Read Lautu Chin Hebru 13 Bible Online

Hebru 13 - Lautu Chin bible

Hebru 13

¹Uvcanu haata pakha hne pakha kha a due pari tie ung.

²Khyche kha ing a patlung sa ungla due tie ung. Tahematapakieca chekha ca cahaa cata ama tuepa tana ama pachang li pata avuoming kha amaa patlung sa.

³Thaw a tlapa tie kha maw kha ung. Iema hne thaw a tlapakhawpa haakhata a rue tie ung. Tuechiena a angpa tie kha maw kha ung. Niema zaw tuechiena a ang rapa haakhata a rue tie ung.

⁴Achiyhiena kha cawsaa bangkhuo ta pa-uvsathyi yi se. Nung hne vaa ca zangtluo a tla pata aw kaluo yi se; tahematapakieca a paruv suena a tuepa hne nungvaathingsuena a tuepa ca Khazing na ama bie a ripa'a yi.

⁵Tuokaa khing tuv kha ung; nama hnyi thathiypa lie hing nama palung tluo se. Tahematapakieca Abyipa na, “Ca thuse buo li'apa yi angta ca thaw buo'a vayi ang,” a ta.

⁶Cacuonakawta riephasa pata, “Abyipa ca naa byatuv tana a cuo; Khaahmuo ciy'a va ang. Ahungma tuokhaa naa ta khu aa?” ta nguo tie ung.

⁷Khazing bie cazaa changpa yi nama luochiytuv taapa tie kha a thyi pari tie ung. Ama hringzya taata a kya pyapa phana kha rue pathiy ungla, ama zangna kha a mangpuo tie ung.

⁸Zingsuv Khrih ca azuochaning hne ata ning hne chuozaa ta a nanang buo vyi.

⁹Pacuvna thaahluopa a phangphang ta luo capa pie sa kha yi se; tahematapakieca a ziytuv tie cuota thlahnena a hnyi lipa sa kaw phungluo ziyna ta ma pathiypalung thaa kha patlung li pata vihnyina tuv ta ma pathiypalung thaa kha patlung ungsiy.

¹⁰Bienathluodaa lie re a hrietuv tie ta ningna naw ama hnyi lipa bienatluophie suokha ma hnyi ung.

¹¹Tahematapakieca sue hriykhungrina cuota tluobyilecepa ta hmangpathepa luo a thiy a ngiekhyipa hriykhungrina sahring a pangpa ca bienathluodaa khungthing luo khatana myi ta ama rue.

¹²Cacuonakawtana Zingsuv zaw kha a thiyse ta cawsaa zaw pathe khu riypata khypuv khungthing luota ruvnaana a ang pata a cuo.

¹³Cacuonakawta kiema zaw ama'a luo, bienathluodaa khungthing luo kha pya ung sala ama a angpa nangzaana kha ang ra ungsiy.

¹⁴Tahematapakieca hing chuelyi lie hing a hmangpa khypuv hnyi va puv, cuorasala a vaw riypa khypuv khana maa mangkhuo.

¹⁵Cakhutaata ama thueta Khazing ca pathuo sa pari ungsiy, capaca ma pakaa ta Abyipa ming ma pathuosapa khatana a cuo.

¹⁶Hmangpha tue hne na hnyipa malie a hraw riypa kha siysaa ri li pata aw kha. Tahematapakieca khahaapa hriykhungrina khana Khazing palung a patluopa ta a cuo.

¹⁷Nama luochiytuv tie ri kha a ngie ungla aca changpa haayita ziy tie ung. Tahematapakieca niema kha ca mangchiy yite ama rehriena kha Abyipa'a luo ama chang aa. Ama re kha palung tluosa pata ama hrie the riypata ama ri kha a ngie tie ung. Ama ngiechipuo pata hrie yi sala niema cuota pha the'a vyi.

¹⁸Thlaa malie chuopa tie ung; hmangting kha pa-uvsathyi tluo a tla pata ma hrie khing nakawta ma chiephathleduona ca a pathe.

¹⁹Niema'a luo a catli pata ina vya pachiy sa khu riypata khuo vie ta thlaa nama chuo riypata khuopuv ta icaa hu yi.

²⁰Chuozaa biekuona thiyse thueta a lesyipa tuvkhietuv ta a cuopa Abyipa Zingsuv kha thiyna taata a pathu pakhaapa diena Khazing ta

²¹Zingsuv Khrih thueta a khingna hne kiema hrawlie ama palung a patluo riypa hmang a hrie khu riypata hmang phapa bangkhuo ta tluo ca patling yi se. Rungnaana ca ama'a lie chuozaa ta aw mangsue.

²²Uvnu hne sieta zaw, a pachangta tah i vya capepa ica pasunapa yi i bie hing palung pasiysa pata nama ziy riypata paa ica kie yi.

²³Ma uvnupa Timote kha thaw chung taata a pya tli tapa ica pachang sa khing yi. A vya chiy hmuo kieca niema hne maa taw thue hing ivya chiyle aa.

²⁴Luo caa chiytuv tie hne mingpathepa tie kha bie naa changpa mya ung. Italy ruo lie a awpa ma uvnu zaw ta bie acaa chang yi.

²⁵Vihnyina ca nama bangkhuo cunglie aw mangsue.