Read Lautu Chin 1 Johan 1 Bible Online

1 Johan 1 - Lautu Chin bible

1 Johan 1

¹Hringna bie hne aa patuv pata hluo ning taata zaa aw ciepa, ma za thyi ciepa, ma ming ta ma za hmung ciepa, ma za mang ciepa hne ma kuv ta ma za hrie ciepa kha niema'a luo maca pathyi sa yi.

²Capa hringna ca paluohuopa a cuo tiyta, hmung pate a kaw kha tehte ma khuo. Kiema'a luo phu pata cuote Paa hneta a awpa capa chuozaa hringna kaw ca niema'a luo maca pathyi sa yi.

³Kiema hne a viesaana hnyi ra naase ungciy tapata ma hmungpa hne pathyipa kha niema'a luo maca pathyi sa yi. Kiema maa viesaanapa hing Paa hne cuose, Saacapaa Zingsuv Khrih hne cuose a viesaa hmisina tana a cuo.

⁴Maa[1] lawna a ky riypatana hing caa hing niema'a luo ma vya cape pata a cuo.

⁵Saacapaa'a taata thyi pate niema'a luo ma phupa bie ca, Khazing ca khena cuote ama chunglie ca zingna aw vyi, tapata a cuo.

⁶Ama hnetana maa viesaa ma ta pata zingna chunglie ma aw thluo kieca a hanghiepa cuo pate biehmisipa lie hring va puv.

⁷Cuorasala ama ca khena chunglie a aw pahaata khena lie ma aw kieca pakha hne pakha a viesaa'a pate Saacapaa Zingsuv thiyse ta ma suena bangkhuo taata malie a pasiy aa.

⁸Kiema ta suena hnyi va puv ma ta kieca, kiema hne kiema a dungpa tana ma cuo. Ma chunglie biehmisipa aw vyi.

⁹Ma suena kha ma phu kieca zangtluo aa tlapa hne a dangpa ama ta ma suena kha malie a ngiethe'a te, a pha lipa bangkhuo taata malie a pathe sa aa.

¹⁰Kiema ta sue va puv maa ta kieca, ama kha a hangpa a pacuo sapa cuo pate, a bie ca kiema chunglie aw vyi.