Read Lautu Chin Titas 1 Bible Online

Titas 1 - Lautu Chin bible

Titas 1

¹Khazing changtaapa[1] hne Zingsuv Khrih lucuotuv ta a cuopa kama Paul ta caa ica paphya. Kama ca Khazing a tlawpa tie ta zangna hne biehmisipa ama pachangna lie Khazing ciyzaana hne ama lethaw hryly riypata pathliepa tana i cuo.

²A hang buo lipa Khazing ta capa chuozaa hringna anguopuona ca cuo hruothu hluo taata biekuo ciepa cuote,

³a cuo aa de ningta a phupa a cuo. Capa thuophaabie phu riypa cata Khuotuv Khazing biepina haata zang pata re pipa i cuo.

⁴Zangna suokha a hrawna chunglie i saata hmisi ta a cuopa Titas'a luo hingpa caa hing ica paphya. Paa Khazing hne Khuotuv Khrih Zingsuv'a taata vihnyina[2] hne diena ca na cunglie aw mangsue.

⁵Krit lie ica chi siy napa ca ica changpa haakhata, hrie riypata a ngaa kaliepa re kha a phata tah na hrie riypa hne khy ting ta Khrihsaa uvthyi chi riypa khatana a cuo.

⁶Khrihsaabuv luochiytuv pakha ca, syisaa riy a hnyi lipa, napuv pakha dyi a hnyipa, a saata zaw zangtuv cuo'a yite anuopaana luota thuochi a phyapa hne ri a ngie lipa cuo'a vayi.

⁷Khrihsaabuv hruetuv ca Khazing re lie mangchiykingkaatuv a cuo pahaata, syisaa riy a aw lipa a cuo aa. Ama ca a hruotlepa, a pathiy pachangpa, sahmaa a pariy thepa, a hruopa hne a karuo awpa cuo'a vyi.

⁸Cuorasala, ama ca khyche a duepa, phana a khingpa, a singvaapa, aa dangpa, Khazing'a luo te a maapa, ama hne ama a uv khupa a cuo aa.

⁹Ama ca pacuvna aa hmuopa kha a cusa pata a patuv'a te, aa hmuopa phungluo kha a pacuv khupa hne aa hmuo lipa pacuvna kha a i khutuv ta a cuo aa.

¹⁰Tahematapakieca a du a hmuopa cawsaa hluvpuv, thlahnena a hnyi lipa bie a ripa hne a hanghiepa hluvpuv aw yite, a hlyi ta vangdaw a tepa tie chung taata ama cuo.

¹¹A dieta tah aw yi se, tahematapakieca, aa hmuo li pata tuokaa hmungkhingna vuota pacuv riypata a pha lipa kha pacuv yite chungkhue bangkhuo ngie ama pachi.

¹²Iema chunglie pakha ta a cuopa ama profet pakha ta, “Krit ming ca a hang paripa, saruopa haata cawsaa pha lipa, a thaathiypa hne ning a rangpa tana ama cuo,” a ta.

¹³Capa tehtekhuona ca aa hmuopa tana a cuo. A hmuopa zangna ama hnyi the riypata capa kawlie ca khuosa ta chuo tie yi.

¹⁴Judah ming phungpa hne biehmisipa a dupa tie nawbie kha siysaa ri li pata aw tie ung.

¹⁵A pathepa tie cuota hmangting hing pathe te, a rapa hne a zang lipa tie cuota ca a pathepa aw vyi. Ama pathiypalung hne ama chiephathleduona khana a ra tli.

¹⁶Iema ca Khazing kha ma pachang ama ta raalaa pata, ama tuesana khata ama kha ama thaw. Iema ca duv aa chiypa, ri a ngie lipa, hne tuokhaapa hmangphapa hne tahmuo aa tla lipa tana ama cuo.