Read Lautu Chin 2 Timote 2 Bible Online

2 Timote 2 - Lautu Chin bible

2 Timote 2

¹I saacapaa, nama ca Khrih Zingsuv'a lieta a awpa vihnyina chunglie kha a cahrasa pata aw tie.

²Tehte hluvpuv hmielie kama'a taata na thyipa kha malie a pacuv pachaa khu riy'apa, zangtluo aa tlapa tie kha pi tie yi.

³Khrih Zingsuv rieka pha pakha haakhata ruvnaana kha ang ra tie.

⁴Rieka lie re a hrie nguoluopa ta ca a byipaapa palung patling riypa kha aa tingpa a cuo nakawta khychung re hrangpa lie kha a kalaa ra vyi.

⁵Cakhutaata cang-iena azuena lie zaw kha ziyphung haata a zue lipa ca ahunghmuo tena lakhuv hmung vayi.

⁶Re hrie te a maapa, lu a thlupa ca thyipaa kha a hmung taa riypatana a cuo.

⁷Ica changpa yi hing rue ungla Abyipa ta hmangting lie kha pachangna aca pi'a yi.

⁸I phupa thuophaabie ta a cuopa, thiyna taata a thupakhaapa David saming Zingsuv Khrih kha maw khya.

⁹Capa kawlie cana a suepa haata thaabuoliriy ta cakhiyna te ta ruvnaana i ang. Cuorasala Khazing bie ca thaabuoliriy ta hre khupa cuo vyi.

¹⁰Cacuonakawta a tlawpa tie ta Khrih Zingsuv'a lie a awpa khuona kha chuozaa rungnaana hneta ama cu the riypata hmangting kha i ang law.

¹¹A raw luo'apa bie hing aa hmuopa bie ta a cuo. Ama hneta ma thiy kieca, ama hneta ma hring pakhaw aa;

¹²Ma ang khu kieca, ama hneta ma uv pakhaw aa; Ama kha ma thaw kieca, ama zaw ta malie a thaw ra aa;

¹³Kiema kha zangtluo maa tla li zaw ma, ama ca zangtluo a tla pari, tahematapakieca ama hne ama kha a thaw khu vyi.

¹⁴Khaahmuo thlahnena hnyi li pata a thyituv tie dyi a parapa bie a ina kha cahriy riypata iema kha Khazing[2] hmielie a raaringna pi yi la chang canyi lawmaw tie yi.

¹⁵A hmisipa bie kha a phata tah pasie sa khu te a zaakhyi riy a hnyi lipa hne ama ta a pha a tapa rehrietuv pakha a daahmang taata nama hne nama kha a phace pata Khazing'a luo a pi tie.

¹⁶A pyalyipa hne siyluo a hnyi lipa bie a ina kha cahriy tie, tahematapakieca cawsaa khana Khazing siysaa ri lina luo a chiy hryly'a yi.

¹⁷Iema pacuvna ca a cakule hrylypa hmaa hne tana aa lu. Iema hrawlie ca Hymenaias hne Felitas ama aw ra.

¹⁸Iema ca biehmisipa taata pie yite a thiypa tie thupakhaana ca a tlung tli tapata cawsaa chekha tie zangna kha ama patawpamuo.

¹⁹Cuorasala Khazing ta a cupa hruo kha padaa te, capa hruo lieca, “Abyipa ta ama huopa tie kha a pachang yi,” tapa hne, “Abyipa ming a upa bangkhuo ca pha lina taakhata amaa yi se,” tapata caa aa khe.

²⁰Inglesapa suokha chunglie kha siyy hne ngu ta dyi cuo li pata thing hne acyi ta ama tuepa biphie a phangphang ta aw te, chekha ca cuo sungnaapa ningta hmuopa cuo yite chekha ca a cakhawpa ningta hmuopa ama cuo.

²¹I ripa haakhata iema hne iema a pathe sapa tie bangkhuo ca ingziypa cuota pathesapa hne cuo sungnaapa ning lieta hmuopa hmangpha ta cuo'a yite, rephapa bangkhuo lie hmuo thepa ama cuo aa.

²²Mingnu cuoning saapa khingna kha cahriy la, pathiypalung pathesa pata Abyipa a upa tie hne khata adangna, zangna, duena, hne diena kha hmung a zue tie.

²³Ngaana hne pachang laliy li pata bie a ina kha cahriy tie. Ahruna dyina a chiykhyi tapa kha na pachang.

²⁴Abyipa changtaapa[3] ca malie hne a hru thepa cuo'a vyi. Cuorasala cawsaa bangkhuo cunglie duedingna a hnyipa, pacuvtuv pha, a palung pasiypa hne,

²⁵a dutuv tie kha palungnena hne a pasiy a payapa a cuo aa. Khazing ta a ngiepachiyna hne biehmisipa pachangna kha pi'a yite,

²⁶Setaa ta ama khingna tue riypata a hrenapa yi cyihyi taakhata ama vya law ngiethie aa.