Read Lautu Chin 1 Timote 3 Bible Online

1 Timote 3 - Lautu Chin bible

1 Timote 3

¹Ahung a cuo zaw Khrihsaabuv luochiytuv cuo kha a khing kieca rephapa na a khing, tapa bie ca aa hmuopa bie tana a cuo.

²Khrihsaabuv luochiytuv ca syi riy a aw lipa, napuv pakha dyi a hnyipa, a cadang a thepa, singvaasa pata a awpa, pa-uvsathyi tluo a tlapa, khyche a duepa, pacuv a thepa cuo'a te;

³sahmaa a pariy thepa cuo'a vyi, a hruo thepa cuo li pata a palung a nepa a cuo aa. Malie hne a hru thepa cuo li pata tuokaa a khing tuvpa cuo'a vyi.

⁴A ingchungkhue a phata tah a uv khupa cuo'a te a saata zaw ca malie ri a ngiepa hne cawsaa pa-uvsathyi a thepa ama cuo aa.

⁵Ama ingchungkhue hmuo a uv the li kie Khazing khrihsaabuv ca tuokhaatama a mangchiy khu aa?

⁶Khrihsaa a cuo thaapa cuo'a vyi. Cacuolikieca ahruo tle'a te aa pale sue kieca Setaa suephawna luo khana a tla sue aa.

⁷Cadyi cuo li pata, ama ca khrihsaabuv le luo a awpa tie ta ama pa-uvsathyipa a cuo aa. Cacuolikieca a thuo chi'a te Setaa cyihyi lie a uo sue aa.

⁸Cahaa cata khrihsaa uvthyi zaw ca a zyazaa phapa ama cuo aa. Bie a khing lipa, sahmaa a pariy lipa hne tuokaa luota a karuo a aw lipa a cuo aa.

⁹A pathepa chiephathleduona ta zangna bieparuv kha a patuv paluopa a cuo aa.

¹⁰Dyapasya taapa cuo'a yite syi riy a aw lipa ama cuo kieca khrihsaa uvthyi kha hrie yi se.

¹¹Ama napuvnung[4] zaw kha a zyazaa phapa cuo'a yite, cawsaa kawchie a ripa cuo'a vayi. Cuorasala a cadang thepa hne hmangting lie zangtluo aa tlapa a cuo aa.

¹²Khrihsaa uvthyi ca napuv pakha dyi hnyi'a te, ama saata hne ama ingchungkhue kha a uv khupa ama cuo aa.

¹³A phata tah re a hriepa khrihsaa uvthyi ca hmiephaa hmung yite Khrih Zingsuv ama zangna kaw kha riephasa pata ama ri nguo.

¹⁴A ru hluo ta niema'a luo i vya tlaw khu thlu aa tapata i nguopuo, cuorasala hingpa caa niema'a luo i vya capepa ca,

¹⁵i vya haa sue kieca, Khazing chungkhue lie hing tuokhaatama ma aw aa tapa kha nama pachang riypatana a cuo. A hringpa Khazing khrihsaabuv ca biehmisipa a tungpuv hne a hruo tana a cuo.

¹⁶Ma biena bieparuv hing khatluv tama a le tapa kha ahungtahmuo zang li pata aw vayi. Ama[5] ca saapa ta a luo te, Thlaapa lie duopacupa a cuo. Avuoming ta hmung yite, Jentail ming hrawlie phupa a cuo. Alyicung bangkhuo lie zang yite, rungnaana luo lathawpa a cuo.