Read Lautu Chin Hebru 7 Bible Online

Hebru 7 - Lautu Chin bible

Hebru 7

¹Melkhizedek ca Salem siepahruo cuote, Asuocepa Khazing tluobyi ta a cuo. Ama ca siepahruo tie a du yite a te diyna taata a vya kaapa Abraham kha va daw te thluechiy a pi.

²Ama'a luo ca Abraham ta “hmangting bangkhuo taakhata chehraachekha” kha a pi. A ming siyluo a suokhana ca, “adangna siepahruo,” tapata cuote, cakhutaata ama ca Salem siepahruo zaw ta a cuo nakawta a ming siyluo ca, “diena siepahruo,” tapa zaw ta a cuo.

³Nung li paa li, thukina aw li pata, a hringna hruothuna hne a chuona zaw aw vyi. Cuorasala ama ca Khazing Saacapaa haakhata cuote, chuozaa ta a hmangpa tluobyi ta a cuo.

⁴Ma mingpa Abraham tahmuo[7] ta carie kuv taata a lapa hruosue chehraachekha a pipapaa hing khatluv tama a lesyi tapa kha rue tie ung.

⁵Levi ciypathla chung taata tluobyi re a hriepa tie ca Abraham ciypathla, ama uvnu ta a cuopa cawsaa zaw'a taata chehraachekha pakhaw riypa kha nawbie ta a pa-aw yi.

⁶Cuorasala, Levi ciypathla ta a cuo lipapaa ta Abraham'a taata chehraachekha kha pakhaw te, biekuona a hmungpapaa kha thluechiy a pi.

⁷A le viepa na a caw viepa thluechiy a pi tapa ca i khu riypa cuo vyi.

⁸Suvkha lieca, a thiy thepa cawsaa na chehraachekha a hmung ta te, a hrangpa suvkha lieca a hring tapata tehte ama khuopa na chehraachekha a hmung, a ta.

⁹Chehraachekha a hmungpa Levi na Abraham taakhata chehraachekha a pi ta khu pata a cuo.

¹⁰Tahematapakieca Melkhizedek ta Abraham a taw ning kha Levi ca a mingpa pangpa chunglie khana a aw kalie.

¹¹Cawsaa ca Levi ming tluobyi cuona taata phungbie kha hmung yite tluotlingna ama za hmung pata a cuo kieca, Aaron phang tluobyi cuona cuo li pata Melkhizedek tluobyi cuona haapa tluobyi cuona ca khaapanakawma a hu kalie?

¹²Cacuonakawta tluobyi cuona a thle kieca, phungbie zaw a thle a hu ra.

¹³Hinghaahingta a kaw ama ripapaa hing mingphang hrangpa ta cuote, hingpa phang chung taahingta pakha hmuo bienatluophie lie tluobyi a hriepa aw buo vayi.

¹⁴Tahematapakieca ma Byipaapa ca Judah phang chung taata a cuopa kha a siesa pata pachangpa cuote, Moses ta hingpa phang hne a patuv pata tluobyi kaw ri vyi.

¹⁵Melkhizedek hneta aa lupa tluobyi phanghrangpa a pya tiyta capa ca a sie vie hryly.

¹⁶Ama ca a phungpa haata saapa ciypathla cuona taata tluobyi a cuopa cuo li pata para khu a cuo lipa hringna cahrana taata tluobyi a cuopa tana a cuo.

¹⁷Tahematapakieca Caapathepa ta, “Nama ca Melkhizedek haapa, chuozaa tluobyi tana na cuo,” a ta.

¹⁸Cacuonakawta nawbie taapa ca a thaa dya te a tling li nakawta para pata a cuo.

¹⁹(Tahematapakieca phungbie ca tluotling vyi); cuorasala ata hing ca a ruechuona pha viepa kha a vaw te capa thue cata Khazing kha maa ngie ung.

²⁰Capa ca chiesana ta pacu sa pata a cuo; tahematapakieca a hrangpa tie ca chiesana aw li pata na tluobyi ama vya cuo.

²¹Cuorasala ama ca chiesana tana tluobyi a vya cuo, tahematapakieca Khazing ta, “Abyipa ta chiesana hne bie a kuo, a palung kha thle buo'a vyi, Nama ca chuozaa tluobyi tana na cuo,” a ta.

²²Capa cata Zingsuv ca a pha viepa biekuona pacusatuv ta a tue.

²³Cakhutaa a hluo tluobyi tie ca thiyna ta za pha yite ama re kha ama hrie patlung khu li nakawta a mingluv ta ama hluvsa;

²⁴cuorasala ama ca chuozaa ta a hring nakawta a tluobyi cuona kha aa hmang.

²⁵Cacuonakawta, ama thueta Khazing a pangiepa bangkhuo kha a khuo khu pari yi,[8] tahematapakieca chuozaa ta a hring nakawta Khazing kha paa a kiepa khu pari yi.

²⁶Cacuonakawta cahaapa tluobyilecepa ma hnyipa ca a phasapa tana a cuo. Ama ca a pathepa, risie riy a aw lipa, pyalyina a hnyi lipa, a suepa tie'a taata pachepa hne vuoruo luo cyicalangpa tana a cuo.

²⁷Ama ca a hrangpa[9] tluobyilecepa tie haakhata a suokhana ta ama suena cuota cuose, cawsaa zaw suena cuota cuose ning kha hnang ning kha ta hriykhungrina tue a hu vyi. Ama hne ama hriykhungrina ta aa pina lie kha chuozaa cuo a zu pata yikha ta hriykhungrina a tue tli pata a cuo.

²⁸Phungbie ta thaadyana a hnyipa tie kha tluobyilecepa ta a tue yi. Cuorasala phungbie khu taata a vawpa, chiesana hne tuepa biekuona ta ca chuozaa ta tluotlingna a hnyipa Saacapaa kha tluobyilecepa ta a tue tli.