Read Lautu Chin 1 Timote 6 Bible Online

1 Timote 6 - Lautu Chin bible

1 Timote 6

¹Sii a cuopa bangkhuo ta ama ziy tie kha ciyzaa riypatana ama cuo tapata rue yi se. Cakiedyina Khazing ming hne pacuvna kha ripachie li pata ama aw aa.

²Zangtuv a cuopa ziy a hnyipa tie ta khrihsaa uvnu na ama cuo ra thluo tapata nama ziy kha pa-uvsathyi li pata aw kha ung. Nama re hriepa thlahnena a hmungpa tie ca nama duepa hne zangtuv ama cuo nakawta ama re kha khuo vie ta hrie tie ung. Hingpa ica changpa hing pacuv yi la ziy riypata pasu tie yi.

³Ahung a cuo zaw, a phanghrang ta pacuv yite ima Byipaapa Khrih Zingsuv bie aa hmuopa hne ma biena phung haata pacuvna kha a cuhluo lipa ca,

⁴a hruotlepa, khaahmuo a pachang lipa, a hnaatluo lipa ruena hnyi pata, biesuo kawlie zaw a-i-achue khingpa tana ama cuo. Capa cata hietliena, palung a lu lina, kawchie a rina hne a ruvphuvna,

⁵biena hing hnyirungna luopuv suokha ta rue yite pathiypalung phya a pha lipa tie hne biehmisipa a hringkhyi lipa tie zaw hneta ci li pata bie a ina kha a chiykhyi.

⁶A hnyi thathiypa cunglie a palung a tlingpa cuota ca biena hing hnyirungna ta a cuo hmisi.

⁷Tahematapakieca chuelyi luo hing khaahmuo zaa puv khyi va puv, cahaa cata khaahmuo a phyale khu'a va puv.

⁸Cacuonakawta ning riypa sa hne abuv-ase riypa cawsie ma hnyi kieca ma palung a tling riypatana a cuo.

⁹Cuorasala hnyirung a khingpa ca pasupaliyna luo kha tla yite rakyina luo a chiykhyi khupa yi ngaana hne ciy aa chiypa ama khingna khata cyihyi pa-uo ta a pa-uo yi.

¹⁰Tuokaa khingtuvna hing pha lina phangting pyana a hruo tana a cuo. Cawsaa chekha ca hnyirung ama khingtuvna lie kha zangna taata luo pie yite ngiechi kharuehaa vuosuo pata ama aw.

¹¹Cuorasala nama ca Khazing cawsaa na cuo nakawta hingpa zaw hing cahriy la, adangna, Khazing ciyzaana, zangna, duena, ang khuna hne palungnena zaw kha hnyi tie.

¹²Zangna cuota aduna lie hing a phace pata temaa la chuozaa hringna kha hmung a zue tie. Capa repa cata kupa cuo ung cate cawsaa hluvpuv hmiekunglieta tehte nama khuopa khata a cuo.

¹³Hmangting bangkhuo hringna a pituv Khazing hne Pontius Pilat hmiekunglie a phata tah tehte a khuopa Khrih Zingsuv hmiekunglie ica changpa ca,

¹⁴ma Byipaapa Zingsuv Khrih aa luona te ta hing nawbie hing syisaa riy aw li pata ziy tie.

¹⁵Capa ning ca thluechiypa ta a cuopa pakha dyipa Khazing, siepahruo tie Siepahruo, hne byi bangkhuo Byi a cuopa Khazing ta a ningcuo aa rawce ningta a vya patlung sa aa.

¹⁶Ama dyi hingna a thiy the lipa, cadi nguo a cuo lipa, khena chunglie a awpa hne ahungtahmuo ama hmung buo lipa hne ama hmung khu li pata a cuo. A cunglie ta pa-uvsathyina hne chuozaa pena naw aw mangsue. Amen.

¹⁷Hing chuelyi lie a hnyirungpa tie kha amaa palepatie li riypata hne aa hmang lipa hnyirungna cunglie anguopuona khuotuv ta ama hnyi li riypata chang tie yi. Cuorasala ma hring a nuona riypata hmangting kha pahyasa pata malie a pipa Khazing cunglie kha anguopuona hnyi hriy yi se.

¹⁸Phana tue hne hmangpha tuena lie hnyirung pata pahyana hne malie a pipachaa thepa ama cuo riypata chang tie yi.

¹⁹Cahaa cata iema ca hmie luo ama hruo cuna riypata sue a pacungpa cuo'a yite hringna hmisi ta a cuopa hringna kha ama hmung aa.

²⁰Timote, chaw riypata aca pipa hmang ca a phata tah chaw tie. A pyalyipa hne siyluo a hnyi lipa bie a inapa, cawsaa chekha ta a hmuo li pata, “singna,” ama tapa kha cahriy tie.

²¹Cawsaa chekha ta capa singna ca ma hnyi tapata amaa rue raalaa ca zangna kha ama hla. Niema'a lie vihnyina aw mangsue.[9]