Read Lautu Chin Filemon 1 Bible Online

Filemon 1 - Lautu Chin bible

Filemon 1

¹Khrih Zingsuv kawlieta thaw a tlapa kama Paul hne ma uvnupa Timote ta,

²ma viesaa hne ma rehriehne ta a cuopa Filemon, ma sieta Apfia, ma rieka viesaa Arkhipas hne na ing lie a pungpa khrihsaabuv kha caa maca paphya yi.

³Ma Paa Khazing hne ma Byipaapa Zingsuv Khrih'a taata vihnyina hne diena ca nama cunglie aw mangsue.

⁴I thlaachuona lie caa thyi pari ang te Khazing kha i pathuo sa.

⁵Tahematapakieca mingpathepa tie na duena hne Abyipa Zingsuv na zangna kha i thyi.

⁶Zingsuv Khrih cuota ma[1] hrie riypa a phapa bangkhuo na pachangpasie thueta na zangna kaw thuophaabie na phupa kha a hma a si riypata thlaa ica chuopa.

⁷I nuta, na duena ta i palung khuopuv ta na patluo sa te thaazuo ina pi. Tahematapakieca mingpathepa tie nama ta mingpathepa tie palung kha na patluo sa.

⁸Canakaw cata, na hrie riypa re kha hrie riypata riephasa pata Khrih ming ta naw ica pi nguo raalaa pata,

⁹kama Paul ta uvthyi vie cuona taa hne Khrih Zingsuv cuota thaw a tlapa cuona taata duena hne paa ica kie.

¹⁰Thaw i tla nguoluo chung ta i saata ta a vya cuopa Onesimas cuota paa ica kie.

¹¹Ahluo taca na cuota khaahmuo thlahne vyi, cuorasala ata hing ca nama hne kama ma cuota a thlahnepa[2] a cuo tli.

¹²Ama kha, i pathiy i palung hneta nama'a luo ica paphya pakhaa.

¹³Thuophaabie kawlie thaw i tlana lie hing kama kha mangsang riypata, nama cuopa ta na aw puo sala tapata i khing.

¹⁴Cuorasala nama palung tling li pata khaahmuo tue khing va ang, tahematapakieca na hmangpha tuena hing hripuo nakaw cuo li pata nama palung thu ta a cuopa i khing.

¹⁵Nama hne kaakha aa chepa hing ama kha chuozaa ta na hnyi khu na riypatana a cuo thlu aa.

¹⁶Na cuota sii pakha haata cuo li pata sii laata a suo viepa duepa uvnu pakha ta a cuo tli. A hlyi ta kama cuota zaw cuote, nama cuota changchiy ca thiysaa lie hne Abyipa chunglie ta na duepa uvnu a cuo.

¹⁷Cacuonakawta kama kha na rehriehne ta ina rue cakieca, kama ina cuhluo'apa haa cata ama kha cuhluo tie.

¹⁸Ama ta na cunglie suena suokhakha a tue kie cuose, suokhakha acaa uo kie cuose, kama cazing lie kha khung tie.

¹⁹Kama Paul ta i kuv ta i cape: Ica thung hrahring aa. Nama pangpa hrahring hing hmuo kama'a lie inaa uopa cakha khaahmuo ri'a va tli ang.

²⁰A cuo, i nuta, Abyipa ming ta ica hiepa hing na pi tie! Khrih chunglie i palung na patluo tie.

²¹I ripa laa hing tahmuo a pha vie ta na tue aa tapa kha pachangna cangta hne na ri-angiena kha zangna cang ta nama'a luo caa i vya capepa a cuo.

²²I vya ri khing kaliepa ca, i tlungna riypata ingkhuo khuokha kha na za chipa pacie tie, tahematapakieca nama thlaachuona thueta niema'a luo ivya chiy pakhaa thlu aa tapata i nguopuo.

²³Khrih Zingsuv'a lie i thawtlahnepa Epafras ta na kuv aca patuv.

²⁴I rehriehne a cuopa Marka, Aristarkas, Demas, hne Luka zaw ta na kuv aca patuv yi.

²⁵Abyipa Zingsuv Khrih vihnyina ca niema'a lie aw mangsue.[3]