Read Lautu Chin 1 Timote 2 Bible Online

1 Timote 2 - Lautu Chin bible

1 Timote 2

¹Cakhutaata, a hmietaace ta ica chang khingpa yi ca, cawsaa bangkhuo cuota Khazing'a luo kha ngiechi ahiena, thlaachuona, thlaa a chuopana, hne palungtluobie hluona kha hnyi tie ung.

²Hnaanguo pata hne a dieta tah ma aw the riypa hne Khazing ciyzaana hne zyazaaphana ta ma aw the riypata siepahruo hne relepa a hriepa tie cuota thlaa chuo tie ung.

³Caca Khuotuv Khazing hmielieta aa hmuopa hne cuhluo khu riypata a cuo.

⁴Abyipa ca cawsaa bangkhuo khuopa cuo riypa hne biehmisipa ama pachang riypa kha a khing.

⁵Tahematapakieca, Khazing pakha dyi aw te; Khazing hne cawsaa a lala lieta arena a tuetuv pakha dyi a aw. Ama ca cawsaa ta a cuopa Khrih Zingsuv cuote,

⁶cawsaa bangkhuo khuo riypata a luv a pipa tana a cuo. Ningcuo aa de tiyta paluosapa pamangsana ta a cuo.

⁷Capa repa catana kama hing tluo-utuv hne lucuotuv, Jentail ming hrawlie zangna hne biehmisipa[1] pacuvtuv ta tuepa i cuo. Biehmisipa na ica chang yi, hang va ang.

⁸Cacuonakawta, capaa bangkhuo ca hmangting lie kha hihaa lipa hne a hru a i li pata nama kuv pathepa kha pazuu ungla thlaa nama chuo riypata i khing.

⁹Cahaa cata, canung zaw kha ade-akhaw pata hne mang a ngie pata caw a tue yi se. Ama suo kha tuepaluena te ta a cataw pata siyy, lungvaa hne caw muoruvtuvpa kha a tue kha yi se.

¹⁰Cuorasala Khazing a ciyzaapa canung zyazaa ta a cuopa hmangpha tuena tuv kha a hryi yi se.

¹¹Canung[2] ca rawcanawna hne a dieta tah a cuv se.

¹²Ahung canung hmuo pacuvtuv cuo riypa hne capaa[3] cunglie naw hnyi riypata khing va ang; a dieta tah aw thluo se.

¹³Tahematapakieca Adam kha sataapa cuote cakhutaata Evi kha sa pata a cuo.

¹⁴Adam ca dung khupa za cuo li pata, Evi tuv kha dung khupa za cuote suena a tuetuv a za cuo.

¹⁵Cuorasala canung ca zangna, duena, pathena hneta mang a ngiesa pata a aw kieca saata sana thue hingta khuopa a cuo aa.