Read Lautu Chin 2 Timote 3 Bible Online

2 Timote 3 - Lautu Chin bible

2 Timote 3

¹Ning hnangcaw luo thueta ca ruvnaana cuo a hluvpuv a tlung aa tapa kha pachang tie.

²Tahematapakieca, cawsaa ca iema cuo dyi a ruepa, tuokaa a khingpa, ahruo a tlepa, a palung a lepa, malie a esepa, a nungpaa a ciyzaa lipa, duena a pachang the lipa, a pathe lipa,

³cawsaa palung a phya lipa, malie a ngiethe khu lipa, malie thuochi a ripa, a cadang li pata tuokaa a hmuo cakhawpa, a hruopa, hmangpha a huepa,

⁴malie a lyipa, rue taa li pata re a hriepa, a mingchiepa, Khazing khing li pata anuona a khingpa,

⁵a cungphang ta Khazing khing pakhi yite a cahrana a paw lipa ama cuo aa. Iema kha cahriy tie yi.

⁶Tahematapakieca iema chung taata chekha ca ama ingchung luo kha a ngie hnue yite, ama khingna ziy pata suena hne a hringpa, a ruena a cawpa canung tie kha ama sawle khu.

⁷Hingpa canung tie hing amaa cuv byalya raalaa pata biehmisipa pachangna te pha khu the vayi.

⁸Jannes hne Jambres ta Moses kha amaa du pahaata ruena a pha lipa hne a pakhipa zangna a hnyipa cawsaa zaw khata biehmisipa kha amaa du ra.

⁹Cuorasala iema ca asyi ru'a vayi. A cunglie ma ripa cawsaa pahning[4] tie haakhata ama ngaanapa ca cawsaa bangkhuo hmielie phu pata a cuo aa.

¹⁰Ata hing nama ca i pacuvna, i zyazaa, i tingnapa, i zangna, i palung pasiyna, i duena, zangna lie i cuna zaw kha na hmung mangtli.

¹¹Antiok, Ikonium hne Listra lie i angpa hrisaathieruena hne ruvnaana zaw kha na hmung mangtli. Tuokhaapa hrisaathieruena ma i ang! Cuorasala Khazing ta khapa bangkhuo taakhata ina khuo.

¹²Hmisi ta kieca, Khrih Zingsuv chunglie Khazing ciyzaana hring a hnyi khingpa bangkhuo ca hrisaathieruena ama ang aa.

¹³Cuorasala cawsaa pha lipa hne a hanghiepa tie ca ama pha lina kha ruv vie hryly'a te, cawsaa kha dung'a yite cawsaa ta ama dung aa.

¹⁴Cadyiseca, nama ca naa zaa cuvpa hne a cupa na zangna lie kha a cusa pata a daa pazue tie. Ahung'a taata ma naa cuv aa tapa kha pachang cate,

¹⁵Khrih Zingsuv na zangna thueta nama kha khuona hmung riypata luo caa pahmung sa khupa Caapathepa kha na cawta baataata tuokhaatama na za pachang tapa kha na pachang.

¹⁶Caapathepa hing a bangkhuo ta Khazing ta huv a sungsuepa cuote, pacuvna, aa hmuo lipa pacuvnapa ina, aa hmuo lipa hmang parena, a dangta tah hringna riypata cawpana tah a thlahnepa tana a cuo.

¹⁷Cahaa cata Khazing rehrietuv ca a tluotlingpa cuo'a te hmangpha ting hrie riypata cehre phangtling a hnyipa a cuo aa.