopa hne cuhluo aa tlapa tana a cuo. Capa a suepa zaw hrawlie ca kama hing a suecepa tana i cuo.

¹⁶Cuorasala capa kawlie cata Abyipa ta nang ina due pata a cuo. Zingsuv Khrih ta a suecepa i cuona cangta chuozaa hringna hmung riypata ama a vya zang riypa tie a mangpuo riypata na tue te, a cuo khuna chung ta i cunglie kha a palung a pasiy.

¹⁷Chuozaa Siepahruo, a thiy the lipa, hmung khu a cuo lipa, ama dyi Khazing a cuopa ca chuozaa ta pa-uvsathyipa hne rungnaana pipa ta cuo mangsue. Amen.

¹⁸I saacapaa, Timote, nama kawlieta profet tie ama za ri ciepa haata, capa bie ca ziy pata a phace pata naa du khu riypata ica chang.

¹⁹Zangna hne a chie a pha thleduona kha a patuv pari tie. Cawsaa chekha ca chiephathleduona siysaa ama ri li nakawta ama zangna kha a ra tli.

²⁰Iema hrawlie ca Hymenaias hne Alekzandar kha amaa te ra. Khazing thuo pachi li riypa amaa cuv the riypata iema kha Setaa kuv chung luo i pi tli yi.