Read Lautu Chin 1 Piter 1 Bible Online

1 Piter 1 - Lautu Chin bible

1 Piter 1

¹Zingsuv Khrih lucuotuv a cuopa Piter ta Pontas, Galatia, Kappadosia, Asia hne Bithinia luo carie rieciy ta aa chepatlaapa, Paa Khazing ta aa tlawpa tie,

²Zingsuv Khrih ri a ngie riypa hne a thiyse ta pathe sa riypata a tlawpa tie'a luo caa ivya cape. Vihnyina hne diena ca niema'a lie tluotlingsa pata aw mangsue.

³Ma Byipaapa Zingsuv Khrih Paa hne Khazing ca pathuosa pata cuo mangsue. A lepa a duena chunglie kha Zingsuv Khrih thiyna taata a thupakhaana thueta a hringpa anguopuona chung luo cuose,

⁴vuoruo lie niema cuota chipa, a ra khu li tlipa, a pyalyi khu lipa, a lang khu lipa chung luo kha a thaa ta malie a papuv sa.

⁵Niema ca ningchuoningpa thueta a vya luo riypa khuona cuota zangna thueta Khazing cahrana ta mangchiypa tana nama cuo.

⁶Atalie hing dyapasyana phangphang chunglie ruvnaana nama ang zaw ta hing hmang kawlie hing a law tie ung.

⁷A ra thepa siyy khahmuo myi ta dyapasya pata a cuo. Siyy laata a muo ruv viepa nama zangna kha a hmisipa a cuo ma tapata dyapasya a cuopa ca Zingsuv aa luo thueta pathuosana hne rungnaana hne pa-uvsathyina nama hmungna riypatana a cuo.

⁸Ama kha nama hmung li[1] raalaa pata nama due; ata hing ama kha nama hmung li raalaa pata ama kha zang ung cate, pakaa ta ri khu lipa a sungnaapa palungtluona nama hnyi.

⁹Tahematapakieca nama zangna muo, nama thlaapa khuona khana nama hmung.

¹⁰Khuona hne a patuv pata, niema cuota a vya cuo riypa vihnyina kaw bie a phupa profet tie ta a phasa pata ama za huv pata a cuo.

¹¹Ama chunglie a awpa Thlaapa ta a pahmung sa na haayita Khrih cuota riy thlipuo ciepa ruvnaana hne a vya pazuepa rungnaana kaw kha tehte ama khuolu tiyta, ahungtama a cuo aa tapa hne khatiy tama a cuo aa tapa kha ama khieluo.

¹²Iema ca iema cuota hrie lipa yi ta nama cuota ama hriepa kha pahmung sa pata cuo yite, capa hmang hne aa patuv pata, vuoruo taata a zuvpa Thlaapa Pathe hmuo pata niema'a luo thuophaabie zaa phyapa tie thueta ata hing niema'a luo pathyi sa pata a cuo tli. Hingpa hmang hing avuoming tahmuo ta ama za hmung khing hringhruo patana a cuo.

¹³Cacuonakawta re hrie riypata nama pathiypalung ta a ting pacie pata aw tie ung; a ting pacie pata aw ungla Zingsuv Khrih aa luo thueta nama hmung riypa vihnyina lie kha namaa nguopuonapa ca bang tie ung.

¹⁴Haatiy ri a ngiesapa haakhata aw ungla Khazing nama za pachang li ningta nama za hnyipa saapa khingna kha ziy kha ung.

¹⁵Niema caa utuv Khazing ca a pathepa a cuo pahaata, nama tuepa bangkhuo lie kha pathe ra tie ung.

¹⁶Tahematapakieca Caapathepa ta “Kama ca a pathepa i cuo pahaata niema zaw nama pathe ra aa,” a ta.

¹⁷Cawsaa bangkhuo kha pahlyipale li pata ama tuena haata bie a ripatuv yi Khazing kha Paa tapata ngiechi namaa hie kieca, hing chuelyi lie khyche nama cuo chung bangkhuo hing ama kha ciyzaa pata aw tie ung.

¹⁸Nama mingchingmingvuo tie'a taata ru nama cupa, khaahmuo thlahnena a hnyi lipa hringzya taata a thlapa nama cuopa kha nama pachang. A ra thepa hmang ta a cuopa siyy hne ngu ta cuo li pata

¹⁹tluotling lina hne risie riy a aw lipa tuvtaata haapa, a muo sungpa Khrih thiyse ta a thlapa tana nama cuo.

²⁰Ama ca chuelyi sa hluo baataata a tlawpa ta cuo te, cuorasala ninghnanghnangpa cuo lie hing niema cuota paluohuo pata a cuo.

²¹Ama kha thiyna taata pathu pakhaa te rungnaana a pituv Khazing kha ama thue cata nama zang. Canakaw cata nama zangna hne namaa nguopuona ca Khazing cunglie ta aa bang.

²²Biehmisipa kha nama ziyna thueta nama thlaapa ca pathe sapa cuo tli te, canakaw cata pakha hne pakha kha nama pathiypalung hmisi ta khuopuv[2] ta namaa due.

²³A hringpa hne aa hmangpa Khazing bie thueta a ra thepa cuo li pata a ra the lipa saciy taata a thaa ta a puvpa ta nama cuo.

²⁴Tahematapakieca “Cawsaa bangkhuo ca aphuvpa haatana ama cuo, ama rungnaana bangkhuo zaw aphuvpa paa haatana ama cuo. Aphuvpa ca thiy te paapaapa zaw ama lang,

²⁵cuorasala Abyipa bie ca chuozaa ta aa hmang.” Capa bie ca niema'a lie phupa thuophaabie hingtana a cuo.