Read Lautu Chin 1 Piter 5 Bible Online

1 Piter 5 - Lautu Chin bible

1 Piter 5

¹Khrihsaa uvthyi pakha a daahmang taata hne Khrih te-angna kha tehte a khuotuv pakha a daahmang taata cuose, a vya luo riypa rungnaana a hraw ra riypa a cuopa kama ta khrihsaa uvthyi tie kha ica pasu yi.

²Nama mangchiy riypata aca pipa Khazing tuvrung kha na re a cuo nakawdyi cuo li pata palung thusa pata mangchiy tie. Hrie muo hmung khing nakawdyi cuo li pata hrie khingna pathiypalung hrahring hnyi ungla hrie tie ung.

³Niema mangchiy riypata aca pipa yi tuvrung kha a uv ta uv kha ung, cuorasala acaa mangpuo riypa yita aw tie ung.

⁴Cakiedyina tuvkhie byice aa luo tiyta a lang buo lipa rungnaana byilakhuv nama hmung aa.

⁵Cahaa ngiethie cata niema kungnu vie tie ta uvthyi vie tie ri kha a ngie tie ung. Nama bangkhuo ta rawcanawna caw kha a hryi ungla pakha hne pakha kha a bya tie ung. Tahematapakieca Caapathepa ta, “Khazing ta a palepa tie kha a du yite, raw a canawpa tie kha vi a hnyi yi,” a ta.

⁶Cacuonakawta a cuo a de tiyta calangpa nama cuo riypata a cahrapa Khazing kuv rawlie kha rawcanawna hneta khysa tie ung.

⁷Niema kha aca mangchiy pari nakaw yi ta nama palung riethyina bangkhuo kha ama cunglie pachung tie ung.

⁸Singvaasa pata hne padiypavuosa pata aw tie ung. Nama cariepa ta a cuopa Setaa ca aa rung nguoluopa chingde haata a sie riypa kha huv te a khie nguoluo.

⁹Nama zangna kha a pacu ungla ama kha a du tie ung, tahematapakieca chuelyi lie a awpa nama uvnu hne sieta zaw[8] bangkhuo hing cahaacatana ama te-ang tapa kha nama pachangpa a cuo.

¹⁰Cuo pachangta chung nama te-ang khu taata Khrih chunglie chuozaa rungnaana luo caa kupa yi, vihnyina bangkhuo a hnyituv Khazing ama hrahring ta namaa hupa kha ca pi'a yite aca paraw pathiy'a yi, thaa ca patlung'a yite aca pacu'a yi.

¹¹Cahrana ca chuozaa ta ama huopa cuo mangsue. Amen.

¹²Kama ta niema kha thaazuo pi riypa hne hingpa hing aa hmuopa Khazing vihnyina tana a cuo tapa kha tehtekhuona ta zangtluo aa tlapa uvnu tana a cuo tapata i ruepa Silvanus'a taata hingpa caa pachangta hing ica paphya yi. Hing vihnyina chunglie hing a cusa pata a daa tie ung.

¹³Niema hneta a tlaw pakhawpa Babilon lie a awpa Khrihsaabuv hne i saacapaapa Marka zaw ta nama kuv aca patuv yi.

¹⁴Pakha hne pakha kha nama kuv a patuv ungla duena ta a pahnuo tie ung. Khrih chunglie a awpa nama bangkhuo cunglie diena aw mangsue.[9]