Read Lautu Chin 1 Piter 4 Bible Online

1 Piter 4 - Lautu Chin bible

1 Piter 4

¹Cacuonakawta Khrih ca a pangpa ta a za te-ang nakawta niema zaw cahaa cata ang khu riypata a ting pacie pata aw tie ung. Tahematapakieca saapa ta a te-angpa ca suena hneta aa che tli.

²Caca hing chuelyi lie a ngaapa nama hringna hing cawsaa khingna haa cuo li pata Khazing khingna haata nama hring khuna riypatana a cuo.

³Jentail ming ta ama tue khingpa hmang ta a cuopa saapa anuona, saapa khingna, sahmaa pariyna, khi-u pata anuona, khingta ningdangna, duv aa chiypa kuvtuezuv biena zaw kha ade-akhaw pata nama tue ra mangtli.

⁴Niema ta kha haapaapa a luekhungpa anuopaana lie kha namaa te khyi li tli nakawta ama kharue haa te nama thuo aca pachi yi.

⁵Cuorasala a thiypa hne a hringpa tie kha bie ripa riypata a ting pacie pata a awpa Khazing hmielie kha ama bie ca ripa pata ama cuo aa.

⁶Cacuonakaw catana a thiypa tie'a luo zaw kha thuophaabie ca phu pata a cuo. Caca cawsaa bangkhuo kha bie ripa pata ama cuo pahaata iema zaw saapa lieca bie ripa pata ama cuo raalaa pata thlaapa lie ca Khazing haata ma hringna riypata a cuo.

⁷Hmangting bangkhuo a chuona riypa cuo a ngie tli. Cacuonakawta thlaa nama chuo khuna riypata a cadangna hnyi ungla singvaasa pata aw tie ung.

⁸Capa zaw khutaa cata, pakha hne pakha kha a due pari tie ung, tahematapakieca duena ca suena hluvpuv khana a buvkhung.

⁹A ciepuo li pata pakha hne pakha kha ing a patlung sa tie ung.

¹⁰Khazing lasaw phangphang mangchiykingkaatuv pha nama cuo pahaata ama'a taata nama hmungpa lasaw kha pakha cyicuo phana cuota hmuo tie ung.

¹¹Khazing ca Zingsuv Khrih thueta hmangting bangkhuo lie a rungnaa the na riypata phung a ripa ta Khazing bie hrahring kha ri sala, a re a hrietuv ta Khazing ta a pipa thaazuo ta hrie se. Rungnaana hne cahrana ca chuozaa ta chuozaa te ama huo cuo mangsue. Amen.

¹²Duepa zaw, niema pasupaliy riypata niema hrawlie a tlapa riethyina myi cunglie kha hmang a tlung buo lipa na kiema'a lie a tlung tapata nama kharue haa kha se.

¹³Cuorasala a rungnaana aa luo tiyta alawna hne palung tluo pata nama khi-u the riypata Khrih te-angna a hrawpa haakhata a law tie ung.

¹⁴Zingsuv ming kawlie ta thuochi nama phya kieca, thluechiypa tana nama cuo, tahematapakieca rungnaana[6] thlaapa, Khazing thlaapa na nama cunglie ta a aw.[7]

¹⁵Cuorasala niema pakha hinghmuo lienawna, paruvna, pha lina tuena kawlie hne cawsaa riethyi pina kawlie taca te-ang kha ung.

¹⁶Cadyiseca khrihsaa cuona kawlie tana nama te-ang tapata a cuo kieca nama ngie chi kha se.

¹⁷Tahematapakieca Khazing chungkhue tie taata patha pata bie rina cuo ca a vya tlung tli; capacana kiema'a taata a patha tapata a cuo kieca, Khazing thuophaabie kha siysaa a ri lipa tie ama chuona ca khaapama a lu aa?

¹⁸Caapathepa ta, “Aa dangpa tie khuo riypa khahmuo a ruv pata a cuo kieca, A suepa tie hne Khazing a pachang lipa tie changchiy ca tuokhaama a cuo aa?”

¹⁹Cacuonakawta, Khazing khingna haata a te-angpa tie ca phana ama tuepuo nguoluo pa khata zangtluo aa tlapa Satuv Khazing'a luo kha a pi karue yi se.