Read Lautu Chin Titas 2 Bible Online

Titas 2 - Lautu Chin bible

Titas 2

¹Cuorasala nama ca, aa hmuopa ziyphung hne aa tlapa pacuvna kha pacuv tie.

²Capaa uvthyi vie tie kha a ruepacuo thepa, a hmuochuopa, a ruedaw thepa, zangna aa hmuopa a hnyipa, duena a hnyipa hne ang khuna a hnyipa ama cuo riypata chang tie yi.

³Cahaa cata canung uvthyi vie tie zaw kha hringcuozyazaa lie pa-uvsathyi aa tlapa, malie thuo a pachipa hne dang li pata a aw khu lipa ama cuo li riypata chang tie yi. Khaapa hingma a pha tapa kha amaa cuv riypata chang tie yi.

⁴Iema ta canung kungnu vie tie kha navaapa a duepa, saata zaw a duepa,

⁵iema hne iema a uv khupa, hringzya pathepa a hnyipa, ingchungkhue a uv khupa, malie kaw a pacuopa, a navaapa a ciyzaapa, ama cuo riypata chang yi se. Cakiedyina Khazing bie hing a thuochi li pata a aw aa.

⁶Cahaa cata capaa kungnu vie tie zaw kha iema hne iema amaa uv khu riypata pasu tie yi.

⁷Nama hrahring kha rephapa lie a mangpuo a tla riypata aw la, na pacuvna lie zaw yi kha a hmuochuosa pata pacuv tie yi.

⁸Syi khu li riypa biephapa kha hmuo la, kiema malie a dutuv tie kha ma thuochi ri riypa khaahmuo ama hnyi li nakawta ama nang a zaa aa.

⁹Sii tie kha ama ziy zaw a ciyzaapa hne ama palung a patluopa ama cuo riypa hne bie ama palie li riypata chang tie yi.

¹⁰Acawta tah nuparuvpa tue li pata zangtluo aa tlapa ama cuona kha paluo sa yi se. Cakiedyina Khuotuv Khazing pacuvna kha hmangting lieta a papuvthe sapa ama cuo aa.

¹¹Tahematapakieca Khazing vihnyina ca cawsaa bangkhuo khuona cuota aa luo tli.

¹²Ca vihnyina cata kiema kha Khazing siysaa ri lina hne chuelyi khingna kha thaw pata hingpa ma chuo chunglie hing kiema hne kiema a uv khupa, aa dangpa, hne Khazing a ciyzaapa ma cuo riypata malie a pacuv.

¹³Cahaa cata kiema ca thluechiypa anguopuona hne a lesyipa Khazing hne Khuotuv,[3] Zingsuv Khrih rungnaana aa luo riypa kha ma huo nguoluo.

¹⁴A pha lipa bangkhuo taata kiema kha a thla riypa hne ama cuo hrahring ta a pathepa cuo riypa hne hmangpha a tue khingpa ama cawsaa zaw cuo riypata kiema cuota a hringna a pipa ca Zingsuv catana a cuo.

¹⁵Hingpa kaw hing pathyisa tie; nawhnyina[4] hneta pasu yi la pacu sa tie. Ahungtahmuo ca mangbung kha yi se.