Read Lautu Chin 2 Timote 1 Bible Online

2 Timote 1 - Lautu Chin bible

2 Timote 1

¹Khrih Zingsuv chunglie a awpa, hringna hne a patuvpa biekuona haata Khazing khingna chunglie Khrih Zingsuv lucuotuv ta a cuopa kama Paul ta,

²I duepa i saacapaa Timote, caa ica paphya. Paa Khazing hne ma Byipaapa Khrih Zingsuv'a taata vihnyina, nangduena hne diena ca na cunglie aw mangsue.

³Ma mingchingmingvuo tie ta amaa zaa biepa haata palung pathesa pata i biepa Khazing ca, chungzuo ta i thlaachuona lie icaa thyi kyry ta i law pari.

⁴Na mingthliy tlapa kha a thyi pari ang te alawna hne i bi riypata nama kha ica hmung khingsa.

⁵Nama'a lie a awpa a pakhipa ta a cuo lipa na zangna kha i thyi. Capa zangna ca na mingnung Lois hne na nung Zunis ta za hnyi taa yite nama zaw hing na hnyi ra tapata i zang.

⁶Cacuonakawta na cunglie i kuv i khangna thueta na chunglie a awpa Khazing lasaw kha na pahring pari riypata ica pasu.

⁷Tahematapakieca Khazing ta riechiena thlaapa kha malie a pipa cuo li pata cahrana, duena hne kiema pangpa a uv khuna thlaapa khana malie a pi.

⁸Cakhutaata, Abyipa kaw tehte khuopa kha na nang zaa kha se. Ama cuota thaw a tlapa kama zaw hing na zaakhyi ra kha. Cuorasala Abyipa cahrana lie kha a daa la thuophaabie cuota ruvnaana ang kha kama hing naa hraw tie.

⁹Malie khuo te a pathepa kuna ta malie a kupa Khazing ta kiema hriena thueta cuo li pata ama atingna hne vihnyina thue tana a cuo. Hingpa a vihnyina hing cuo hruothu hluo taata Khrih Zingsuv thueta pipa ma cuo tli.

¹⁰Cuorasala capa vihnyina ca Khuotuv Khrih Zingsuv aa luona thueta phupa a cuo tli. Ama ta thiyna kha para te hringna hne thiy khu li tlina kha thuophaabie thueta khena luo a vya chiykhyi.

¹¹Capa thuophaabie pathyi sa riypa catana kama hing lucuotuv hne pacuvtuv hne saya[1] re pipa i cuo.

¹²Cacuonakawtana hingpa ruvnaana hing i ang pata a cuo. Cuorasala i nang zaa vyi, tahematapakieca ahungma i zang tapa kha pachang ang te, ama i cake sapa hmang kha capa ning te cata a cake khu aa tapata a siesa pata i zang.

¹³Kama'a taata na thyipa a tluotlingpa pacuvna kha Khrih Zingsuv chunglie a awpa zangna hne duena ta a patuv tie.

¹⁴Kiema chunglie a awpa Thlaapa Pathe abyana khata nama'a lie aca pipa rusungpa kha a phata tah mangsang tie.

¹⁵Asia ruo lie a awpa bangkhuo ta inaa ruosepa yi kha na pachang, capa zaw hrawlie ca Figelas hne Hermogenes zaw ama aw ra.

¹⁶Onesiforas chungkhue tie kha Abyipa ta nangdue thi yi se, tahematapakieca yi hluvpuv thaazuo thaa na pi te thaw i tlapa hing na zaakhyi vyi.

¹⁷Rom luo a vya chiy pahne ta palung hmisi ta na huv te inaa taw.

¹⁸Abyipa ta a hnangcawcepa ning lie khiy a nangduena pahmung sa mangsue! Efesa lie kha i cuota khatluv tama re a hrie tapa kha a phasa pata nama pachang.