Read Lautu Chin 2 Piter 3 Bible Online

2 Piter 3 - Lautu Chin bible

2 Piter 3

¹Duepa zaw, ata i caa hing niema'a luo i vya capepa a yihningnapa caa ta a cuo. Hing i caa suohning chunglie hing a pathepa nama pathiypalung pathu sa riypa khana ica pachang sa pakhaapa yi ta a cuo.

²A pathepa profet tie ta hluoning ta ama za ripa bie hne Abyipa hne Khuotuv ta lucuotuv tie'a taata a ripa nawbie kha namaa thyi pakhaa riypatana a cuo.

³Suokhana ta nama pachang riypa ca, ningchuoningpa thueta ca malie a tue hyalyapa tie kha ama saapa khingna ziy pata tuehyalyana hne a vaw'a yite,

⁴“I vaw pakhaa'a ne tapa a biekuo ca khaapaliema a aw? Hluoning ma mingchingmingvuo tie ama za thiy taata pathu pata hmangting bangkhuo hing chuelyi sahruo thu ning haa khatana ama aw thluo!” ama ta aa.

⁵Ahluo ningta Khazing bie ta vuoruo hing za aw te, chuelyi hing tiy chung taata hne tiy ta sapa a cuopa hne,

⁶capa bie cata chuelyi hing tiy ta pasiypa cuote a ra pakha a pachang li hruo amaa cuo karue.

⁷Cuorasala capa Khazing bie ngiethie cata ata chuelyi hing myi ta pathe riypata bierina ning hne Khazing siysaa a ri lipa tie parana ning te ta padue cawpa a cuo.

⁸Cuorasala duepa zaw, hingpa suokha hing ca maw kha ung. Khazing cuota ca ning kha hing kung thawkha haata cuote, kung thawkha hing ning kha haata a cuo.

⁹Cawsaa chekha ta ama ruepa haata, Abyipa hing a biekuona kawlieta haasaa vyi, cuorasala pakha hmuo ra li pata cawsaa bangkhuo sue a ngiepachiy riypa a khing nakawtana niema'a lie a palung a pasiy pata a cuo.

¹⁰Cuorasala Abyipa ning ca a paruvpa haa khatana a vaw aa. Capa thueta ca vuoruo ca ueryi lesapa hneta li'a te, a chunglie hmangting bangkhuo zaw myi ta para pata ama cuo aa. Chuelyi hne a cunglie a awpa hmangting bangkhuo zaw ama vie diy aa.

¹¹Hmangting bangkhuo hing cahaa cata para riypa a cuo nakawta a pathepa hne Khazing ciyzaana hring lie hring riypata tuokhaapa cawsaa ma nama cuo a hu?

¹²Khazing a vawna'apa ning kha a ngietie li pata huo tie ung. Tahematapakieca vuoruo ca myi ta ruepa cuo'a te a vie aa, a chunglie a awpa hmang zaw kha myi ta a tiy ta palangpa ama cuo aa.

¹³Cuorasala, a biekuona haata, kiema ca adangna ta a pahruopa vuoruo thaapa hne alyi thaapa khana ma huo.

¹⁴Cacuonakawta, duepa zaw, niema ca hingpa hmang nama huo ning hing a cawta hmuo sue phawpa nama cuo li riypa hne ama hne diena nama hmung riypata a zue tie ung.

¹⁵Ma Byipaapa palung pasiyna kha khuona haata rue tie ung. Ma duepa Paul ta Khazing ta a pipa singna ta niema'a luo a vya capepa caa lie kha

¹⁶capa kaw cana a caa bangkhuo lie a ripa haakhata a ri. Capa chunglie ca pachang a ruvsapa chekha aw te, pachangna a hnyi lipa hne a palung a diydyapa cawsaa zaw taca a hrangpa Caapathepa lie ama tue tawpa haakhata a siyluo kha a palipahnaa ta papya yite iema rana tuv kha ama chiykhyi.

¹⁷Cacuonakawta, duepa zaw, a raaringna bie ica changlu pahaayita Khazing siysaa a ri lipa tie ta paana luo acaa chiy li riypa yi hne a bangsa pata nama awnapa kha nama pavie li riypata a raaring tie ung.

¹⁸Cahaa cata ma Byipaapa hne khuotuv Zingsuv Khrih vihnyina hne pachangna chunglie kha lethaw tie ung. Rungnaana ca ata hne chuozaa ta ama'a lie aw pari mangsue. Amen.[4]