Read Lautu Chin Hebru 8 Bible Online

Hebru 8 - Lautu Chin bible

Hebru 8

¹Ata ma ri nguoluopa ta a ri khingcepa ca hingpa hing tana a cuo: Vuoruo Khazing thude cacuo luo kuo ta a tupa tluobyilecepa ma hnyi, tapa hingta a cuo.

²Ama ca cawsaa ta sapa cuo li pata Abyipa ta a sapa hmangpathepa hne a hmisipa thluodaa lie kha tluobyilecepa ta a cuo.

³Tluobyilecepa ca Khazing'a luo pipa lasaw hne hriykhungrinapa sahring kha Khazing'a luo pi riypa a cuo nakawta, capa tluobyi cuo zaw cata hriykhungrina ta pi riypa suokhakha a hnyi a hu.

⁴Abyipa hing chuelyi lie a awpa cuo sala tluobyi cuo khu'a vyi, tahematapakieca phungbie haata hriykhungrina lasaw a pituv tluobyi na a aw yi.

⁵Iema ta hmangpathepa lie ama tuepa abiena ca vuoruo lie a awpa abiena a mingthlaapa paluosana tana a cuo. Tahematapakieca Moses ta pangthluodaa sa aa nang ning kha Khazing ta, “Tluocung lie ica pahmung sapa haa khatana na sa'a tli kha,” tapata a raaringna a pipa haa khatana a cuo.

⁶Cuorasala Zingsuv ca a pha vie karaapa tluobyi re kha pipa tana a cuo. Ama ca a pha viepa biekuona hneta a patuvpa, Khazing hne cawsaa a lala lie a pha viepa biekuona luosituv tana a cuo.

⁷Tahematapakieca a suokhanapa biekuona khana tling lina zaa hnyi va tapa kieca biekuona hrangpa a huna riypa khaahmuo aw vyi.

⁸Khazing ta iema tling lina kha hmung yite a ripa ca: “Abyipa ta, Israel ming'a nata Judah ming hneta, biekuona thaapa i tuena riypa ningkhue ca a vya tlung tli.

⁹Ama mingchingmingvuo tie kha Izipt ruo chung taata pyakhyi riypata, ama kuv ta patuv yi ang te i sikhyi ning yi ta, i tuepa biekuona haakhata cuo'a vyi. I biekuona kha ama ziy li nakawta, kama zaw iema cunglie kawpacuona hnyi va ang.

¹⁰Cakhutaacata, Abyipa ta, Israel ming hne i tue riypa biekuona ca hinghaahingtana a cuo. I phungbie kha ama pachangna chunglie chi'a ang te, ama pathiypalung cunglie i cape aa. Kama kha ama Khazing cuo'a ang te, Iema kha i cawsaa ta ama cuo aa.

¹¹Pakha hne pakha kha a pacuv a hu li pata, ‘Khazing kha pachang tie,’ ama ta zaw a hu'a vyi. Tahematapakieca a cawcepa taata a lecepa te, ama bangkhuo ta ina pachang'a yi.

¹²Tahematapakieca ama pha lina kha a ngiethe'a yi ang te, ama suena kha a thyipa'a va tli yi ang.

¹³Khazing ta biekuo thaapa ta te a rinapa hingta biekuo taapa ca a hlungpa ta aa li. A hlungpa ca a ru hluo ta a viele aa.