Read Lautu Chin 1 Timote 5 Bible Online

1 Timote 5 - Lautu Chin bible

1 Timote 5

¹Uvthyi vie kha chuo kha yi, na paa haakhata rue la paakie la chang tie. A syi vie tie kha na nuta haata rue tie yi.

²Canung uvthyi vie kha na nung haata rue yi la, canung a syi vie tie kha pathiypalung pathesa pata na sieta haata rue tie yi.

³Nunghlyi a cuo hmisipa tie kha pa-uvsathyi tie yi.

⁴Nunghlyi ta saata a cuo li kie samingta a hnyi kieca iema chungkhue cuota ama hrie riypata a cuopa biena luo kuo ta hrie riypa phung kha a cuv taa yi sala ama nungpaa tie kha mangsang hriy yi se; tahematapakieca caca Khazing hmielie palungtluona tana a cuo.

⁵Ama se ta a awpa nunghlyi hmisipa ca a nguopuona kha Khazing'a lie chi te, chungzuo ci li pata thlaa a chuo.

⁶Cuorasala saapa anuona cuota a hringpa nunghlyi ca a hringpa ta athiypa tana a cuo.

⁷Iema ca syisaapa ama cuo li riypata hing nawbie hing pi tie yi.

⁸Ahunghmuo cuose a tieriy, a hlyi vie ta a chungkhue kha mangchiy li pata a aw kieca zangna a thawpa hne zanglituv tie laata a chie viepa tana a cuo.

⁹Kung sawcaruv a hlyipa hne yikha dyi navaa zaa hnyi buopa kha nunghlyi cazing lie pangie tie.

¹⁰Repha hriena lie ming a hnyipa, a saata zaw a phasa pata a mangchiypa, khyche a duepa, mingpathepa tie phyi a pasiypa, ruvnaana a tawpa tie a byapa, hne hmangpha tuena lie a cuo hne a thaazuo a pipa a cuo aa.

¹¹A kungnupa nunghlyi tie kha ca cazing lie pangie kha yi; tahematapakieca saapa khingna ta Khrih hne che'a yite navaa ama hnyi khing aa.

¹²Cahaa cata bie amaa kuo taapa kha ama para nakawta suephawpa ama cuo aa.

¹³Cadyi cuo li pata, ingkha hnang ingkha a khie yite thaathuvna ta ama cuo kha ama pachuo. Ama thaathuvpa dyi cuo li pata malie kaw ri yite, bierangle yite ri li'apa ting ta ama ri.

¹⁴Cacuonakawta a kungnupa nunghlyi ca navaa hnyi pakhaa thluo yi sala, saa sa yi sala amaa chungkhue kha mangchiy yi se tapa i khing. Cata a cuo kieca ma carie tie ta malie rithuochi khu'a vayi.

¹⁵Tahematapakieca nunghlyi chekha ca Setaa ziy riypata amaa pali tli.

¹⁶Zangtuv canung[8] ta nunghlyi hmisipa tieriy a hnyi kieca, ama ta mangchiy sala khrihsaabuv hmangriy cuo kha se. Cakiedyina khrihsaabuv ta a buchuo riy a hnyi hmisi lipa nunghlyi tie kha aa bya khu'a yi.

¹⁷Khrihsaabuv kha a phasa pata mangsang te a hlyi ta phungri hne pacuv kha te a maapa Khrihsaa uvthyi ca hrie muo lehning ta hmung aa phuvpa tana a cuo.

¹⁸Tahematapakieca Caapathepa ta, “Suo a ciy nguoluopa cuetungpa kha a hmya hy kha,” ta te, “Rehrietuv ca hrie muo kha hmung aa tla,” a ta.

¹⁹A cawce ta a daakhyituv pahning pathung chuo ama aw li kieca khrihsaa uvthyi kha sue ama phaw tiyta naathlie kha.

²⁰Suena a tuepa tie kha zaapuv hmielie pasiypa-ya yi la a hrangpa zaw kha ama ciy aa.

²¹Hingpa pacuvna hing akuo ta a daana hne thleduona hnyi li pata na ziy riypata Khazing hmielie hne Khrih Zingsuv hmielie hne a tlawpa avuoming hmielieta a raaringna ica pi.

²²Khazing rehrietuv cuo riypata ahung cunglie hmuo a catli pata na kuv va khang kha.

²³Na riy a pasa thesa nakaw khata tiy dyi dang li tli pata mingsuv tiy kha a cawta tah za dang tie.

²⁴Cawsaa chekha suena ca a siesa pata a luo te ama suena ca iema hluo ta bieripana luo a chiy taa ning kha, a hrangpa tie suena ca a hnang ta aa luo.

²⁵Cahaa cata repha hriena zaw a luo te, a luo li kie zaw ma nu pari khu aw vyi.