Read Lautu Chin Hebru 3 Bible Online

Hebru 3 - Lautu Chin bible

Hebru 3

¹Cacuonakawta, vuoruo taata u hne pakhawpa uvnu hne sieta zaw,[5] lucuotuv hne tluobyilepa ta a cuo tapata ma zangpa Zingsuv kaw kha rue tie ung.

²Moses ca Khazing ing chunglie zang tluo a tla pahaakhata Zingsuv zaw ta ama a tlawtuv Khazing cunglie zangtluo a tla ra.

³Ing laata ing satuv kha pa-uvsathyina a hmung vie pahaata Zingsuv ca Moses laata pa-uvsathyina a hmung vie.

⁴Tahematapakieca ing bangkhuo ca cawsaa pakhakha ta sapa a cuo pahaata hmangting bangkhuo satuv ca Khazing ta a cuo.

⁵Moses ca changtaapa a cuo pahaata Khazing ing chunglie zangtluo a tla pata a aw aa. Khazing ta hmie luo thue a ri riypa kha a pachangtuv tana a cuo.

⁶Cadyiseca, Khrih ca Saacapaa a cuo pahaata Khazing ing lie kha zangtluo aa tlapa a cuo. Kiema zaw hing ma zangna hne maa palesakhyipa anguopuona kha a cusa pata maa patuv[6] kieca a ing ta ma cuo.

⁷Cacuonakawta, Thlaapa Pathe ta a ripa haata, “Ata ning hing niema ta Abyipa ueryi kha nama thyi kieca,

⁸nama mingchingmingvuo tie ta ruochung lie kama inaa zaa du ning haa yi khata, nama palung le kha se.

⁹Kung sawliy chung i re hriepa ama hmung thluo pata, khapa hmang lie kha inaa zaa du yi.

¹⁰Cacuonakawta iema cunglie kha i hi haa te, ama palung si zya ca chie pari te, i luopuv kha pachang vayi, i ta.

¹¹I hihaa te chie i sapa yi ca, ‘kama adingna luo kha a ngie khu'a vayi,’” i ta.

¹²Uvnu hne sieta zaw, a hringpa Khazing a ruosena te ta zang lina pathiypalung chiepa kha niema pakha hmuo nama hnyi li riypata a raaring tie ung.

¹³Cuorasala hangthenapa suena ta nama palung aca pale sa li riypa yita, ata ning ma tapa a aw chung bangkhuo a ning tating ta pakha hne pakha kha a pasu tie ung.

¹⁴Tahematapakieca a hruothu baataata ma za hnyipa hnaanguona kha a chuona te ta a cusa pata maa patuv kie kyalya na, Khrih hne a hraw ra pata ma cuo aa.

¹⁵Caapathepa ta, “Ata ning hing a ueryi na thyi kieca, amaa zaa du ning haakhata nama palung le kha se,” a ta.

¹⁶Ahungma a ueryi thyi te a dutuv ca a cuo? Moses luochiyna raw lieta Izipt ruo a vya pya sepa tie kha cuo vayi ma?

¹⁷Ahung cunglie ma kung sawliy chung a hi a haa? Suena ama tue nakawta ruochung lie a thiypa tie cunglie kha cuo vama?

¹⁸Ri namaa ngie li kieca adingna luo kha a ngie khu'a va ungciy tapata ahungkhama chie i sa yi?

¹⁹Cacuonakawta, ama zang li nakawta adingna luo amaa ngie khu li pakha ma hmung.