Read Lautu Chin Hebru 12 Bible Online

Hebru 12 - Lautu Chin bible

Hebru 12

¹Cacuonakawta hing tluv ta a hluvpa pachangkhyituv tie ta amyi haata malie ama cadung nakawta hmangriypa bangkhuo hne malie a bepuopa suena hing thawsiy pata ma hmiekunglieta a awpa a ruo azuena lie hing temaana hne a ruo ungsiy.

²Ma zangna hruo a pathutuv hne a patling satuv Zingsuv kha ci li pata mang ungsiy. Hmie luo ta a cu riypa palungtluona kha aa ruechuopa a cuo nakawta vieluo cunglie thiyna nangzaana kha siysaa ri li pata ang te, ata hing ca Khazing thude cacuo luo kuo ta a tu.

³Nama palung riethyi te nama palung a ra li riypata ama hrahring a suepa tie ta hue yite amaa duna kha khatluv tama a ang tapa kha rue tie ung.

⁴Sue namaa duna lie kha nama thiyse langna te tange taca a du valie ungciy.

⁵Khazing ta i saa zaw tapata aca pasupa yi kha maw kanaa ungciy? I saa, Khazing pasiypa-yana kha siysaa ri li pata aw lie ciy, Duo aca te tiyta na palung chuo kha se.

⁶Tahematapakieca Abyipa ca a duepa tie kha pasiypa-ya taw yite, a cuhluopa a saa zaw bangkhuo kha duo a te taw yi.

⁷Pasiypa-yana cuota namaa tawpa ruvnaana kha ang law tie ung. Khazing na a saata zaw haata caa rue yi. A paa ta a pasiypa-ya lipa saata ama aw buo ma?

⁸Saata bangkhuo ta amaa tawpa pasiypa-yana kha namaa taw li kieca saata hmisi cuo li pata riesaa ta nama cuo nakawtana a cuo aa.

⁹Cadyi cuo li pata, malie a pasiypa-ya riypa saapa luo nungpaa kha hnyi yi pate ma pa-uvsathyi yi. Hringna ma hmung na riypata thlaapa luo ma Paa ri changchiy ca a ngie tyly riypa cuo'a vama?

¹⁰Tahematapakieca ma paa tie taca a phace ama tapa haata cuo pachangta chung malie pasiypa-ya yite, cuorasala Khazing taca kiema phana riypa hne ama pathena maa hraw the riypatana kiema kha malie a pasiypa-ya.

¹¹Pasiypa-yana ca ma ang ningta ca palungtluo a chiy li pata ngiechi aa chiypa tana ma rue. Cuorasala cahaa cata pasiypa-yapa tie ca a hnang taata adangnapa diena thyipaa khana ama hmung aa.

¹²Cacuonakawta a thaarisa tlipa nama buo kha pazuu ungla aa cathangpa nama pakhuv kha cahra sa tie ung,

¹³nama cakuona luopuv kha padang tie ung. Cakiedyina a cabiepa tie kha sawkhaw pathla li pata ama tluo aa.

¹⁴Cawsaa bangkhuo hneta a re riypa kha a zue ungla a pathepa hringna kha hnyi a zue tie ung. Hring pathepa hnyi li pata ca ahungtahmuo Khazing kha hmung'a vayi.

¹⁵Khazing vihnyina kha ahungtahmuo cu li pata nama aw li riypata a raaring tie ung. A khapa thingkung kha kya pu te ruvnaana a patlung sa nakawta cawsaa hluvpuv kha a papyapalyipa haayita cuo kha ung.

¹⁶Ahunghmuota aparuvsuena tue li riypa hne Khazing siysaa ri li pata sa luokha ning ta sa-uvthyi cuona a zaapa Esau haata cuo li riypata a raaring tie ung.

¹⁷A hnang taata thluechiy kha a cu khing tiyta bu pata cuote, mingthliy hneta thluechiy kha a huv raalaa pata a ngiepachiyna cuo hnyi va tli.

¹⁸Niema ca hrie khu a cuopa tluo, myi a hlaa nguoluopa, khyzingna, thliychierichie,

¹⁹hmyakaa ue paringna hne ueryi paringsapa zaw awna luo kha namaa vaw pata cuo vyi. Capa ueryi a thyipa tie cata ama thyi vie li riypata amaa nue.

²⁰(Tahematapakieca, “Saruopa hmuota hing tluo hing a de khu kieca alung ta vaasapa cuose,” tapata pipa bie kha ang khu vayi.

²¹Ama hmungpa ca ciy aa chiytuv nakawta Moses ta, “Ciy tuv ang te na i cathang,” a ta.)

²²Cuorasala niema ca Zion tluo hne a hringpa Khazing khypuv, vuoruo Jerusalem, ri tie a aw lipa avuoming amaa hmyana hmang luo khana namaa vaw.

²³Cahaa cata vuoruo lie ming khungpa sa-uvthyi zaw ahmyana, cawsaa bangkhuo bieripatuv Khazing awna, aa dangpa zaw tluotlingna a pituv thlaapa zaw awna,

²⁴biekuothaapa hne arena a satuv Zingsuv awna, hne Abel thiyse laata bie pha viepa a ripa hipa thiy awna hmang luo khana namaa vaw.

²⁵Niema bie caa changtuvpa bie kha i li riypata a raaring tie ung. Tahematapakieca chuelyi lieta iema kha a raaringna a pituv bie amaa ngie li pata hmuo duotena taata ama law li kieca, vuoruo taata a raaringna malie a pituv bie kha maa ngie li kie changchiy ca khatluv ta ma duotena taata law li pata ma aw aa.

²⁶Khapa cuo ning kha a ueryi ta chuelyi kha a cahang; cuorasala atalie bie malie a kuopa ca, “Chuelyi dyi cuo li pata vuoruo zaw kha yikha i cahang kalie aa,” a ta.

²⁷Hingpa, “Chuelyi hing yikha i cahang vie kalie aa,” tapa hingta cahang khu lipa hmang zaw aa hmang riypata cahang khu a cuopa, sapa hmang tie kha hnyi pata ama cuo aa tapa na a paluo sa.

²⁸Cacuonakawta, a cahang khu lipa pena kha ma hmung nakawta a law ungsiy. Khazing kha alawna hneta cuhluo tluo a tla pata pa-uvsathyina hne ciyzaana ta abie ungsiy.

²⁹Tahematapakieca ma Khazing ca a kuo khupa myi tana a cuo.