Read Lautu Chin Hebru 5 Bible Online

Hebru 5 - Lautu Chin bible

Hebru 5

¹Cawsaa zaw hraw taata a tlawpa tluobyilecepa bangkhuo ca cawsaa bangkhuo cuota Khazing kha lasaw a pi riypa hne suena a ngiethena hriykhung a ri riypata re pipa ama cuo.

²Ama zaw a thaadyapa a cuo ra nakawta ruena a cawpa hne luo a piepa tie cunglie kha kawpacuona a hnyi.

³Cahaa cata a cuo nakawta ama cuo hne cawsaa zaw cuo khata hriykhungrina kha a tue aa hu.

⁴Hing pa-uvsathyina a hmungpa re hing ahungtahmuo ama hne ama a pi khu vyi. Cuorasala Aaron a ku pahaakhata Khazing ta a ku kiedyi hrie khupa a cuo.

⁵Cacuonakawta Khrih zaw ama hne ama kha tluobyilecepa cuo riypata a cyicalang vyi. Cuorasala ama kha, “Nama ca i Saacapaa cuo cate, Ata ning hing na Paa ta i cuo,” ta te,

⁶a hrangpa suvkha lie zaw, “Nama ca Melkhizedek cuona haata, chuozaa tluobyi tana na cuo,” a tatuvpa na tluobyilecepa luo a cyicalang.

⁷Zingsuv ca saapa ta a aw ningta thiyna taata a khuo khutuv Khazing'a luo kha khuosa ta khi te mingthliy hneta thlaachuona ta paa a kie. Pa-uvsathyi aa tlapa aa pina thueta thyipa pata a cuo.

⁸Khazing Saacapaa a cuo raalaa pata a te-angna khata ri-angiena aa cuv.

⁹Tluo a tlingpa ta tuepa a cuo tiyta ama ri a ngiepa bangkhuo cuota chuozaa khuona hruopuv ta a vya cuo.

¹⁰Khazing ta Melkhizedek tluobyi cuona phung haata tluobyilecepa ta a pacuo sa.

¹¹Hingpa kawlie hingta ri riypa a hluvsa ma hnyi, cuorasala bie nama thyi the li nakawta niema'a lie pasie sa hing a ruv ciemuo.

¹²Ata hing ca pacuvtuv cuo hmuo namaa de tli raalaa pata Khazing bie kha a hruothu taata pacuv pakhaa namaa hu. Sacuopa cuo li pata ahnungtiy pi namaa hu.

¹³Ahnungtiy a dangpa ca haaseta ta cuo yite, adangna bie kha thyi khu the valie yi.

¹⁴Cuorasala sacuopa ca uvthyita cuota cuote, iema ca amaa tawpa hmang khata a chiepa hne a phapa thleduo the riypata a pacuv tlipa tie tana ama cuo.