Read Lautu Chin Hebru 9 Bible Online

Hebru 9 - Lautu Chin bible

Hebru 9

¹Biekuo taapa khata biena lie ziy riypa phung hne chuelyi lie hmangpathepa zaw a hnyi.

²Tahematapakieca bienathluodaa kha sa yite, a chuekhana kha hmangpathepa ama ta. Capa khuo chunglie ca myivuona tung, cabya, hne Khazing ama pipa viechuo zaw kha a aw.

³A suohningna pangzu hnang lie kha Hmang Pathecepa tapa khuo a aw.

⁴Capa chunglie ca rangpa-uepa ruenapa siyy bienatluophie hne a kuo bangkhuo siyy ta ama pakhuv diypa biekuona thingkaw zaw kha a aw. Capa thingkaw chunglie ca mannaa viechuo chinapa siyy bi, a daw a pakiypa Aaron khuecahryi hne biekuona capenapa lungphie zaw ama aw.

⁵Capa cunglie ca rungnaana hne a bipa cherubim tie ta ama mathlaa ama pazuu khuopa nangduena thude kha a aw. Ata hing ca capa zaw kaw hing tluotling pata ri khu'a va puv.

⁶Cahaa cata ama pachiepazu diy khu taata tluobyi tie ca a chuekhana hmangpathepa chung luo kha ningting ta a ngie yite, ama re kha ama hrie.

⁷Cuorasala chuehningna chung luo ca tluobyilecepa dyi kha kung kha ta yikha a ngie te, thiyse kha a cyi te ama cuo hne cawsaa ta lunghaaraa cuo li pata ama tuepa suena cuo khata hriykhungrina a tue.

⁸Capa cata bienathluodaa a chuekhanapa a aw chung bangkhuo ca hmangpathecepa luo a ngienapa luo ca a pahaw valie tapata Thlaapa ta malie a pachang sa.

⁹Hingpa hing ata chuo cuona pahmungsana ta cuote, Khazing'a luo pipa lasaw hne hriykhungrina zaw hingta Khazing abietuv tie pathiypalung kha patling sa khu tange vyi.

¹⁰Hingpa hmang zaw hingca sa hne tiy dang riypa hne tiynawna phangphang hneta aa patuvpa, Khazing ta hmangting a parena cuote dyita hmuo riypa, saapa hne aa patuvpa ziyphung ta a cuo.

¹¹Cuorasala Khrih ca a vaw tlipa hmangphapa hneta a patuvpa tluobyilecepa cuona hne aa vaw tiyta, cawsaa kuv ta tue lipa, sapa chuelyi taata a cuo lipa, a le viepa hne tluo a tlingpa bienathluodaa taakhata

¹²Hmangpathecepa luo kha luokha ta chuozaa cuota a ngie te, mie thiy hne cuetaata thiy ta cuo li pata, ama pangpa thiy caci kha a cyi te chuozaa athlana kha malie a tuepa.

¹³Tahematapakieca, a pathe lipa tie cunglie hipa mie thiy, cuetungpa thiy hne cuelaanung ruenapa buvcuo ta iema kha a pathe sa kie yi ca,

¹⁴chuozaa Thlaapa[10] thueta, risie riy aw li pata ama hne ama kha Khazing'a luo a pipa Khrih thiyse changchiy taca ima chiephathleduona kha thiyna hne a patuvpa re taata a hringpa Khazing biena luo malie pathe sa li pata a aw'a ma?

¹⁵Cacuonakawta Khrih ca ama a upa zaw ta biekuopa chuozaa ru kha ama cu na riypata biekuothaapa lie arena luosituv tana a cuo. Tahematapakieca biekuo taapa lieta cawsaa ta ama za tuepa suena taata iema a thla riypa khata thiyna a ang.

¹⁶Ru a huvna kaw ripa kieca ru a huvna caa a cape siypa hing a thiy hmisi tli tapa kha pacu sa taana a hu.

¹⁷Tahematapakieca ru a huvtuv a hring chung bangkhuo ca ru a huvna caa ca hmuo khu aw valie, a thiy khutaa kyalya dyina hmuo khu a aw.

¹⁸Cacuonakaw camuo biekuotaapa khahmuo thiyse ta pacu sa pata a cuo ta.

¹⁹Tahematapakieca phungbie lie a awpa haata, Moses ta nawbie bangkhuo kha cawsaa bangkhuo'a luo a za pathyi sa ning yi kha, tiy hneta pyapa cuetaata thiy hne mie thiy[11] kha la te, hissop thingdaw hne tuvhmingpangsepa kha hmuo pata nawbie caataw hne cawsaa zaw kha hi yite,

²⁰“Hingpa hing Khazing ta niema bie aca kuopa yi biekuona thiyse tana a cuo,” a ta yi.

²¹Cahaa cata bienathluodaa hne abiena lie hmuopa bi bangkhuo kha thiyse ta a hi.

²²Hmisi ta ripa kieca, phungbie rawlie ca hmangting bangkhuo hing thiyse ta pathe sa te, thiyse lang li pata ca sue a ngiethena aw vyi.

²³Cakhutaa, vuoruo hmang hmingsuo a cakepa hmang zaw kha cahaapa phung cata pathe sa a hu. Cuorasala vuoruo hmang hmisipa tie taca hingpa laa hingta a pha viepa hriykhungrina kha amaa hu.

²⁴Tahematapakieca, Zingsuv ca a hmisipa hmingsuo a cakepa, cawsaa kuv ta tuepa hmangpathepa luo kha a ngie vyi, cuorasala kiema zaw cuota Khazing hmiekunglie a luo riypata vuoruo luo hrahring kha a ngie.

²⁵Tluobyilecepa ta Hmang Pathepa chung luo kha ama thiy ta a cuo lipa thiy kha a cyi pata kung tating ta a ngie pahaata Khrih ca ama pangpa a pi pata hriykhungrina tue pari a hu vyi.

²⁶Cahaa cata a cuo li kieca chuelyi hruothu baataata ruvnaana a ang pakhaa pari na a hu aa. Cuorasala, sue pathena riypata ama pangpa kha hriykhungrina ta a pi te, cuo chuona lie kha yikha ta chuozaa cuo aa de pata a zaa luo.

²⁷Cawsaa hing yikha dyi thiy'a te bierina a ang riypata a cuo aa.

²⁸Cahaa cata cawsaa hluvpuv suena phya riypata ama pangpa kha hriykhungrina ta yikha dyi a pipa Zingsuv ca, a yihningna a luo'a te, ca aa luona lieca suena kaw ri riypa cuo li tli pata a ngietie li pata ama a mangkhuopa tie khuo riypata a cuo aa.