Read Lautu Chin Hebru 4 Bible Online

Hebru 4 - Lautu Chin bible

Hebru 4

¹Cacuonakawta, adingna luo a ngiena riypa biekuo aa pahaw kalie ningta, niema pakha hmuo a ngie li pata nama aw li riypata a raaring ungsiy.

²Tahematapakieca thuophaabie ca iema'a luo a chiy pahaata kiema'a luo zaw a chiy ra. Cuorasala ama thyipa bie kha zangna ta amaa paw li nakawta ama cuota thlahne vayi.

³A zangpa kiema ca Khazing ta a ripa haata adingna luo kha maa ngie. Khazing ta, “I hi haa te chie i sapa haayita, I dingna luo kha a ngie'a vayi,” a ta. Chuelyi a sa baataata a re ca a patlung tli raalaa pata hinghaahingta a ri.

⁴Tahematapakieca suvkha lieta ningsariynapa kaw hne a patuv pata a raw luo haahingta a ri, “Khazing ca ningsariynapa lie kha a re taata aa ding,” a ta.

⁵Calie ngiethie cata, “I dingna luo a ngie'a vayi,” ata pakhaa.

⁶Cacuonakawta a ngie riypa chekha a ngaa kalie yite, thuophaabie zaa thyi taapa tie ca ri amaa ngie li nakawta a ngie khu vayi.

⁷Khazing ta ning ning kha kha, “ata ning,” tapata thli te Caapathepa lie a ri ciepa haata cuo syipuv khutaa khata David'a lie a ripa ca, “Ata ning hing, a ueryi nama thyi kieca, Nama palung le kha se,” a ta.

⁸Joshua ta adingna hing za pi yi sala, Khazing ta ning hrangpa kaw hing ri'a vyi.

⁹Cahaa cata a cuo nakawta sabbath adingna ca Khazing cawsaa zaw cuota a aw kalie.

¹⁰Tahematapakieca Khazing ca a re taata aa ding pahaata, Khazing adingna luo a ngiepa tie zaw ama re taata amaa ding ra aa.

¹¹Cahaapa iema ri a ngie lina haakhata kiema pakha hmuo Khazing adingna luo a ngie li pata ma aw li riypata a cuo khu chung ta a zue ungsiy.

¹²Khazing bie ca hring te a cahra. Kuo hning ta a cahrepa zueziy laata a cahre vie. Pathiypalung hne thlaapa kha cuose, ruv cakhiy hne ruv lathliy kha cuose dawpahaw khu te; pathiypalung ta aa tingpa hne a ruena zaw kha a pachang diy.

¹³Sapa hmang khaapahmuo a hmiekunglie a nu khu vyi. Cuorasala ama hmielie ca a luotaalaa diy te ama'a lie kha ma kaw cyicuo ca maa ri kaluo aa.

¹⁴Cacuonakawta kiema ca vuoruo luo a chiy tlipa a lesyipa tluobyilecepa, Zingsuv, Khazing Saacapaapa kha ma hnyi nakawta ma zangna kha a cusa pata patuv'a ungpuv.

¹⁵Tahematapakieca ma tluobyilecepa ca ma thaadyana lie kha kaw malie a pacuo lipa hne ngie malie a chi lipa cuo vyi, cuorasala kiema haata akuo ting taata pasupaliyna a taw rapa cuote, suena ca hnyi vyi.

¹⁶Cacuonakawta a hu cuo ningta nangduena hne vihnyina kha ma hmung the riypata a vihnyina byithude luo ca riephasa pata va pangie ungsiy.