Read Lautu Chin Hebru 11 Bible Online

Hebru 11 - Lautu Chin bible

Hebru 11

¹Zangna ma tapa ca maa ruechuopa kha ma hmung hrahring aa tapata zangna hne, hmisi ta a awpa hne a cuopa hmang, ma ming ta ma hmung lipa hmang a aw, tapata zangnapa khatana a cuo.

²Cahaapa zangna ama za hnyi nakawtana ma mingchingmingvuo tie zaw ta Khazing palung kha ama za hmung.

³Chuelyi hing Khazing bie tana sapa a cuo tapa kha zangna ta ma pachang. Cacuonakawta hmung khupa hmang hing hmung khu lipa hmang taata tuepa a cuopa kha aa luo.

⁴Abel ta Kain laata cuhluo tluo a tla viepa[13] hriykhungrina a pipa ca zangna thue tana a cuo. Capa zangna thue cata cawsaa aa dangpa ta cuhluopa cuote, Khazing hrahring ta a lasaw kha a cuhluo. Ama ca a thiy tli, cuorasala a zangna cata ata tepa hingta bie a ri kalie.

⁵Enok ca zangna thueta thiyna a taw li pata lathawpa a cuo; Khazing ta a la nakawta ahungtahmuo hmung khu va tli yi. Tahematapakieca ama ca lapa a cuo hluo ta Khazing palung a hmungpa a cuo.

⁶Zangna li pata ca Khazing palung patluo khupa cuo vyi. Ama'a luo a pangiepa bangkhuo ta, Khazing a aw tapa hne ama a huvpa kha lawmuo a pi yi, tapa kha ama zang riypata a cuo.

⁷Noah ca Khazing ta hmung li liepa kaw a raaringna a pipa kha zang te a ingchungkhue khuo riypata tiypalaw a sa. Capa a zangna cata chuelyi kha sue phaw te ama ca zangna taata a vawpa adangna rucutuv ta aa li.

⁸Abraham ca ru ta a cu riypa ruo luo kha kupa a cuo tiyta, khaapa luo ma i si aa tapa pachang li pata ri a ngie te zangna ta a si.

⁹Khazing ta bie a kuopa ruo lie kha ruohrang ming haata cuokha chung zangna ta khy a sa. Biekuona suokha kha ru a cu pakhawpa Isak hne Jakob hne khata thluodaa chunglie kha khy ama sa.

¹⁰Tahematapakieca Khazing ta patungpatie te a hruo a bangpa khypuv khana a nguopuona hne a huo.

¹¹Abraham ca macuosa tli te, Sarah zaw saa a sa khu lipa a cuo raalaa pata, zangna thueta paa cuo khuna cahrana kha a hmung. Tahematapakieca biekuona a pituv kha zangtluo a tla tapata a zang nakawtana a cuo.

¹²Athiypa haata a cuo tli raalaa pata, capa cawsaa pakha chung taacata, a samingsahlaa zaw ca puv yite, avuo lie aasiy zaa hne riyliy kielie ri tie lipa viehnang zaa ama ta.

¹³Hingpa cawsaa bangkhuo hing Khazing ta bie a kuopa yi kha hmung li pata zangna chunglie ama thiy. Cuorasala luohlaa taata suo yite bie amaa chang paluo. Chuelyi lie hing khychepa hne ruohrang ming tana ma cuo ama ta.

¹⁴Tahematapakieca hinghaahingta a ripa cawsaa zaw hingta iema huo a cuopa ruo na ama huv tapa kha ama paluo sa.

¹⁵Iema ca ama thuse tlipa ruo khana ngie amaa buo pakhaa tapa cuo sala, kaa pakhaa riypa cuophaa ama za hnyi ri aa.

¹⁶Cuorasala iema ta ama vuopa ruo ca ruo pha viepa, vuoruo tana a cuo. Cacuonakawta Khazing ca iema Khazing tapata ama u pakha a nang zaa vyi. Tahematapakieca khypuv kha iema cuota a parepa mangtli yi.

¹⁷Abraham ta dyapasyana a ang ningta a saacapaapa Isak hriykhungrina ta a pipa ca zangna thue tana a cuo. Biekuona zaa hmungpapaa ca a saacapaa pakha dyipa kha hriykhungrina ta pi riypa a ting pacie diy tli.

¹⁸“Samingsahlaa na hnyi riypa ca Isak ciypathla taahing tana ama cuo aa,” tapata biekuopa tana a za cuo.

¹⁹Khazing ca a thiypa zaw kha a pathu pakhaa khu tapata a zang. A ripa haata Isak ca thiyna taatana a vya thupakhaa ta riypatana a cuo hmisi.

²⁰Isak ta Jakob hne Esau kha hmie luo cuota thluechiy a pipa yi ca zangna thue tana a cuo.

²¹Jakob ta a thiy'a nang cawta Josef saacapaa zaw thluechiy a pipa yi ca zangna thue tana a cuo; a khuecahryi daw kha a padu te Khazing kha abie.

²²Josef ta, a thiy'a nang cawta Israel ming Izipt ruo taata ama law riypa a ripa hne a thiy tiyta a riy kha tuokhaatama nama za tue aa tapata a ri siypa ca zangna thue tana a cuo.

²³A za puv khu taata thlathung a tana te ta a nungpaa zaw ta Moses ama nupa kha zangna thue tana a cuo. Tahematapakieca haatiy thyikhing aa chiysapa kha ama hmung tiyta siepahruo bie khahmuo ciy khu vayi.

²⁴Moses ca a kya lethaw tiyta Faro sacanungnung saacapaa tapata kupa a khing lipa kha zangna thue tana a cuo.

²⁵Suena chunglie cuo pachangta chung anuona laata Khazing cawsaa zaw hneta ruvnaana ang kha a tlaw viepa ca zangna thue tana a cuo.

²⁶Izipt ruo hnyirungna laata Khrih[14] cuota nutaana angpa ca a sungnaa vie karaa tapata a rue. Tahematapakieca lawmuo a hmung riypa khana a pachang lu.

²⁷Siepahruo hihaana khahmuo ciy li pata Izipt ruo taata pya te, palung pasiysa pata a ang lawpa ca zangna thue tana a cuo. Tahematapakieca hmung khu lipa Khazing khana a hmung lu.

²⁸Sa-uvthyi zaw a thiepa ta Israel ming sa-uvthyi zaw kha a thie li riypa yita Lawsena pyi tue te ingchiypakaa tung lie thiy a pathuv sapa yi kha zangna thue tana a cuo.

²⁹Israel ming ta Riyliy Sepa kha alyi huvpa haata ama tepa ca zangna thue tana a cuo; cuorasala Izipt ming ta te amaa zue tiyta tiy lie ama puo diy.

³⁰Ning sariy ama cahlung khu taata Jeriko khypuv dungkhuo a cingpa ca zangna thue tana a cuo.

³¹Rie vaa mangpathliypa Israel ming kha dya a nu nakaw yi ta Khazing ri a ngie lipa[15] tie hneta siyhrawnung Rahab a thiy ra lipa kha zangna thue tana a cuo.

³²I ri vie kalie'a ma? Gideon, Barak, Samson, Jefthah, David, Samuel hne profet tie zaw kaw ri riypa kha a cuo ta naa zu'a vyi.

³³Zangna ta pena hluvpuv kha ama te, a dangsa pata ruo ama uv, Khazing ta bie a kuopa yi kha ama hmung, chingde pakaa kha ama paping,

³⁴aa hlaa nguoluopa myi kha ama pache, zueziy taata ama law, thaadyana taata thaazuo ama hmung, rietuvna lie kha cahra yite ruohrang rieka tie kha ama te.

³⁵Canung zaw ta ama cawsaa a thiypa tie kha pathu pakhaapa ama cuopa ta ama hmung. Chekha ta a pha viepa hringna luo thupakhaa riypata lawna kha hmung khing lipa yi ta tuechiena ama ang.

³⁶Chekha ta pahnyisuena hne tuvna kha ang yite, thaabuoliriy ta ciypakina hne thawtlana zaw kha ama ang.

³⁷Chekha ca alung ta vaasa yite, chekha ca hluo ta ama tepachung. Chekha ca zueziy ta thie yite, chekha ca tuv vang zaw mie vang zaw kha pahryi yite siypasa pata ama aw, riethyi vuosuo pata aw yite hrisaathieruena ama ang.

³⁸Chuelyi hing iema hneta a phuv vyi. Iema ca ruocaa lie hne tluo lie kha a khiele yite, lungkaraw hne alyikhue lie kha ama aw.

³⁹Iema bangkhuo hing ama zangna kawlieta pathuosapa ama cuo raalaa pata Khazing biekuopa hmang kha hmung vayi.

⁴⁰Khazing ta kiema cuota a pha viepa hmang kha malie a tingpa nakawta kiema hne lipa taca tluotlingna hmung'a vayi.